काठमाडौं । रास्वपा सभापति रवि लामिछाने र काठमाडौं महानगरका मेयर बालेन शाहबिच बिहीबार भेटवार्ता भएको छ ।
बुधबारदेखि राजनीतिक भेटवार्तालाई तिव्रता दिएका मेयर बालेनले बिहीबार बिहानैदेखि देशको राजनीति आफूतर्फ आकर्षित हुने गरी छलफल गरेका छन् । आफ्ना सहयोगी कुमार बेनको ललितपुरस्थित निवासमा बालेनले रविसहितका व्यक्तिसँग भेटवार्ता गरेका हुन् ।
बालेन र रविबिच छलफल भइरहँदा बेन निवास परिसरमा सञ्चारकर्मी, जेनजी तथा शुभेच्छुकको भीड लागेको थियो ।
लामो समयको छलफलपछि रवि बाहिरिए । सोही क्रममा सञ्चारकर्मीले उनलाई बालेनसँगको भेटबारे जिज्ञासा राखे । तर, स्पष्ट जवाफ नदिइ रविले भने, ‘मेरो अनुहारले के भन्छ ?’
रविको कूटनीकि जवाफप्रति पुनः सञ्चारकर्मीले प्रश्न गरे, ‘लौरो टेक्ने कि घण्टी बजाउने ?’
यस प्रश्नको रविले स्पष्ट जवाफ दिएनन् । उनले भने, ‘बाँकी समयले बताउला, वार्ता राम्रो भयो ।’
