१९ असोज, काठमाडौं । आज कोजाग्रत पूर्णिमा । प्रतिपदाका दिन घटस्थापना गरी शुरु भएको बडादसैँ आज बेलुकी घरघरमा महालक्ष्मीको पूजा–आराधना गरी विसर्जन गरिँदैछ । विजयादशमीको दिनदेखि शुरु भएको टीका र जमरा लगाउने काम आजैदेखि पूरा हुन्छ । सम्पन्नताकी देवी महालक्ष्मीले आजको रात पृथ्वीको भ्रमण गरी ‘को जागेको छ रु’ भनी हेर्ने र जो जाग्राम बसी महालक्ष्मीको पूजा–आराधना गरिरहेको छ, उसैलाई आशीर्वाद दिई धनधान्यले सम्पन्न गरिदिने धार्मिक विश्वास रहिआएको छ । यही विश्वासका कारण आज राति गृहिणीहरू जाग्राम बसी महालक्ष्मीको पूजा–आराधना गर्छन् ।लक्ष्मीपूजाको १५ दिनअघि महालक्ष्मीको आरधना गरिने भएकाले यस पर्वको विशेष महत्व छ । यो पूर्णिमालाई कौमुदी पनि भनिन्छ ।
कोजाग्रत पूर्णिमाका अवसरमा स्वयम्भू चैत्यमा पूजा गर्ने र महादीप बालेर जाग्राम बस्ने पनि गरिन्छ । कोजाग्रत पूर्णिमा नेपालीहरुको अर्को महान चाड तिहारको अगमन हुन लागेको संकेतका रुपमा पनि मनाईन्छ ।
कोजाग्रत पूर्णिमादेखि कात्तिक शुक्ल पूर्णिमासम्म अर्थात् एक महिनासम्म आकाशदीप बाल्ने र कात्तिक स्नान गर्ने गरिन्छ ।कात्तिक स्नान गर्नेले आजदेखि कात्तिक शुक्ल पूर्णिमासम्म दुई दल भएका मास, मुगी, मुसुरो, चना, भटमास आदि अन्न खान नहुने शास्त्रीय मान्यता छ ।
