काठमाडौँ । केन्द्रीय कारागारको भद्र बन्दीगृहबाट भदौ २३ गतेको घटनापछि भागेका पूर्वउपप्रधानमन्त्री टोपबहादुर रायमाझीले आफैँ फर्किने सन्देश पठाएका छन् ।

कारागार स्रोतका अनुसार रायमाझीले कसैको माध्यमबाट आफू स्वेच्छिक रूपमा फर्किन तयार रहेको सन्देश पठाएका हुन् ।

उक्त घटनामा रायमाझी मात्र नभई पूर्वगृहसचिव टेकनारायण पाण्डे, चर्चित सुन तस्करी प्रकरणका मुख्य अभियुक्त चुडामणि उप्रेती उर्फ गोरेलगायत दर्जनौँ उच्चप्रोफाइल कैदीबन्दी फरार छन् ।

कारागार प्रशासनका अनुसार हालसम्म करिब एक÷डेढ सय फरार कैदीहरू स्वेच्छिक रूपमा फर्किएका छन् ।

फरारमध्ये पाण्डेले पनि आफू फर्किन तयार रहेको सन्देश पठाइसकेको जनाइएको छ । तर, ठोस मिति भने तय नभएको कारागार स्रोतको भनाइ छ ।

सरकारले यसबीचमा फरार कैदीहरूलाई स्वेच्छिक रूपमा आत्मसमर्पण गर्न आह्वान गर्दै, नफर्किएकाहरूमाथि कडा कारबाही प्रक्रिया अघि बढाउने चेतावनी दिइसकेको छ ।

काठमाडौं । सरकारी र निजी सम्पत्तिमा क्षति गर्दै जनप्रतिनिधिलाई राजीनामाका लागि ज्ञात अज्ञात समूहहरूबाट धम्की आएको भन्दै स्थानीय तहहरूले निर्वाध रूपमा सेवा प्रवाह गर्ने वातावरण बनाउन आग्रह गरेका छन् ।

गाउँपालिका राष्ट्रिय महासङ्घ, नेपाल नगरपालिका सङ्घ र जिल्ला समन्वय समिति महासङ्घले संयुक्त प्रेस विज्ञप्ति जारी गर्दै राष्ट्रपति र सुरक्षा नियकाहरू समक्ष यस्तो माग गरेका हुन् ।

‘स्थानीय सरकारका प्रशासनिक भवन र सवारीसाधनमा आगजनी गर्ने, नागरिक तथा जनप्रतिनिधिहरूको निजी सम्पत्ति, उद्योग व्यवसायमा क्षति पुर्‍याउने साथै जनप्रतिनिधिहरूलाई राजीनामा दिन ज्ञात र अज्ञात व्यक्ति वा समूहहरूबाट धम्की आउने घटनाहरू भैरहेका छन्,’ विज्ञप्तिमा भनिएको छ ।

जेन९जीको आन्दोलनमार्फत अभिव्यक्त भ्रष्टाचारको अन्त्य, मुलुकमा सुशासनको प्रत्याभूति तथा युवाहरूको शासन व्यवस्थामा सहभागिताजस्ता मागमा समर्थन जनाउँदै ती नै सङ्गठनले आन्दोलनको आडमा भएका अवाञ्छित घुसपैठका कारण आगजनी र तोडफोडका घटनाको भने भर्त्सना गरेका छन् ।

काठमाडौं । जेनजी प्रदर्शनका कारण भन्सार नाकामा भएको तोडफोड र हिंसाले खाना पकाउने एलपी ग्यासको आपूर्ति प्रभावित हुन थालेको छ। उपभोक्ताहरूले ग्यास अभावको गुनासो गरिरहँदा सरकार र आपूर्ति निकायहरूबीच फरक धारणा देखिएको छ।

गत सोमबारदेखि सुरु भएको जेनजी आन्दोलन हिंसात्मक बनेपछि भारतबाट ग्यास आयात लगभग ठप्प भएको एलपी ग्यास उद्योग संघ ले जनाएको छ। अध्यक्ष शिव घिमिरे का अनुसार, भारतीय चालकहरू नेपाल प्रवेश गर्न हिच्किचाएका छन् भने भन्सारको क्षतिले ग्यास आयात प्रक्रियामा गम्भीर अवरोध पुगेको छ। उनले सेनाले एलपी ग्यासलाई अति आवश्यक वस्तु घोषणा गरे पनि यसको आवागमन सहज गर्न स्पष्ट निर्देश नआएको गुनासो गरे।

तर, नेपाल आयल निगम ले भने बजारमा ग्यास अभाव नभएको दाबी गरेको छ। प्रवक्ता मनोज ठाकुर का अनुसार, आन्दोलनका कारण उपभोक्ताले अत्यधिक ग्यास सञ्चय होल्ड गरेका कारण बजारमा अभाव देखिएको हो। उनले ग्यास आपूर्ति सामान्य रहेको र वीरगञ्ज भन्सारबाट दैनिक बुलेटहरू पास भइरहेको बताए।

ग्यास विक्रेता महासंघ का वरिष्ठ उपाध्यक्ष विष्णुप्रसाद दुलाल ले तत्काल अभाव नभए पनि केही दिन यस्तै अवस्था रहे ग्यास अभाव हुन सक्ने चेतावनी दिएका छन्। उनले कर्फ्युका कारण उपभोक्तामा त्रास बढेको र पसलहरू बन्द हुँदा वितरण प्रभावित भएको बताए।

यसैबीच, उपत्यकाका उपभोक्ताहरू ग्यास नपाएर फर्किएको गुनासो गरिरहेका छन्। कलंकीका रमेश खड्का भन्छन्, “तीन दिनको आन्दोलनमै ग्यास सकिने देशमा हामी सर्वसाधारण कसरी बाँच्ने ? ”

आन्दोलनका कारण आपूर्ति शृङ्खला प्रभावित भइरहे पनि सरकार, आयल निगम, र उद्योग संघबीचको समन्वय अभावले समस्या समाधानमा ढिलाइ भइरहेको देखिन्छ। उपभोक्तालाई आवश्यक मात्रामा ग्यास खरिद गर्न र सञ्चय नगर्न आग्रह गरिएको छ।

काठमाडौँ । भाद्र २३ र २४ गतेको विरोध प्रदर्शन र त्यसपश्चात भएको हिंसा–तोडफोडले मुलुकलाई गम्भीर राजनीतिक सङ्कटमा धकेलेको छ ।

राजधानी काठमाडौँदेखि देशका विभिन्न भागसम्म भएको प्रदर्शनमा ज्यान गुमाउने, घाइते हुने तथा महत्त्वपूर्ण राज्यका संरचना नष्ट हुँदा परिस्थिति थप जटिल बनेको छ । यस आन्दोलनप्रति प्रमुख राजनीतिक दलका नेताहरूले फरक फरक धारणा सार्वजनिक गरेका छन् ।

जनअपेक्षाको गतिमा काम गर्न नसकेको काँग्रेसको स्वीकार

नेपाली काँग्रेसका महामन्त्री गगन थापा र विश्वप्रकाश शर्माले संघीय लोकतान्त्रिक गणतन्त्र आइसकेपछि सत्तामा पुगेका व्यक्ति र पार्टीहरूले जनअपेक्षाको गतिमा काम गर्न नसकेकोले वर्तमान स्थिति आएको स्वीकार गरेका छन् । बेथिति र भ्रष्टाचार मौलाएको विषयलाई गम्भीर आत्मसमीक्षा गरिरहेको उनीहरूको भनाई छ ।

सत्तालाई जबाफदेही बनाउन गरेका प्रयास पनि अपूर्ण रहेको, पर्याप्त हस्तक्षेप गर्न नसकेको र नयाँ पुस्ताको लय र चाहना समयमै बुझ्न नसकेकोमा दुई महामन्त्रीले आत्मालोचना गरेका छन् । उनीहरूले पार्टीलाई जरैदेखि सम्पूर्ण रूपमा पुननिर्माण गर्ने प्रतिबद्धता समेत जनाएका छन् ।

‘अब फेरिएको यस परिस्थितिमा युवाहरूको आकांक्षा र अपेक्षा अनुसार जिम्मेवार राजनीति गर्ने दलका रूपमा नेपाली काँग्रेस पार्टीलाई जरैदेखि सम्पूर्ण रूपमा पुनर्निर्माण गर्ने प्रतिबद्धता गर्छौँ । हामी विश्वस्त छौँ–आवेग, उत्तेजना र प्रतिशोध यस्तो उथलपुथलका बेला आउने र जाने क्षणिक कुरा भएकाले अबको नेपाली काँग्रेस आम जनताको अपेक्षा, जेनजी युवाहरूको भावना र अन्य भिन्न पुस्ताको अभिमत समेतलाई गाँसेर अझ सशक्त र जन उत्तरदायी दल बनेर अघि आउनेछ,’ अपिलमा भनिएको छ ।

काँग्रेस प्रवक्ता डा. प्रकाशशरण महतले प्रदर्शनमा भएको क्षति माओवादी द्वन्द्वभन्दा पनि बढी भएको टिप्पणी गरेका छन् । प्रदर्शनका क्रममा भएको गतिविधि लोकतान्त्रिक विरोधको मर्म र मान्यताबाट बाहिर गएको उनको भनाई छ । ‘देश, जनता र लोकतन्त्रप्रति प्रतिबद्ध नवयुवाहरूले अवश्य पनि यस्तो चाहेका थिएनन् । कार्यपालिका, व्यवस्थापिका र न्यायपालिका जस्ता लोकतन्त्रका आधारभूत स्तम्भहरूमा समेत आगजनी हुनु गम्भीर छ,’ महतद्धारा जारी प्रेस नोटमा भनिएको छ ।

पार्टी सभापति शेरबहादुर देउवा लगायत अन्य नेताहरू माथि भएको सांघातिक आक्रमणको उनले निन्दा गरेका छन् ।

संविधान, व्यवस्था र प्रणाली माथि नै खतरा उत्पन्न हुनेगरी षड्यन्त्र हुँदैछ : एमाले

नेकपा (एमाले) का प्रमुख सचेतक महेश बर्तौलाले यतिबेला राष्ट्रका विरुद्ध संविधान, व्यवस्था र प्रणाली माथि नै खतरा उत्पन्न हुनेगरी भयानक षड्यन्त्र हुन खोजिरहेको बताएका छन् । उनले यसतर्फ सचेत रहँदै नेपाल र नेपालीको सुदूर भविष्यका बारेमा सोच्न आग्रह गरेका छन् ।

लोकतान्त्रिक लोकतान्त्रिक व्यवस्थामा सरकारको शासकीय कार्यशैली र प्रवृत्तिहरूका बारेमा नागरिक तहमा प्रश्नहरू उठ्नु, खबरदारी गर्नु, विरोध वा आलोचना हुनु वा सरकार प्रति नै अरुचि प्रकट भई नयाँ सरकारको माग गर्नु लोकतन्त्रले दिएको सुन्दर अधिकार रहेपनि लोकतान्त्रिक हकको उपयोग गर्दै गर्दा न्यूनतम कर्तव्य, जिम्मेवारी र राष्ट्र प्रतिको जबाफदेहितालाई भने कसैले पनि भुल्न नहुने उल्लेख गरेका छन् ।

‘निरङ्कुशता र अधिनायकवादका विरुद्ध लोकतन्त्रका लागि जीवनभर लडेका राजनीतिक दलहरू र नेतृत्वका लागि सत्ता वा सरकार कुनै अलौकिक महत्वका कुराहरू होइनन्, यो त जनताले निर्धारण गर्ने या फैसला गर्ने विषयहरू हुन् । मुख्य वा महत्वको कुरा त मुलुकको स्वाधीनता, सार्वभौमिकता, भौगोलिक अखण्डता, राष्ट्रिय हित र लोकतन्त्र को रक्षा तथा हाम्रा संवैधानिक प्रबन्धहरूको जीवन्तता नै हो’, उहाँले जारी गरेको अपिलमा उल्लेख छ ।
उहाँले क्षणिक आवेग, उत्तेजना हडबड वा अल्पकालीन सोचबाट नभई देशको संविधान, अवलम्बन गरिरहेको अहिलेको व्यवस्था र प्रणाली बाट मात्रै देशको सुन्दर भविष्य निर्माण गर्न सकिने बताउनुभएको छ । यसबाट मात्रै अग्रजहरूले रगत बगाएर, लडेर जोगाएको देशको स्वाधीनता, सार्वभौमिकता, भौगोलिक अखण्डता र राष्ट्रिय हितको संरक्षण गर्नसक्ने उहाँको भनाई छ ।

ओली नेतृत्वमा सरकारकै कारण अहिलेको स्थिति आयो : माओवादी

नेकपा (माओवादी केन्द्र) का अध्यक्ष पुष्पकमल दाहालले ओली नेतृत्वमा सरकारकै कारण अहिलेको स्थिति आएको दाबी गरेका छन् । माओवादी केन्द्रले निरन्तर खबरदारी गरेपनि सरकार दमनको निरंकुश बाटोमा अघि बढेर समस्या सिर्जना गरेको उनको आरोप छ । सरकारले सिर्जना गरेको परिस्थितिका कारण जेन जी पुस्ताका युवाहरूसहित जनताको आक्रोश विस्फोट भएको उल्लेख गर्दै उनले युवाहरूको आवाज सुन्नुको साटो सरकारले गरेको नरसंहारका कारण ठुलो मानवीय क्षति भएको उल्लेख गरेका छन् ।

उनले संसद भवन, सिंहदरबार, सर्वोच्च अदालत, अख्तियार, सुरक्षा निकायका कार्यालय लगायतका दर्जनौँ संरचनामा आक्रमण गर्नेहरू जेनजी आन्दोलनकारी नभएको पनि बताएका छन् ।

‘त्यो जेन–जी आन्दोलनकारीले गर्न सक्दैनन्, ऊनीहरूबाट भएका होइनन् र भएका घटनाहरू उनीहरूको आदर्श अनुरूप पनि छैनन् भन्ने हाम्रो ठहर छ । हामी यी अकल्पनीय घटनाप्रति खेद प्रकट गर्दै आन्दोलनमा भएको बर्बर दमन, नरसंहार एवं लुटपाट र आगजनीका घटनाहरूको उच्चस्तरीय न्यायिक छानबिन गर्न माग गर्दछौँ,’ अध्यक्ष दाहालद्वारा जारी विज्ञप्तिमा भनिएको छ ।

जेनजीले पनि माओवादी केन्द्रले उठाउँदै आएको जस्तै प्रत्यक्ष निर्वाचित कार्यकारीदेखि सांसदहरू मन्त्री बन्न नपाउने र उच्चपदस्थ कर्मचारी तथा नेताहरूको सम्पत्ति छानबिनका लागि अधिकारसम्पन आयोगका पक्षमा आवाज उठाएको उनको भनाई छ ।

‘जेनजी युवा र हामीले एउटै मुद्दा उठाइरहेका बेला पनि हाम्रो पार्टी कार्यालय, निजी निवास र राज्यका साझा संरचनामा कसले र किन आगो लगायो रु यसको बारेमा हामीले गम्भीर रूपमा सोच्नै पर्छ । यसखालका घटना जेन जि पुस्ताको घोषित नीति र आदर्शविपरीत छन् र उनीहरूबाट यस्तो हुन्छ भन्ने कल्पना पनि गर्न सकिँदैन,’ विज्ञप्तिमा दाहालले भन्नुभएको छ ।

राजालाई अभिभावक बनाऔंः राप्रपा

राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङदेनले संसद विघटन र संविधान खारेज गरेर राजालाई अभिभावक बनाउन आग्रह गरेका छन् ।

लिङदेनले जिम्मेवार व्यक्तिहरूको गैरजिम्मेवार क्रियाकलापले देशले अकल्पनीय र अपूरणीय क्षति व्यहोर्नुपरेको उल्लेख गर्दै अब थप जनधनको क्षति रोक्न, मुलुकलाई दीर्घकालीन द्वन्द्वबाट जोगाउन र वैदेशिक हस्तक्षेप रोक्न तत्काल ठोस कदम चाल्नुपर्ने उल्लेख गर्दै राजसंस्था ल्याउन माग गरेका हुन् ।

उनले वर्तमान संसदको विघटन र संविधानको खारेजी, जेनजीको सहमतिमा अन्तरिम सरकार गठन, अन्तरिम संविधानको निर्माण, जनताबाट प्रत्यक्ष निर्वाचित कार्यकारी प्रधानमन्त्री, पूर्ण समानुपातिक संसद, प्रदेश संरचनाको खारेजी, बलियो स्थानीय तह र गैरदलीय स्थानीय शासन व्यवस्था लगायतका व्यवस्था गर्न माग गरेका छन् ।

लिङदेनले नेपालको मौलिकता, संस्कृति र सामाजिक सद्भावलाई कायम राख्ने खालको नयाँ संरचना आवश्यक रहेको बताएका छन् ।

काठमाडौँ । आगामी साताबाट सर्वोच्च अदालतले आंशिक रूपमा आफ्नो सेवा सुरु गर्ने भएको छ ।

सर्वोच्चका सबै न्यायाधीश सम्मिलित पूर्ण बैठक (फूल कोर्ट) ले आगामी आइतबारदेखि बन्दीप्रत्यक्षीकरणको निवेदनहरू हेर्न थाल्ने जनाएको हो ।

काठमाडौँ । राष्ट्रपति रामचन्द्र पौडेलले मुलुकमा लोकतन्त्रको संरक्षण तथा शान्ति सुव्यवस्था कसरी कायम गर्न सकिन्छ भनेर आफू विचार विमर्शमा रहेको बताएका छन् ।

एक विज्ञप्ति जारी गरेर राष्ट्रपति पौडेलले देशको अहिलेको परिस्थितिमा मुलुकलाई संवैधानिक दायरामा रहेर विचार विमर्शमा रहेको बताएका छन् ।

उनले आन्दोलनकारी नागरिकको माग सम्बोधन गर्न छिटो भन्दा छिटो समस्याको निदानको खोजी भइरहेको कुरामा विश्वस्त हुन आग्रह गरेका छन्

उने संयततापूर्वक मुलुकमा शान्ति सुव्यवस्था कायम गर्ने काममा सहयोग गर्न सबै पक्षलाई अपिल पनि गरेका छन् ।

काठमाडौं । पूर्वप्रधानमन्त्री एवं नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले जेन-जी पुस्ताले आह्वान गरेको सुशासन आन्दोलनमा सहादत प्राप्त गर्ने युवाहरूलाई भावपूर्ण श्रद्धाञ्जली व्यक्त गर्दै घाइतेहरूको शीघ्र स्वास्थ्यलाभको कामना गरेका छन् । उनले परिवारजनमा गहिरो समवेदना प्रकट गर्दै आन्दोलनका क्रममा भएको बर्बर दमन, नरसंहार तथा तोडफोड, लूटपाट र आगजनीका घटनाहरूको उच्चस्तरीय न्यायिक छानबिनको माग गरेका छन् ।

प्रचण्डले आजभन्दा १४ महिनाअघि कांग्रेस र एमालेले मध्यरातमा सुरु गरेको असंवैधानिक र अप्राकृतिक गठबन्धनको पटाक्षेप दुःखद् रूपमा देखिएको बताएका छन् । भ्रष्टाचारविरुद्ध सुशासन, सामाजिक न्याय र समृद्धिका पक्षमा आफ्नो नेतृत्वको सरकारले चालेका कदमबाट अत्तालिएका स्वार्थ समूहहरूको सेवामा गठबन्धन सरकार तल्लीन भएकै कारण जनताको आक्रोश चरम रूपमा बढेको उनको भनाइ छ । उनले जेन-जी पुस्ताका युवाहरूको आवाजलाई बर्बर तरिकाले कुल्चिन सरकारले भयानक नरसंहार मच्चाएको आरोप लगाएका छन् ।

आन्दोलनको दोस्रो दिन व्यवस्थापिका संसद भवन, राष्ट्रपति निवास, सिंहदरबार, सर्वोच्च अदालत, अख्तियार, सुरक्षा निकायका कार्यालयलगायत सार्वजनिक संरचना, राजनीतिक दलका कार्यालय, निजी आवास, होटल, बैंक र व्यावसायिक भवनहरूमा भएको तोडफोड, लूटपाट र आगजनीका घटनाहरू जेन-जी आन्दोलनकारीले गर्न नसक्ने र उनीहरूको आदर्श अनुरूप पनि नरहेको प्रचण्डको ठहर छ । उनले यी अकल्पनीय घटनाप्रति खेद प्रकट गर्दै आन्दोलनमा भएको बर्बर दमन र नरसंहारको छानबिन माग गरेका छन् ।

प्रचण्डले केपी ओली नेतृत्वमा सरकार गठनपछि विश्वासको मत लिने क्रममा आफूले संसद्को रोस्ट्रमबाटै गठबन्धनको सरकार जुन उद्देश्यले बनाइयो, त्यसकै कारण अहिलेको जस्तो अवस्था आउन सक्नेतर्फ सचेत गराएको स्मरण गराएका छन् । उनले आफ्नो पार्टीले सरकारलाई लगातार कठोर आत्मसमीक्षासहित सच्चिन आग्रह गरेको र कुशासनका शृंखला जारी नै रहेमा जनताको धैर्यताको बाँध कुनै पनि बेला फुट्न सक्नेतर्फ सचेत गराउँदै आएको बताए । तर, दुई तिहाइ संख्याको दम्भमा सरकार संवेदनहीन बनेर अहमताकै बाटोमा अघि बढेको र सामाजिक सञ्जालमा प्रतिबन्ध लगाउने तथा दमनको निरंकुश बाटोमा हिँडेकाले जेन-जी पुस्ताका युवाहरूसहित जनताको आक्रोश विस्फोट भएको उनको विश्लेषण छ ।

प्रचण्डले भ्रष्टाचारविरुद्ध निरन्तर आवाज उठाउँदै आएको र पछिल्लोपटक सरकारको नेतृत्व गर्दा समेत सुशासनको विषयमा निर्णायक पहलकदमी लिएको उल्लेख गरेका छन् । प्रत्यक्ष निर्वाचित कार्यकारी, सांसदहरू मन्त्री बन्न नपाउने र उच्चपदस्थ कर्मचारी तथा नेताहरूको सम्पत्ति छानबिनका लागि अधिकारसम्पन्न आयोगका पक्षमा माओवादी केन्द्रले आवाज उठाउँदै आएकोमा आज जेन-जी पुस्ताले पनि यिनै मूलभूत मुद्दालाई लिएर आन्दोलनमा उत्रनु गर्वको कुरा भएको उनले बताए । जेन-जी आन्दोलनको घोषणापछि आफूहरूले त्यसको समर्थन गर्दै आन्दोलनमा बल प्रयोग नगर्न सरकारलाई खबरदारी गरेको पनि प्रचण्डले स्मरण गराएका छन् ।

आन्दोलनको दोस्रो दिन आयोजकको पूर्वघोषणाविपरीत अवाञ्छित तत्वहरूको घुसपैठ देखा परेको र नेपालको ऐतिहासिक धरोहर सिंहदरबारसहितका संरचनामा भएको लूटपाट र आगजनीका घटनाहरू इतिहासमै सर्वाधिक नकारात्मक बनेको प्रचण्डको भनाइ छ । जेन-जी युवा र आफ्नो पार्टीले एउटै मुद्दा उठाइरहेका बेला पनि पार्टी कार्यालय, निजी निवास र राज्यका साझा संरचनामा कसले र किन आगो लगायो भन्नेबारे गम्भीर रूपमा सोच्नुपर्नेमा उनले जोड दिएका छन् । यस्ता घटनाहरू जेन-जी पुस्ताको घोषित नीति र आदर्शविपरीत रहेको उनको ठहर छ ।

उनले कुनै बेला तत्कालीन सत्ताले जनताका कुरा नसुन्दा जनयुद्ध सुरु गर्नुपरेको र जनयुद्ध जनतामाथि भइरहेको चरम शोषण, दमन र हिंसाविरुद्धको प्रतिरोध भएको स्मरण गराएका छन् । शान्ति, सुशासन र समृद्धिमा जानुपर्ने विश्वासका साथ १२ बुँदे सहमति, १९ दिने जनआन्दोलन हुँदै बृहत शान्ति सम्झौतामार्फत देश संविधानसभामा प्रवेश गरेको र यसकै जगमा टेकेर लोकतान्त्रिक गणतन्त्रको संविधान कोर्न सफल भएको उनले बताए।

काठमाडौं । नेपालमा जारी राजनीतिक गतिरोध अन्त्यका लागि नेपाली सेनाको सक्रिय समन्वयमा राष्ट्रपति रामचन्द्र पौडेल र ‘जेनजी’ युवा प्रतिनिधिहरूबीच आज महत्वपूर्ण वार्ता हुँदैछ । यो छलफलले अन्तरिम सरकार गठनको प्रक्रियालाई औपचारिकता दिने अपेक्षा गरिएको छ । अन्तरिम सरकारको नेतृत्वका लागि पूर्वप्रधानन्यायाधीश सुशीला कार्कीको नाममा जेनजी प्रतिनिधिहरूले सहमति जुटाइसकेका छन् ।

नेपाली सेनाका प्रवक्ता राजाराम बस्नेतका अनुसार राष्ट्रपति रामचन्द्र पौडेल र प्रधानसेनापति अशोकराज सिग्देलले हिजोदेखि नै जेनजी प्रतिनिधिहरूसँगको छलफललाई निरन्तरता दिएका छन् । आजको बैठकले ठोस निकास निकाल्नेमा सेना विश्वस्त देखिएको छ । प्रधानमन्त्री केपी शर्मा ओलीले भ्रष्टाचार र सामाजिक सञ्जाल प्रतिबन्धविरुद्ध युवाहरूले गरेको आन्दोलनमा १९ जनाको ज्यान गएपछि राजीनामा दिएका थिए । युवा आन्दोलनको मुख्य माग नै ताजा जनादेशका लागि अन्तरिम सरकार गठन भएकाले त्यसै दिशातर्फ प्रक्रिया अघि बढेको हो ।

जेनजीबाट प्रस्तावित पूर्वप्रधानन्यायाधीश कार्कीको नाममा काठमाडौं महानगरपालिकाका मेयर बालेन शाहले समेत सार्वजनिक रूपमा समर्थन जनाएका छन् । उनले सामाजिक सञ्जाल फेसबुकमार्फत कार्कीको नेतृत्वलाई आफ्नो समर्थन रहेको जानकारी दिएका थिए । प्रधानसेनापति सिग्देलले यसअघि नै विभिन्न पक्षहरूसँगको छलफल गरिसकेका छन् ।

यस क्रममा जेनजी युवाका प्रतिनिधिहरू, धरान उपमहानगरपालिकाका प्रमुख हर्क साम्पाङ र दुर्गा प्रसाईंसँग पनि उनले परामर्श गरेका थिए । हर्क साम्पाङले पनि सुशीला कार्कीको नाममा समर्थन व्यक्त गरिसकेका छन् भने दुर्गा प्रसाईंले देशले निकास पाउने गरी जसको नेतृत्वमा सरकार बने पनि आफूलाई स्वीकार्य हुने बताएका छन् ।

जेनजी युवाहरूले भर्चुअल माध्यमबाट गरेको सर्वेक्षणमा सुशीला कार्कीको नाममा व्यापक समर्थन देखिएको थियो । कार्कीले पनि अन्तरिम सरकारको नेतृत्व गर्ने जेनजीको प्रस्ताव स्वीकार गर्ने प्रतिबद्धता जनाइसकेकी छन् ।