राष्ट्रिय स्वतन्त्र पार्टी (रास्वपा) का सभापति रवि लामिछानेको आह्वानमा भोलि शीर्ष नेतृत्वबीच सर्वदलीय बैठक बस्ने भएको छ ।
रास्वपाका प्रवक्ता जगदीश खरेलका अनुसार बैठक बुधबार बिहान ११ बजे सिंहदरबारस्थित रास्वपा संसदीय दलको कार्यालयमा बस्नेछ ।
बैठकमा विपद् जोखिम न्यूनीकरण तथा व्यवस्थापनका लागि उच्चस्तरीय राजनीतिक संयन्त्र गठन गर्ने विषयमा छलफल हुने बताइएको छ ।
रास्वपाले विपद् जोखिम न्यूनीकरण तथा व्यवस्थापनका विषयमा राजनीतिक दलका शीर्ष नेतृत्वबीच छलफल गरी आवश्यक संयन्त्र निर्माणका लागि पहल गर्ने उद्देश्यले बैठक बोलाएको जनाएको छ ।
बैठकमा विभिन्न राजनीतिक दलका शीर्ष नेतृत्वको सहभागिता रहनेछ ।
रास्वपाका प्रवक्ता खरेलले सर्वदलीय बैठक भदौ ३१ गते बुधबार बिहान ११ बजे रास्वपा संसदीय दलको कार्यालय, सिंहदरबारमा आयोजना गरिएको जानकारी दिएका छन् ।
