युवादेखि वृद्धसम्म चुनावी मैदानमा ।

0
221

२३ कात्तिक, मोरङ । मोरङमा प्रतिनिधि सभा र प्रदेश सभाको निर्वाचनमा ७० वर्ष नाघेका ६ जना उम्मेदवार चुनावी मैदानमा उत्रेका छन् । जिल्लाको ६ संसदीय क्षेत्र र १२ वटा प्रदेश क्षेत्रमा गरी १ सय ६९ उम्मेदवार चुनावी मैदानमा छन् । सत्तरी वर्ष नाघेका ६ जनामध्ये तीनजना प्रतिनिधि सभामा र तीनजना प्रदेश सभामा उम्मेदवार रहेका छन् । प्रतिनिधिसभा सदस्यका लागि ६ वटै संसदीय क्षेत्रबाट तीन महिला गरी ६१ जना प्रतिस्पर्धामा छन् । सोमध्ये सबैभन्दा जेठा उम्मेदवार ७९ वर्षीय भीमबहादुर तामाङ हुनुहुन्छ ।

तामाङ मोरङ क्षेत्र नं १ बाट स्वतन्त्र उम्मेदवार बनेका छन् । सबैभन्दा कान्छा उम्मेदवार २७ वर्षीय दिवाकर माझी प्रतिनिधिसभा सदस्यका लागि क्षेत्र नं ३ बाट मैदानमा छन् । यस्तै ७४ वर्षीय बद्रीप्रसाद मण्डल मोरङ क्षेत्र नं ५ बाट प्रतिनिधिसभाका लागि राष्ट्रिय जनता पार्टीबाट चुनावी प्रतिस्पर्धामा छन् । यसैगरी, मोरङ क्षेत्र नं २ बाट संघीय लोकतान्त्रिक मोर्चाका तर्फबाट ७१ वर्षीय थीरबहादुर लिम्बू छन् । प्रतिनिधिसभा सदस्यका लागि मोरङको ६ वटै क्षेत्रमा ६० वर्षदेखि ६९ वर्षको उमेरका आठजना उम्मेदवार हुन् ।

क्षेत्र नं ६ बाट काँग्रेसको ६७ वर्षीय डा शेखर कोइराला, ६७ वर्षीय नेमकिपाका सुरेन्द्रप्रसाद सापकोटा र संघीय समाजवादी फोरमका ६६ वर्षीय राजेश्वर विश्वास चुनावी मैदानमा रहेका छन् ।त्यस्तै, ५० वर्षदेखि ५९ वर्षका १०, ४० वर्षदेखि ४९ वर्षका ११, ३० वर्षदेखि ३९ वर्षसम्मका १४ तथा सोभन्दा कम उमेरका २७ वर्षीय दिवाकर माझी उम्मेदवार रहेका छन् । महिला उम्मेदवारमा सबैभन्दा बढी उमेरकी क्षेत्र नं ६ मा नयाँ शक्ति पार्टीबाट ५३ वर्षीया बिमला अर्याल र कम उमेरकी क्षेत्र नं २ बाट स्वतन्त्र उम्मेदवार ३६ वर्षीया कल्पना बिमली पनि प्रतिनिधिसभा सदस्यका लागि उठेकी छन् । मोरङको प्रदेशसभाको १२ वटै निर्वाचन क्षेत्रमा १सय ८ जना उम्मेदवार चुनावी मैदानमा छन् । सोमध्ये ७० वर्षका तीनजना छन् ।

क्षेत्र नं ६ ख बाट एकीकृत राप्रपा राष्ट्रवादीबाट ७४ वर्षीय मोहम्मद जावेद अन्सारी, क्षेत्र नं १ क बाट नयाँ शक्ति पार्टीका ७० वर्षीय कृष्ण राई र क्षेत्र नं ५ ख बाट नेकपा मालेबाट ७० वर्षीय कृष्णराज थापा चुनावी प्रतिस्पर्धामा उत्रेका छन् । प्रदेश सभामा सवैभन्दा कान्छा उम्मेदवारका रुपमा विवेकशील साझा पार्टीका २६ वर्षीय सरोज नेपाल छन् । साठी वर्षदेखि ६९ वर्षसम्मका १३, ५० वर्षदेखि ५९ वर्षसम्मका २४, ४० वर्षदेखि ४९ वर्षसम्मका ३७, ३० वर्षदेखि ३९ वर्षसम्म्का २४ तथा सोभन्दा कम उमेरका सातजना उम्मेदवार रहेका छन् । प्रदेशसभामा आठजना महिला चुनावी प्रतिस्पर्धामा छन् । सोमध्ये सबैभन्दा बढी उमेरका क्षेत्र नं २ ख बाट एकीकृत राप्रपा राष्ट्रवादीकी ५२ वर्षीया गोमा कार्की र कम उमेरकी क्षेत्र नं ३ क बाट ३५ वर्षीया गीता तिम्सिना छन् ।