स्वास्थ्य तथा खाद्य स्वच्छता मन्त्रालयले बिदा स्वीकृत नगरी लगातार ६० दिनसम्म कार्यालयमा अनुपस्थित रहेका २३ जना नेपाल स्वास्थ्य सेवाका कर्मचारीसँग स्पष्टीकरण माग गरेको छ।
मन्त्रालयले सार्वजनिक सूचना जारी गर्दै सम्बन्धित कर्मचारीहरूलाई सूचना प्रकाशित भएको मितिले १५ दिनभित्र आफ्नो लिखित स्पष्टीकरण पेश गर्न निर्देशन दिएको हो।
मन्त्रालयका अनुसार ती कर्मचारीहरू बिदा स्वीकृत नगरी लामो समयसम्म कार्यालयमा अनुपस्थित रहेको देखिएकाले उनीहरूविरुद्ध विभागीय कारबाही प्रक्रिया अघि बढाइएको हो।
सूचनामा उल्लेख भएअनुसार, नेपाल स्वास्थ्य सेवा ऐन, २०५३ को दफा ७४ को उपदफा (१) को खण्ड (ज) बमोजिम बिदा स्वीकृत नगरी लगातार ६० दिनसम्म कार्यालयमा अनुपस्थित रहने कर्मचारीलाई कारबाही गर्न सकिने व्यवस्था छ। सोही ऐनको दफा ७२ को खण्ड (ख) को उपखण्ड (१) अनुसार भविष्यमा स्वास्थ्य सेवाको निम्ति अयोग्य नठहरिने गरी सेवाबाट हटाउने विभागीय सजाय किन नगर्ने भन्ने विषयमा सम्बन्धित कर्मचारीसँग स्पष्टीकरण माग गरिएको मन्त्रालयले जनाएको छ।
मन्त्रालयले १५ दिनभित्र चित्तबुझ्दो सफाइ वा स्पष्टीकरण पेश नगरेमा प्रचलित कानुनी व्यवस्था अनुसार विभागीय कारबाही अघि बढाइने स्पष्ट पारेको छ।
कारबाही प्रक्रियामा परेका कर्मचारीहरू कान्ति बाल अस्पताल, महाराजगञ्ज, राष्ट्रिय क्षयरोग नियन्त्रण केन्द्र, भक्तपुर, वीर अस्पताल, शुक्रराज ट्रपिकल तथा सरुवा रोग अस्पताल, टेकु तथा आयुर्वेद चिकित्सालय, नरदेवी मा कार्यरत रहेका मन्त्रालयले जनाएको छ।
मन्त्रालयले सार्वजनिक सेवामा अनुशासन, नियमित उपस्थिती तथा जिम्मेवारी सुनिश्चित गर्न कानुनी व्यवस्था कार्यान्वयनमा कडाइ गरिएको जनाएको छ।
