बुधबार बिहान करिब पौने ११ बजे आफ्ना कानुन व्यवसायीसहित अदालत परिसरमा पुगेका नेपालको मुद्दा इजलास नम्बर २ मा तोकिएको हो । आफैँ उपस्थित हुने भनी मंगलबार दिएको निवेदनका आधारमा अदालतले आजका लागि पेसी तोकेपछि उनी बयानका लागि हाजिर भएका हुन् ।

उनको बयान सकिएलगत्तै आजै थुनछेक बहस सुरु हुनेछ, जसले उनी थुनामा रहेर वा तारेखमा बसेर मुद्दाको पुर्पक्ष गर्ने भन्ने निर्धारण गर्नेछ । नेपालका तर्फबाट वरिष्ठ कानुन व्यवसायीहरूको टोलीले बहसको तयारी गरेको छ । उनीहरूले पूर्वप्रधानमन्त्रीको सामाजिक हैसियत, उमेर र अनुसन्धानमा प्रमाण नष्ट गर्न वा भाग्न सक्ने सम्भावना नरहेकाले साधारण तारेखमा छाडेर मुद्दाको प्रक्रिया अगाडि बढाउनुपर्ने जिकिर गर्ने जनाइएको छ । अर्कातर्फ, पदको दुरुपयोग गरी नीतिगत निर्णयका नाममा भ्रष्टाचार गरेको गम्भीर आरोप लागेकाले निष्पक्ष अनुसन्धानका लागि उनलाई थुनामा राख्नुपर्ने तर्क सरकारी पक्षको हुनेछ ।