नेकपा एमालेका अध्यक्ष केपी शर्मा ओलीले एमालेमाथि चौतर्फी घेराबन्दी भइरहेको आरोप लगाउँदै त्यसको प्रतिवाद गर्न पार्टीका नेता तथा कार्यकर्तालाई एकजुट हुन निर्देशन दिएका छन् ।
पार्टी कार्यालय च्यासलमा केन्द्रीय सदस्यहरूको शपथ ग्रहण कार्यक्रममा बोल्दै ओलीले आगामी निर्वाचनमा पनि एमालेविरुद्ध विभिन्न राजनीतिक दलबीच मोर्चाबन्दी हुन सक्ने बताएका हुन् ।
उनले २०७७ सालदेखि नै एमालेमाथि घेराबन्दी सुरु भएको दाबी गर्दै पार्टी कब्जा गरेर ध्वस्त पार्ने प्रयास असफल भएपछि २०७८ साल भदौ १० गते पार्टी विभाजन गराइएको आरोप लगाए । २०७९ सालको निर्वाचनमा पनि विभिन्न राजनीतिक दल एमालेविरुद्ध एकजुट भएर लागेको उनको भनाइ थियो ।
त्यस्तो प्रतिकूल परिस्थितिमा समेत एमाले लोकप्रिय पार्टी बनेको उल्लेख गर्दै ओलीले आगामी दिनमा पार्टीलाई थप बलियो बनाउन एकताबद्ध भएर अघि बढ्नुपर्नेमा जोड दिए ।
सामाजिक सञ्जालमार्फत एमाले र पार्टीका नेताहरूको चरित्रहत्या गर्ने तथा जनतामाझ अलोकप्रिय बनाउने प्रयास भइरहेको आरोप लगाउँदै उनले पार्टीभित्रैका केही नेताका गतिविधिले पनि चुनौती थपेको बताए ।
ओलीले भने, ‘हाम्रो अगाडि निर्वाचन आउँदैछ र यस निर्वाचनमा पनि हामीलाई घेर्ने काम हुन सक्छ, हामीविरुद्धको घेराबन्दी सिद्धिएको छैन । यो एकदमै चालू छ अहिले पनि । घेराबन्दी चालू छ । २०७७ सालमा हाम्रो पार्टी कब्जा गरेरै ध्वस्त पार्न खोजियो । हामीले पुनर्गठन गरेर अगाडि बढ्यौँ । फेरि २०७८ साल भदौ १० गते हाम्रो पार्टी फुटाइयो । २०७९ को निर्वाचनमा देश नै हाम्राविरुद्ध चुनावमा मोर्चाबन्दी भयो । फेरि पनि हामी सबैभन्दा लोकप्रिय पार्टी भयौँ ।’
पार्टीभित्र सुदृढ एकताको आवश्यकता औँल्याउँदै ओलीले विगतका विवाद र असमझदारीमा अल्झिनुभन्दा पार्टीको उद्देश्य प्राप्तिमा केन्द्रित हुनुपर्ने बताए । ‘समृद्ध नेपाल, सुखी नेपाली’ बनाउने लक्ष्यका साथ अघि बढेको पार्टी साना–मसिना विवादमा अल्झिन नहुने उनको भनाइ थियो ।
अध्यक्ष ओलीले नेपालमा लोकतन्त्र कमजोर बनाउने तथा राष्ट्रिय अस्मितामा आँच पुर्याउने काम भइरहेको आरोपसमेत लगाए । मुलुकको स्वाधीनता र स्वतन्त्रता कमजोर पारिएको दाबी गर्दै उनले त्यसको पुनःस्थापनाका लागि आन्दोलनमा उत्रिनुपर्ने अवस्था आउन सक्ने बताए ।
आन्दोलनका क्रममा दमन भए त्यसको प्रतिवाद गर्नुपर्ने उल्लेख गर्दै ओलीले आन्दोलनको नाममा हुने आगजनी र लुटपाटलाई भने अस्वीकार गर्नुपर्ने बताए ।
उनले भने, ‘आगो लगाउनु आन्दोलन होइन, लुटपाट गर्नु आन्दोलन होइन । आन्दोलन भनेको सङ्गठित र सशस्त्र शक्तिले असङ्गठित र निरस्त्र शक्तिलाई, ठूलो र बलियोले कमजोरलाई बलजफ्ती दमन गर्छ भने त्यसको प्रतिवाद गर्नु आन्दोलन हो । गलतका विरुद्ध, अग्रगमनका लागि, न्यायका लागि, शान्तिका लागि, दमनका विरुद्ध आन्दोलन गर्नुपर्ने हुन्छ ।’
ओलीले आन्दोलन न्याय, शान्ति, अग्रगमन र जनताको बृहत्तर हितका लागि हुनुपर्ने स्पष्ट पारे । लोकतन्त्र, राष्ट्रिय स्वाधीनता र स्वतन्त्रताको पुनःस्थापना आवश्यक रहेको उनको भनाइ थियो ।
कार्यक्रममा ओलीले पार्टीका सदस्यहरूलाई निष्ठापूर्वक सक्रियताका साथ काम गर्न निर्देशन दिँदै अब विगतको योगदानका आधारमा मात्रै मूल्याङ्कन नहुने बताए । पार्टीको नीति र नेतृत्वप्रतिको इमानदारिता, प्रतिबद्धता तथा कर्मशीलतालाई समेत मूल्याङ्कनको आधार बनाइने उनले स्पष्ट पारे ।
