काठमाडौं । नेकपा एमालेका सचिव महेश बस्नेतविरुद्ध शोभा पाठकले दिएको रिट उच्च अदालतले खारेज गरेको छ। पाठकले बस्नेतविरुद्ध जबरजस्ती करणको आरोप लगाउँदै मुद्दा दायर गरेकी थिइन्।

उच्च अदालतका न्यायाधीश सोमकान्त मैनाली र केशव अधिकारीको संयुक्त इजलासले पाठकको रिट खारेज गर्दै जिल्ला सरकारी वकिल काठमाडौंको निर्णय सदर गरेको हो।

पाठकले जिल्ला प्रहरी परिसरमा बस्नेतविरुद्ध उजुरी दिएकी थिइन्। उनको रिटमा दाबी नपुगेको भन्दै मुद्दा नचलाउने निर्णय गरेको थियो। सो निर्णयविरुद्ध पाठक उच्च अदालत गएकी थिइन्। उच्चको यो फैसलासँग महेश बस्नेतविरुद्ध शोभा पाठकको आरोप खारेज भएको छ।

रिट खारेज गर्ने अदालतले आदेश दिएसँगै बस्नेतले विगत तीन वर्षदेखि दिँदै आएको दुःख आजबाट अन्त्य भएको बताएका छन्।

उनले भनेका छन्, ‘झुटा मुद्दा र बनावटी विवरण पेस गरेर राजनीतिक आग्रह बोकेका केही व्यक्तिहरूको उक्साहटमा ममाथि लगाइएका आरोपहरू पहिलो पटकमै खारेज भएका थिए। त्यसपछि पूरक जाहेरीका नाममा गरिएको दोस्रो प्रयास पनि उच्च अदालत पाटनबाट खारेज भएको छ।’

उनले आफ्नो चरित्रहत्या गर्ने र परिवारलाई समेत अनावश्यक दुःख दिइएको गुनासो गरेका छन्। गृहमन्त्री सुधन गुरुङको निर्देशनमा गिरफ्तारको दुष्प्रयास समेत भएको भन्दै यी सम्पूर्ण घटनाकाविरुद्ध कानुनी उपचार खोज्ने बताएका छन्।

काठमाडौं । ऊर्जा, जलस्रोत तथा सिँचाइ मन्त्री विराजभक्त श्रेष्ठले अलपत्र परेका तथा रुग्ण अवस्थामा रहेका आयोजनाहरूको पुनरावलोकनका लागि समिति गठन गरेका छन् ।

मन्त्री श्रेष्ठले मन्त्रालयका सहसचिव डा. महेश्वर श्रेष्ठको संयोजकत्वमा ८ सदस्यीय अध्ययन समिति गठन गरेका हुन् ।

उक्त समितिलाई ३० दिनभित्र आयोजनाहरूको औचित्य, बजेट व्यवस्थापन, जग्गा अधिग्रहण, वातावरणीय प्रभाव मूल्याङ्कनलगायतका विषयमा देखिएका समस्या पहिचान गरी समाधानका ठोस सिफारिससहित प्रतिवेदन पेश गर्न कार्यादेश दिइएको छ ।

मन्त्रालयका प्रवक्ता सन्दीप कुमार देवका अनुसार सरकारको शासकीय सुधार सम्बन्धी एक सय बुँदे कार्यसूचीलाई प्रभावकारी रूपमा कार्यान्वयन गर्न र मन्त्रालयको कार्य सम्पादनलाई नतिजामुखी, पारदर्शी एवं जबाफदेही बनाउन यस्तो समिति गठन गरिएको हो ।

लामो समयदेखि अलपत्र परेका, रुग्ण अवस्थामा रहेका र समयमा सम्पन्न हुन नसकेका आयोजनाहरूको पुनरावलोकन गर्न बनेको अध्ययन टोलीलाई ३० दिनभित्र आयोजनाहरूको औचित्य, बजेट व्यवस्था, जग्गा अधिग्रहण र वातावरणीय प्रभाव मूल्याङ्कन लगायतका समस्या समाधानका लागि ठोस सिफारिस सहितको प्रतिवेदन पेश गर्ने भनिएको छ ।

गृहमन्त्री सुधन गुरुङ ले सर्वसाधारणका गुनासा प्रत्यक्ष सुन्ने उद्देश्यले मन्त्रालयमै बोलाएर समस्या सुन्ने पहल गरेका छन्। विशेषगरी गाउँ–गाउँबाट आएका नागरिकहरूले आफ्ना पीडा र समस्या गृहमन्त्रीसमक्ष राखेका थिए।

गुनासा राख्ने क्रममा अधिकांश सर्वसाधारणले न्याय पाउन अझै कठिन रहेको बताएका छन्। उनीहरूले शक्ति र पहुँचकै भरमा अन्याय सहनुपर्ने अवस्था रहेको भन्दै सरकारको ध्यानाकर्षण गराएका छन्।

कार्यक्रममा सहभागी नागरिकहरूले गृहमन्त्री गुरुङलाई भेट्न पाएकोमा खुसी व्यक्त गर्दै विगतका अनुभवसमेत सुनाएका थिए। एक सर्वसाधारणले भने, “धेरै गृहमन्त्रीहरू बने, तर तपाईँजस्तो हामीजस्ता सर्वसाधारणको गुनासो सुन्ने व्यक्ति पाउन सकेनौँ। हाम्रो कुरा सुन्नुभएकोमा धन्यवाद।”

गृहमन्त्री गुरुङले नागरिकका गुनासालाई गम्भीरतापूर्वक लिँदै आवश्यक पहल गर्ने प्रतिबद्धता व्यक्त गरेका छन्। उनले राज्यको सेवा सबै नागरिकसम्म पुग्ने गरी काम गर्ने र अन्यायमा परेकालाई न्याय दिलाउनेतर्फ आफू प्रतिबद्ध रहेको बताएका छन्।

काठमाडौँ । प्रधानमन्त्री वालेन्द्र साहले मधेस प्रदेशबाट प्रतिनिधिसभामा प्रतिनिधित्व गर्ने सांसदसँग छलफल गरेका छन् । प्रधानमन्त्री तथा मन्त्रिपरिषद्को कार्यालय, सिंहदरबारमा बुधबार भएको छलफलमा प्रधानमन्त्री साहले सम्बन्धित जिल्ला र क्षेत्रमा तत्काल गर्नुपर्ने कामका विषयमा सुझाव लिएका थिए ।

जिल्ला र क्षेत्रमा तत्काल गर्नुपर्ने कामका विषयमा प्रधानमन्त्रीलाई सुझाव दिएको छलफलमा सहभागी सांसद मनिष झाले जानकारी दिए । उनले भने,’स्वास्थ्य, शिक्षा, पूर्वाधार, भौतिक निर्माण, सिँचाइ, कृषि आदि विषयमा तत्काल र दीर्घकालीनरुपमा गर्नुपर्ने विषयमा प्रधानमन्त्रीसंग छलफल भयो ।’

प्रधानमन्त्री साहले यसअघि कोशी, कर्णाली र सुदुरपश्चिम प्रदेशका सांसदसँग छलफल गरिसकेका छन् ।

नेकपा (एमाले) समर्थक जेनजी अमिशा पराजुलीले सामाजिक सञ्जालमा उनको चरित्र हत्या गर्ने व्यक्तिहरू विरुद्ध भोटाहिटीस्थित नेपाल प्रहरीको साइबर ब्युरोमा उजुरी दिइन्।

पार्टी अध्यक्ष केपी शर्मा ओली पक्राउको विरोधमा अभिव्यक्ति दिएपछि उनलाई अमानवीय रूपमा गालीगलौज र बलात्कारको धम्की दिइएको थियो। उनले आफ्नो भिडियो दुरुपयोग गरी कमेन्टमा गालीगलौज गर्ने र धम्की दिने सबैविरुद्ध उजुरी दिएको जानकारी दिइन्।

उनको भनाइ अनुसार, उनले केही गलत काम नगरेको र केही पनि गलत कुरा नबोलेको भए पनि सामाजिक सञ्जालमा नकारात्मक प्रतिक्रिया प्राप्त भएको छ। अमिशाले भनिन्, ‘मेलै बोलेको भिडियोको दुरुपयोग गर्ने तथा सामाजिक सञ्जालमा गालीगलौज गर्ने र बलात्कारको धम्की दिने सबैविरुद्ध साइबर ब्यूरोमा उजुरी हालेका छौँ।’

अमिशाले ओलीको पक्राउलाई असंवैधानिक भन्दै अभिव्यक्ति दिएकी थिइन्, जसपछि उनीमाथि सामाजिक सञ्जालमा अमानवीय तवरको गालीगलौज र साइबर बुलिङ भइरहेको छ।

काठमाडौं । अमेरिकाले नेपाल भ्रमण गर्ने आफ्ना नागरिकका लागि जारी गर्दै आएको ‘ट्राभल एड्भाइजरी’ को जोखिम स्तर घटाएको छ । नयाँ सरकार गठन भएसँगै अमेरिकाले नेपालको सुरक्षा स्थितिमा सुधार आएको भन्दै जोखिम स्तरलाई (लेभल २) मा झारिएको जनाएको छ ।

अद्यावधिक गरिएको एड्भाइजरीमा सन् २०२५ को सेप्टेम्बरदेखि सुरु भएका देशव्यापी प्रदर्शनहरू हाल रोकिएको र समग्र सुरक्षा स्थिति स्थिर रहेको उल्लेख गरिएको छ। यद्यपि, विशेषगरी सहरी क्षेत्रहरूमा पूर्वसूचना विना नै अचानक प्रदर्शन र स्थानीय अशान्तिहरू अझै पनि हुन सक्ने र ती छिट्टै हिंसात्मक बन्न सक्ने सम्भावना रहेकोतर्फ अमेरिकी सरकारले आफ्ना नागरिकलाई सचेत गराएको छ।

यस्ता सम्भावित जोखिमबाट बच्न ठूला भिडभाडबाट टाढा रहन र स्थानीय अधिकारीहरूको निर्देशन कडाइका साथ पालना गर्न सुझाव दिएको छ ।

प्रतिनिधिसभाको सभामुखको निर्वाचन यही चैत २२ गते हुने भएको छ ।

मंगलबार सिंहदरबारमा बसेको सर्वदलीय बैठकमा, सभामुख निर्वाचनका लागि पर्सि २० गते गर्नेगरी प्रस्ताव गरिएको रास्वपा सांसद खुश्बु ओलीले जानकारी दिइन् ।

‘मनोनयन दर्ता पर्सिका लागि हुने कुरा भएको छ । निर्वाचन चाहीँ २२ गते गरेर सोही दिन पदवाहली पनि गर्ने कुरा भएको छ,’ ओलीले सर्वदलीय बैठकपछि भनिन् ।

आज अप्रिल १ अर्थात् ‘अप्रिल फुल’ । कसैलाई झुक्याउँदा वा मूर्ख बनाउँदा नराम्रो नमानिने दिन।

आजका दिन धेरैले एकअर्कालाई झुक्याउँछन् र जिस्क्याउँछन् । अन्य दिन जसरी मजाक गर्ने वा झुक्याउने व्यक्तिसँग आज कोही रिसाउँदैन । यही नै यो दिनको विशेषता हो ।

अरुले त आज अप्रिल फुल मनाउँछन् नै। प्रहरीले पनि मनाएको छ। नेपाल प्रहरीले आफ्नो आधिकारिक फेसबुक पेजमा क्युआर कोडसहित आज एउटा पोष्ट राखेको छ। पोष्टमा भनिएको छ- तपाईं विरुद्ध कतै कुनै उजुरी परेको त छैन ? सुनिश्चित गर्नको लागि एकपटक क्युआर कोड स्क्यान गर्नुहोस्।

आफूविरुद्ध कसैले उजुरी हालेको पो छ कि भनेर सबैलाई जिज्ञासा हुनु स्वाभाविक हो। त्यसैले मानिसहरुले धमाधम क्युआर कोड स्क्यान गरिरहेका छन् ।

स्क्यान गर्दा बल्ल थाहा हुन्छ- प्रहरीले त अप्रिल फुल पो मनाएको रहेछ । स्क्यान गरेपछि यस्तो म्यासेज आउँछ-
APRIL FOOL
तपाईंले स्क्यान गर्नुभएको क्युआर कोड सचेतना अभियानको लागि हो। आज हामीले मजाक गरेका थियौं तर भोलि यस्तै क्युआरबाट तपाईं स्क्याममा पनि पर्न सक्नुहुन्छ।
याद गर्नुस्
– आफूले नचिनेको व्यक्ति वा अज्ञात स्रोतबाट प्राप्त भएको क्युआर कोड स्क्यान नगर्नुस्
– आफूसँगै आफ्नो परिवारका सदस्यहरुलाई पनि सम्झाउनुस्
– स्क्यान गर्नुअघि सधैं भेरिफाइ गर्नुस्
– सुरक्षित रहनुस्

 आज विश्व मूर्ख दिवस मनाइँदै छ । आज अप्रिल १ तारिख अर्थात ‘विश्व मूर्ख दिवस’ नेपालसहित विश्वभर अरूलाई मुर्ख बनाएर मनाइँदै छ । 

आज नेपालमा मात्र नभइ संसारभरका मानिसहरूले अरुलाई फूल अर्थात् ‘मूर्ख’ बनाउने गर्दछन् । ‘विश्व मूर्ख दिवस’ प्रत्येक वर्ष १ अप्रिल (चैत्र १९) मा मनाइने गरिन्छ ।

पहिले यो दिवस फ्रान्स र अन्य युरोपेली देशहरूमा मनाइने गरिए पनि बिस्तारै अन्य देशहरूले पनि यो दिवस मनाउन थालेका हुन् । यो दिन एकअर्कासँग रमाइलो गरेर मनाइन्छ ।

काठमाडौं । आजदेखि सपना प्रधान मल्ल सर्वोच्च अदालतकाे कायम मुकायम (कामु) प्रधानन्यायाधीश भएकी छन् ।

प्रधानन्यायाधीश प्रकाशमानसिंह राउत ६५ वर्षे उमेर हदले मंगलबार अवकाश भएपछि वरिष्ठ अधिवक्ता एवं पहिलो संविधानसभा सदस्य मल्लले कामु प्रधानन्यायाधीशको जिम्मेवारी सम्हालेकी हुन् ।

नेपालको संविधानको धारा १२९(९) मा प्रधानन्यायाधीशको पद रिक्त भएमा सर्वोच्च अदालतको वरिष्ठतम न्यायाधीशले कायममुकायम प्रधानन्यायाधीशको जिम्मेवारी सम्हाल्ने उल्लेख छ । प्रधानन्यायाधीश अवकाश भएपछि वरिष्ठतम न्यायाधीश स्वतस् कामु प्रधानन्यायाधीश हुने व्यवस्था छ ।

मल्ल १७ साउन २०७३ मा सर्वोच्च अदालतको न्यायाधीश भएकी थिइन् । उनले सर्वोच्च अदालतमा करिब एक दशक कार्यरत रहँदा लैंगिक न्याय, लैंगिक एवं घरेलु हिंसा एवं संवैधानिक मामिला जोडिएका कैयौँ मुद्दामा दूरगामी असर पार्ने नजिर प्रतिपादन गरेकी छन् ।