काठमाडौँ । निर्वाचन आयोगले समानुपातिकतर्फ उम्मेदवारको नाम पेश गर्न दलहरूलाई ३ दिनभित्र समय सीमा तोकेको छ। यो प्रक्रिया समानुपातिक मतगणना पूरा भइसकेपछि सिट वितरण तय भएपछि गरिएको हो।
आयोगका प्रवक्ता नारायणप्रसाद भट्टराईका अनुसार, थ्रेसहोल्ड नियमअनुसार ३ प्रतिशतभन्दा बढी मत पाएका दललाई सिट उपलब्ध गराइने व्यवस्था अनुसार राष्ट्रिय स्वतन्त्र पार्टी (रास्वपा) लाई ५७, नेपाली काँग्रेसलाई २०, नेकपा (एमाले) लाई १६, नेपाली कम्युनिस्ट पार्टी (नेकपा) लाई ९, श्रम संस्कृति पार्टीलाई ४ र राष्ट्रिय प्रजातन्त्र पार्टी (राप्रपा) लाई ४ सिट प्रदान गरिएको छ।
समानुपातिक मतगणनामा कुल एक करोड १२ लाख ८० हजार ६१७ मत खसेको थियो, जसमध्ये ९६.०५ प्रतिशत मत (एक करोड ८ लाख ३५ हजार २५) सदर भएको आयोगले जनाएको छ। प्रत्यक्षतर्फ एक करोड ११ लाख ६८ हजार ३२ मतदाता रहेको निर्वाचनमा ९४.५५ प्रतिशत मत (एक करोड ५ लाख ५९ हजार १७) सदर भएको बताइएको छ।
प्रतिनिधि सभा निर्वाचनमा कुल मतदाता संख्या एक करोड ८९ लाख ३ हजार ६८९ रहेको छ।
काठमाडौँ । उद्योग, वाणिज्य तथा आपूर्ति मन्त्रालयले पेट्रोलमा १० प्रतिशत इथानोल मिश्रण गरी प्रयोग गर्न पाइने आदेश २०८२ सालको राजपत्रमा प्रकाशित गरेको छ।
मन्त्रालयले बिहीबार राजपत्रमार्फत सूचना प्रकाशित गर्दै पेट्रोलमा इथानोल मिसाउने बाटो औपचारिक रूपमा खुला गरेको हो।
यो निर्णय पुस २१ गते बसेको मन्त्रिपरिषद् बैठकले अनुमोदन गरेको थियो। सरकारले पेट्रोलमा इथानोल मिश्रण गर्नुको उद्देश्य स्वदेशी कच्चा पदार्थ प्रयोग गरेर इथानोल उत्पादन गर्ने उद्योग प्रवर्द्धन गर्नु, रोजगारी सिर्जना गर्नु र पेट्रोलको आयात घटाउनु रहेको बताइएको छ।
काठमाडौँ । समानुपातिकतर्फ दलहरूले पाउने सिटको टुंगो लागेको छ । निर्वाचन आयोगले बिहीबार (फागुन २८) समानुपातिक मतका आधारमा सिटको टुंगो लगाएको हो । जसअनुसार ६ दलले समानुपातिक सिट पाएका छन् ।
राष्ट्रिय स्वतन्त्र पार्टी (रास्वपा)ले ५७ सिट पाएको छ । दोस्रो बनेको काँग्रेसले २० सिट प्राप्त गरेको छ । एमालेले १६ सिट पाएको हो छ भने नेपाली कम्युनिष्ट पार्टीले ९सिट पाएको छ ।
श्रम संस्कृति र राप्रपाले समान चार/चार सिट पाए । फागुन २१ गते भएको प्रतिनिधिसभा निर्वाचनमा प्रत्यक्षतर्फको नतिजा सार्वजनिक भइसकेको छ ।
नेपाल आयल निगमले ग्यास सिलिण्डरमा ७.१ किलो एलपी ग्यास भरी प्रति सिलिण्डर आधा रु ९५५ मा बिक्री वितरण गर्ने निर्णय गरेको छ ।
निगमले आज विज्ञप्ति जारी गरी हालको परिस्थितिलाई दृष्टिगत गरी एलपी ग्यासको आपूर्ति तथा वितरण प्रणालीलाई व्यवस्थित बनाइ आम उपभोक्ताको माग बमोजिम ग्यास उपलब्ध हुने अवस्थाको सहजीकरणका लागि निगमले शुक्रबारदेखि लागू हुने गरी अर्को निर्णय नभएसम्म ग्यास सिलिण्डरमा ७.१ किलो एलपी ग्यास भरी प्रति सिलिण्डर आधा मूल्य रु ९५५ मा बिक्री वितरण गर्ने निर्णय भएको जनाएको छ । आम उपभोक्ता वर्गले सोहीअनुसार एलपी ग्यास खरिद गर्न निगमले अनुरोध गरेको छ ।
निगमले निगमले नियमित रुपमा माग अनुरूप नै एलपी ग्यासको आयात तथा वितरण गरिरहेको भए पनि विगत दुई/तीन महिनादेखि काठमाडौँ उपत्यकामा ग्यासको माग उच्च देखिएको र यसैबीच मध्यपूर्व क्षेत्रमा भइरहेको युद्धका कारण पेट्रोलियम पदार्थ तथा एलपी ग्यासको आपूर्तिमा विश्वव्यापी रूपमा असर परिरहेको प्रष्ट पारेको छ ।
धनुषा क्षेत्र नम्बर १ मा राष्ट्रिय स्वतन्त्र पार्टीका उम्मेदवार किशोरी साह कमलको नाम कालोसूचीमा रहेको भन्दै निर्वाचन आयोगले गरेको उम्मेदवारी खारेज गर्ने निर्णयविरुद्ध सर्वाेच्च अदालतले अन्तरिम आदेश दिएको छ ।
सर्वोच्च अदालतकी न्यायाधीश शारङ्गा सुवेदीको एकल इजलासले साहको नाम कालोसूचीमा रहेको भन्दै उम्मेदवारबाट हटाउने निर्वाचन आयोगको निर्णय कार्यान्वयन नगर्न कारण देखाऊसहित अन्तरिम आदेश दिएको हो ।
साहको नाम कर्जा सूचना केन्द्रले कालोसूचीमा नाम राखेको थियो । त्यहीकारण उनको उम्मेदवारी आयोगले खारेज गरिदिएको थियो ।
साहले गत फागुन १९ गते दायर गरेको रिटमा सुनुवाइ गर्दै सर्वोच्चले बिहीबार उनको नाम उम्मेदवारको सूचीबाट नहटाउन अन्तरिम आदेश जारी गरेको हो ।
धनुषा जिल्ला सबैला नगरपालिका वडा नं. १२ बस्ने साहको उम्मेदवारी खारेज भएपछिको निर्वाचनमा रास्वपाको घण्टी चुनाव चिह्नमा करिब २३ हजार मत खसेको थियो ।
तर आयोगले साहको उम्मेदवारी खारेज भइसकेकाले १० हजार मत ल्याएका नेपाली कम्युनिस्ट पार्टीका मातृकाप्रसाद यादवलाई विजयी घोषित गरेर प्रमाण पत्र पनि दिएको छ। उनलाई बिहीबार मात्रै आयोगले आफ्नो वेबसाइटमा विजयी घोषित गरेको छ।
एमाले केन्द्रीय सदस्य एवं कास्की इन्चार्ज कृष्ण थापाको बिहीबार निधन भएको छ ।
पोखरा-९ शान्तिवनस्थित जिल्ला पार्टी कार्यालयमा बैठकमा बोल्ने क्रममा एक्कासि ढलेपछि उनलाई मणिपाल अस्पताल पुर्याइएको थियो ।
कास्की-१ को निर्वाचनको समीक्षा बैठकलाई १० मिनेट सम्बोधन गरेपछि उनी हृदयाघात भई ढलेका थिए । उनलाई तुरुन्तै मणिपाल अस्पताल लगिएकामा चिकित्सकले मृत घोषित गरेको अस्पताल स्रोतले जनाएको छ ।
हालै सम्पन्न प्रतिनिधिसभा निर्वाचनको प्रचार अभियानका क्रममा राजनीतिक दल र उम्मेदवारहरूले सामाजिक सञ्जाल, विशेषगरी मेटा प्लेटफर्म अन्तर्गतको फेसबुकमा ठूलो रकम खर्च गरेको देखिएको छ।
मेटाको एड लाइब्रेरीको तथ्यांकअनुसार नेपालबाट पछिल्लो ९० दिनमा फेसबुक विज्ञापनमा करिब १ लाख ५ हजार ८३२ अमेरिकी डलर खर्च भएको छ। नेपाल राष्ट्र बैंकको विनिमयदरअनुसार यो रकम करिब १ करोड ५५ लाख रुपैयाँभन्दा बढी बराबर हो। यस अवधिमा फेसबुकमा ९ हजार ७९ वटा राजनीतिक विज्ञापन प्रकाशित भएका छन्।
तथ्यांकअनुसार ‘मेरो आवाज काउन्ट’ नामक पेजले सबैभन्दा बढी करिब ४ हजार ४२३ डलर खर्च गरेको देखिन्छ। यस्तै अजय क्रान्ति शाक्य ले करिब ४ हजार ४३ डलर खर्च गरेका छन्।
यसैबीच विभिन्न दलका उम्मेदवारहरूले लाखौँ रुपैयाँ फेसबुक प्रचारमा खर्च गरे पनि धेरैजसो उम्मेदवारहरू चुनावमा पराजित भएका छन्।
समाजशास्त्रीय अर्थशास्त्री देवेन्द्र गौचन का अनुसार डिजिटल माध्यमको पहुँच बढेसँगै चुनावी प्रचारमा सामाजिक सञ्जालको प्रयोग तीव्र हुँदै गएको छ, तर यसले विदेशी मुद्राको बाहिरिने प्रवृत्ति पनि बढाइरहेको छ।
काठमाडौं । राष्ट्रिय प्रजातन्त्र पार्टी (राप्रपा) का नेता कमल थापाले रास्वपा र बालेन शाह नेतृत्वमा बन्ने सम्भावित सरकारलाई संविधान संशोधनमार्फत नेपाललाई हिन्दूराष्ट्र बनाउने प्रतिबद्धता जनाए समर्थन गर्ने बताएका छन् ।
बिहीवार सामाजिक सञ्जाल फेसबुकमा स्टाटस लेख्दै थापाले संसदमा दुईतिहाइ बहुमतका लागि उक्त सरकारलाई दुई सिट कम रहेको उल्लेख गरेका छन् ।
उनले सरकार संविधान संशोधन गरेर धार्मिक स्वतन्त्रता र समानतासहितको हिन्दूराष्ट्र स्थापना गर्न तयार भए रास्वपाका पाँच सांसदहरूको पूर्ण सहयोग रहने बताएका हुन् ।
थापाले लेखेका छन,‘यदि प्रस्तावित सरकारले हिन्दूराष्ट्र पुनःस्थापना गर्ने विषयमा स्पष्ट प्रतिबद्धता जनाउँछ भने राप्रपा संसदमा संविधान संशोधनका लागि आवश्यक समर्थन दिन तयार रहनेछ ।’
नेपालमा राजसंस्था र हिन्दूराष्ट्रको पक्षमा आवाज उठाउँदै आएको राप्रपाले यसअघिदेखि नै संविधान संशोधनमार्फत देशलाई पुनः हिन्दूराष्ट्र बनाउने माग गर्दै आएको छ ।
काठमाडौं । मकवानपुरको मनहरीमा झैझगडा र लागुऔषध सेवनको विवाद नियन्त्रण गर्न पुगेको प्रहरी टोलीमाथि नै साङ्घातिक आक्रमण भएपछि स्थिति तनावपूर्ण बनेको छ । भीडलाई नियन्त्रणमा लिन र आत्मरक्षाका लागि प्रहरीले गोली चलाउँदा एक जना घाइते भएका छन् भने आक्रमणबाट एक प्रहरी अधिकारी समेत चोटपटक लागेको छ ।
जिल्ला प्रहरी कार्यालय मकवानपुरका अनुसार बुधबार राति करिब ८ बजे मनहरी गाउँपालिका-१, मकरीमा लागुऔषध सेवन गरी केही युवाहरूबीच गम्भीर झैझगडा भइरहेको विशेष सूचना प्राप्त भएको थियो । सोही सूचनाका आधारमा प्रहरी सहायक निरीक्षक (असई) दिलबहादुर तामाङको नेतृत्वमा एउटा टोली घटनास्थल पुगेको थियो ।
घटनास्थलमा प्रहरीले सोधपुछ र स्थिति शान्त पार्ने प्रयास गरिरहेकै अवस्थामा उच्छृङ्खल समूहले अचानक प्रहरी टोलीमाथि नै बियरको बोतल, खुकुरी र बन्चरो प्रहार गरेको जिल्ला प्रहरी कार्यालय मकवानपुरका सूचना अधिकारी डिएसपी पुष्कर बोगटीले जानकारी दिए । आक्रमणबाट असई तामाङ घाइते भएपछि उनले आत्मरक्षाका लागि एक राउण्ड गोली चलाएका थिए ।
प्रहरीले चलाएको गोली लागेर हेटौंडा उपमहानगरपालिका-१२, हात्तीगौडा बस्ने १९ वर्षीय सनिस तितुङ घाइते भएका छन् । उनको पेटमा गोली लागेको छ । आक्रमणमा परी मध्यम घाइते भएका असई तामाङ र गोली लागेका तितुङ दुवैको हाल हेटौंडास्थित सिएमसी चुरेहिल अस्पतालमा उपचार भइरहेको छ ।
घटनाको जानकारी पाएलगत्तै डिएसपी बोगटीकै कमाण्डमा थप प्रहरी टोली घटनास्थल पुगेको थियो । उक्त टोलीले आक्रमणमा संलग्न रहेको आरोपमा हेटौंडा-१२ रमनटारका २४ वर्षीय सन्जय जिम्बा र ३५ वर्षीय अजय थिङलाई तत्कालै नियन्त्रणमा लिएको छ ।
प्रहरीको प्रारम्भिक अनुसन्धानका क्रममा पक्राउ परेका दुई जना र घाइते भएका तितुङ गरी तीनै जनाको पृष्ठभूमि आपराधिक रहेको पाइएको छ । उनीहरू यसअघि पनि लागुऔषध कारोबार, ज्यान मार्ने उद्योग र चोरी जस्ता गम्भीर आपराधिक क्रियाकलापमा संलग्न रहेको डिएसपी बोगटीले बताए । पक्राउ परेकाहरूमाथि थप कानुनी कारबाहीको प्रक्रिया अगाडि बढाइएको प्रहरीले जनाएको छ ।
पूर्वप्रधानमन्त्री तथा नेकपा एमालेका अध्यक्ष केपी शर्मा ओलीले हालैको निर्वाचनको परिणाम अपेक्षा अनुरूप नआएको स्वीकार गर्दै जनताको निर्णयलाई सम्मान गर्ने बताएका छन् ।
सामाजिक सञ्जाल फेसबुकमार्फत प्रतिक्रिया दिँदै ओलीले यसपटक आफूले अपेक्षा गरेजस्तो परिणाम प्राप्त गर्न नसकेको र पार्टीले पनि अपेक्षित सफलता हासिल गर्न नसकेको उल्लेख गरेका छन् ।
उनले लोकतन्त्रमा अन्तिम निर्णय जनताकै हुने भन्दै त्यसलाई शिरोधार्य गर्नु आफ्नो तथा पार्टीको कर्तव्य भएको बताएका छन् ।
ओलीले निर्वाचनमा सूर्य चिन्हमा मतदान गरी आफ्नो पक्षमा उभिएका सम्पूर्ण मतदाता, नेता, कार्यकर्ता, स्वयंसेवक, शुभेच्छुक र समर्थकप्रति आभार व्यक्त गरेका छन् । उनीहरूले देखाएको विश्वास र साथ नै पार्टीको मुख्य शक्ति भएको उनले उल्लेख गरेका छन् ।
उनले निर्वाचन परिणाम पक्षमा नआए पनि जनताप्रतिको प्रतिबद्धता र सेवाभाव कमजोर नहुने स्पष्ट पारेका छन् । आगामी दिनमा पनि जनताकै बीचमा रहेर जनताकै हितमा काम गर्दै विश्वासको सम्बन्धलाई अझ बलियो बनाउँदै अघि बढ्ने प्रतिबद्धता ओलीले व्यक्त गरेका छन् ।
