राष्ट्रपति रामचन्द्र पौडेलले प्रतिनिधिसभाका सचिव हर्कराज राईलाई पदमुक्त गरेका छन् । सभामुख डोलप्रसाद अर्यालको सिफारिस अनुसार राष्ट्रपति पौडेलले हर्क राईलाई पदमुक्त गरेका हुन् ।

राष्ट्रपति कार्यालयद्वारा जारी विज्ञप्ति अनुसार संघीय संसद्का महासचिव, प्रतिनिधिसभाका सचिव तथा राष्ट्रियसभाका सचिवको पारिश्रमिक, सेवाको सर्त र सुविधा सम्बन्धी ऐन, २०७५ को दफा ६ को खण्ड (ङ) बमोजिम राईलाई पदमुक्त गरिएको हो ।

सचिव राईलाई मंगलबारदेखि नै लागू हुने गरी पदबाट हटाइएको व्यहोरा राष्ट्रपति कार्यालयका प्रवक्ता रितेशकुमार शाक्यद्वारा हस्ताक्षरित विज्ञप्तिमा उल्लेख छ।

राष्ट्रिय प्रजातन्त्र पार्टी (राप्रपा) का संसदीय दलका नेता ज्ञानबहादुर शाहीले सरकारले आतंकवादी गतिविधि गरिरहेको आरोप लगाएका छन् ।

मङ्गलवार प्रतिनिधि सभा बैठकमा सरकारले प्रस्तुत गरेको आगामी आर्थिक वर्षको नीति तथा कार्यक्रममाथिको छलफलमा भाग लिँदै उनले सुकुम्वासी बस्तीमा डोजर चलाउने सरकार आतंकवादी हो कि होइन ? भन्ने प्रश्न समेत गरे ।

नेता शाहीले सरकारले सुकुम्वासी बस्तीमा नभई हुकुमवासीहरूको मानसिकतामा प्रहार गर्नुपर्ने आवश्यकता पनि औँल्याए । सुकुम्वासीहरूको नाममा हुकुम्वासीहरुले गरेका गलत काममा सरकारले मौनता साधेको भन्दै उनको आपत्ति थियो ।

नेता शाहीले सरकारले अवैध संरचना हटाउने कुरा सही भएपनि गरिब सुकुम्वासीहरूमाथि डोजर चलाएर मानवीयतामाथि नै प्रहार गर्ने काम गरेको आरोप समेत लगाए ।

पूर्वप्रधानमन्त्री एवं नेपाली कम्युनिष्ट पार्टीका संयोजक पुष्पकमल दाहालले सरकारले विधि, लोकतान्त्रिक मूल्य र संसदीय प्रक्रियाको उल्लङ्घन गरेको आरोप लगाएका छन् ।

प्रतिनिधि सभाको मङ्गलवारको बैठकलाई सम्बोधन गर्दै उनले यस्तो बताएका हुन् ।

उनले संख्याको दम्भमा विधि मिच्ने काम भइरहेको भन्दै जनताको विश्वासलाई विधि सुदृढीकरणतर्फ प्रयोग गर्न सरकारलाई आग्रह गरे । दाहालले सरकारले संसद स्थगित गरेर जनप्रतिनिधिलाई छल्दै अध्यादेशमार्फत शासन चलाउने प्रयास गरेको भन्दै त्यस्तो कार्य स्वीकार्य नहुने बताए । उनले सरकारमाथि आलोचना गर्नेहरूमाथि धरपकड र गिरफ्तारी गर्दै प्रतिशोध साँध्ने काम गरिएको भन्दै आपत्ति जनाए ।

उनले पुराना दल सबै गलत भन्दै आएको सरकार स्वयं स्वेच्छाचारिता र संसद् छल्ने अभ्यासमा लागेको उनको आरोप छ ।

काठमाडौं । माध्यमिक शिक्षा परीक्षा (SEE) को नतिजा सार्वजनिक भएसँगै विद्यार्थीहरू यतिबेला उच्च शिक्षाका लागि कलेज रोज्ने तयारीमा छन् । यही अवसरमा काठमाडौंको सामाखुसीस्थित चर्चित शैक्षिक संस्था तक्षशिला एकेडेमी कलेजले विद्यार्थीहरूका लागि विशेष राहत प्याकेजसहित भर्ना अभियान सुरु गरेको छ । सामाजिक सञ्जालमा समेत निकै चर्चामा रहेको यस कलेजले एसईई उत्तीर्ण विद्यार्थीहरूलाई लक्षित गर्दै धमाधम भर्ना लिन थालेको हो ।

काठमाडौं उपत्यकाभित्रै सबैभन्दा सस्तो र सुलभ शुल्क संरचना रहेको दाबी गर्ने तक्षशिलाले जेहेन्दार विद्यार्थीहरूका लागि स्वर्ण अवसर प्रदान गरेको छ । कलेजले सार्वजनिक गरेको योजना अनुसार ४ जिपिए (4.0 GPA) ल्याउने विद्यार्थीहरूले शतप्रतिशत (१००%) छात्रवृत्तिमा पढ्न पाउनेछन् । यो योजना अनुसार विद्यार्थीले कलेजमा कुनै पनि शुल्क नतिरी पूर्ण रूपमा नि:शुल्क अध्ययन गर्न पाउने कलेज प्रशासनले जनाएको छ । ४ जिपिए बाहेकका अन्य विद्यार्थीहरूले पनि उनीहरूले प्राप्त गरेको जिपिए (GPA) को आधारमा विशेष छात्रवृत्ति पाउने सुनिश्चित गरिएको छ ।

हाल कलेजले विज्ञान (Science), व्यवस्थापन (Management), मानविकी (Humanities) र कानुन (Law) संकायमा भर्ना खुला गरेको छ । आधुनिक शिक्षण पद्धति र अनुभवी प्राध्यापकहरूका कारण चर्चामा रहेको यो कलेजले विद्यार्थीको शैक्षिक गुणस्तर र अनुशासनलाई उच्च प्राथमिकतामा राख्दै आएको छ । काठमाडौंको सामाखुसी, टोखा रोड (खरीबोट) मा अवस्थित यो कलेजमा हाल नयाँ भर्ना हुने विद्यार्थीहरूको निकै उत्साहजनक सहभागिता देखिएको छ ।

आफ्नो भविष्यलाई उज्ज्वल बनाउन र सुलभ शुल्कमा गुणस्तरीय शिक्षा हासिल गर्न चाहने विद्यार्थीहरूले समयमै कलेज भ्रमण गरी भर्ना प्रक्रिया अगाडि बढाउन सक्नेछन् । थप जानकारी वा परामर्शका लागि कलेजको कार्यालयमा सिधै सम्पर्क गर्न वा फोन नम्बरहरू ९८५१०३४९४५ र ०१-४९५४२६९ मा सम्पर्क गरी बुझ्न सकिने कलेजले जनाएको छ ।

नेकपाका संयोजक तथा पूर्वप्रधानमन्त्री पुष्पकमल दाहाल ‘प्रचण्ड’ले ‘हारभन्दा जित सहन गाह्रो हुन्छ’ भन्दै जितमा सम्हालिन सुझाव दिएका छन् । प्रतिनिधिसभाको मंगलबारको बैठकमा उनले ०६४ सालको चुनावमा अहिले रास्वपाले पाएजस्तै मत पाएर पनि जोगाउन नसकेको स्मरण गर्दै प्रचण्डले भने, ‘हारभन्दा जित सहन गाह्रो हुन्छ ।’

प्रचण्डले रास्वपाले जस्तै आफूले धेरै मत ल्याएर भाँडो न भुइँमा भएको नेता भन्दै त्यसो नगर्न सुझाव दिए । ‘२०६४ सालमा तपाईंहरूजस्तै धेरै मत ल्याएर भाँडोमा न भुइँमा भएको नेता म हुँ । हारभन्दा जित सहन गाह्रो हुन्छ,’ उनले भने, ‘करिब तपाईंहरूकै साइजमा थियौँ केही समय पहिले । आफ्नै कमजोरीका कारण जनताको विश्वास बचाउन सकिएन । इतिहासले भनेको छ- संख्या स्थायी हुँदैन ढुक्क हुनुस् । जनताको समर्थन पनि शसर्त हुन्छ ।’

प्रचण्डले पुराना नेता र पुराना पार्टी सबै उस्तै हुन् भन्ने भाष्य सही नभएको बताए । ‘पुराना नेता र पुराना पार्टीका नाममा बनेको एउटा गलत भाष्य छ, सबै उस्तै हुन् । र, त्यसमा प्रचण्डलाई पनि घिसार्न खोजिन्छ । त्यही हो त सत्य ? होइन,’ उनले भने, ‘राष्ट्रिय स्वतन्त्र पार्टीका हकमा त त्यो झन् हुँदै होइन । अघिल्लो संसदमा मैले प्रधानमन्त्रीका रूपमा पनि र प्रमुख विपक्षी दलको नेताका रूपमा पनि रास्वपासँग दह्रो सहकार्य गरेँ । दह्रो सहकार्य ।’

प्रचण्डले त्यसबेला सुशासन, सेवा प्रवाह सरलीकरण, मेरिटोक्रेसी, ललिता निवास जग्गा फिर्ता, भुटानी शरणार्थी प्रकरणको अनुसन्धान र ठूला माफियाविरुद्धको कारबाही गरेको उल्लेख गरे । ‘प्रचण्ड’ले प्रधानमन्त्री वालेन्द्र शाहले मर्यादा पालना नगरे संसद्को गरिमा नहने पनि बताए । ‘प्रधानमन्त्रीजीले केही निश्चित मर्यादा पालन नगर्ने हो भने संसद्को गरिमा रहन सक्दैन,’ उनले भने ।

प्रचण्डले सरकारको वार्षिक नीति तथा कार्यक्रम कर्मकाण्डी र यथास्थितिवादी भएको बताए । प्रचण्डले भने, ‘सरकार गठन भएपछि सरकारले आफ्नो रोडम्याप सार्वजनिक गरेको थियो। तर नीति तथा कार्यक्रमले सत्तारुढ दलको घोषणापत्र, रोडम्याप र राष्ट्रिय संकल्पपत्रको स्पिरिट समात्न सकेको देखिँदैन।’

उनले नीति तथा कार्यक्रम प्रस्तुत गर्ने हतार र परिपाटीप्रति असन्तुष्टि व्यक्त गर्दै भने, ‘जुन हतारोमा नीति तथा कार्यक्रम प्रस्तुत भइरहेको छ र जुन परिपाटी अवलम्बन गरेका छौं त्यसबाट नीति तथा कार्यक्रममाथिको छलफल सधैँ एउटा कर्मकाण्ड मात्रै बन्न पुगेको छ।’ सम्बोधनका क्रममा संयोजक प्रचण्डले मधेसी जनताको सपनाहरूको जगमा यो सरकार बनेपनि सिँगो नीति तथा कार्यक्रममा मधेसप्रति मौन रहेको बताए।

उनले भने, ‘सत्तारुढ दलका सभापति रवि लामिछानेले दलित समुदायमाथि राज्यका तर्फबाट क्षमा माग्नुभयो। तर त्यो क्षमा सरकारको नीति तथा कार्यक्रममा कहिँ कतै प्रकट हुन सकेन। सरकार दलित समुदायका सवालमा विगतका यथास्थितिवादी सरकारहरूभन्दा पनि प्रतिगामी बन्न पुगेको छ।’ उनले दलित विकास प्राधिकरणको आवश्यकता, रैथाने सीपको प्रवर्द्धन र विशेषाधिकार नीतिलाई नीति तथा कार्यक्रमले सम्बोधन नगरेको बताए।

नेपाली कांग्रेसका संसदीय दलका नेता भीष्मराज आङ्देम्बेले प्रधानमन्त्री बालेन साहले संसदमा देखाएको व्यवहारको आलोचना गर्दै स्वास्थ्य परीक्षण गर्न माग गरेका छन् ।

मंगलबारको प्रतिनिधिसभा बैठकमा आङ्देम्बेले प्रधानमन्त्रीको व्यवहारलाई अमर्यादित भन्दै आलोचना गरे पनि स्वास्थ्य समस्या भएको हुन सक्ने बताए । उनले भने, ‘सामाजिक सञ्जालमा लाखौँले लेखेजस्तो अमर्यादित व्यवहार प्रधानमन्त्रीले देखाउनुभयो भनेर म सोझै भन्न चाहन्न यस्तो पनि हुन सक्छ, कि अचानक उहाँको स्वास्थ्य स्थिति गम्भीर बनेकोले उहाँ हिँड्नु भएको होला। त्यसैले म सरकारलाई आग्रह गर्दछु, उहाँको स्वास्थ्यमा अचानक कुनै प्रतिकुल अवस्था बनेको हो भने भएको के हो अविलम्ब स्वास्थ्य परीक्षण गरेर संसदलाई जानकारी गराइयोस् !’

उनले आह्वान भइसकेको अधिवेशन एकाएक स्थगन गरेर डेढ सयभन्दा बढी कानुन अध्यादेशमार्फत ल्याउनु संसदीय गरिमा र लोकतान्त्रिक मूल्यमाथिको प्रहार भएको बताए । उनले यस्तो प्रवृत्तिले सिर्जना गर्ने दूरगामी असर भयावह हुनसक्ने बताए ।

प्रमुख प्रतिपक्ष दल नेपाली काँग्रेसले राष्ट्रपति रामचन्द्र पौडेलले सरकारको नीति तथा कार्यक्रम प्रस्तुत गरिरहँदा संसद् बैठक बाहिर निस्किएको घटनाबारे तत्काल जवाफ दिन प्रधानमन्त्री बालेन्द्र साहसँग माग गरेको छ ।

मङ्गलवार बसेको प्रतिनिधिसभा बैठकको सुरुमा नै बोल्दै उक्त पार्टीकी प्रमुख सचेतक बासना थापाले प्रधानमन्त्री साहले संवैधानिक संस्कार, संसदीय परम्परा विपरीत गैरजिम्मेवार ढंगले राष्ट्रपति जस्तो गरिमामय पदको समेत अपमान हुनेगरी बैठक कक्षबाट बाहिरिएको घटना लोकतान्त्रिक संसदीय इतिहासमा नै विरलै घटने घटनाको रूपमा चित्रण गर्दै तत्सम्बन्धीमा तत्काल संसदमा जवाफ दिन माग गरिन् ।

उनले प्रधानमन्त्री साहलाई संवैधानिक पदको सम्मान गर्न, संसदीय परम्परालाई कमजोर नबनाउन र भविष्यमा यस्ता घटनाको पुनरावृत नगर्न पनि सचेत गराइन् । प्रमुख सचेतक थापाले संवैधानिक पदहरूको मर्यादाको ख्याल गरेर अघि बढ्न पनि प्रधानमन्त्री साहको ध्यानाकर्षण गराइन् ।

उनले भनिन् ‘लोकतान्त्रिक संसदीय इतिहासमा सायद विरलै देखिने दृश्य हिजो हामीले देख्यौ । सम्माननीय राष्ट्रपतिज्यूबाट सरकारको नीति तथा कार्यक्रम प्रस्तुत भई रहँदा सम्माननीय प्रधानमन्त्रीज्यू सदनबाट बाहिरिनु यो केवल एउटा सामान्य दृश्य मात्रै होइन, यो संवैधानिक संस्कार, संसदीय परम्परा, सरकारको गैरजिम्मेवार हो भन्ने हामीलाई लागिराखेको छ । त्यसैले म सरकारलाई आग्रह गर्न चाहन्छु–यस विषयमा तत्काल स्पष्ट जवाफ दिइयोस् । संवैधानिक पदको सम्मान गरियोस् । संसदीय परम्परालाई कमजोर नबनाईयोस । र, भविष्यमा यस्ता घटनाको पुनरावृत नहोस् । लोकतन्त्रमा पद भन्दा ठुलो मर्यादा भन्दा ठुलो जनविश्वास हो भन्ने कुरामा ध्यान जाओस् । प्रतिपक्ष दलको तर्फबाट सम्माननीय सभामुखमार्फत सम्माननीय प्रधानमन्त्रीज्यूको जवाफको माग गर्दछु ।’

प्रमुख सचेतक थापाले पदभन्दा ठुलो मर्यादा र मर्यादा भन्दा ठुलो जनविश्वास हो भन्ने तथ्यलाई स्वीकार गरेर अघि बढ्न पनि प्रधानमन्त्री साहलाई सुझाव दिइन् ।

सप्तरी प्रहरीले अपहरण, शरीर बन्धक तथा अपमानजनक व्यवहारसम्बन्धी मुद्दामा संलग्न रहेको आरोपमा एक जनालाई पक्राउ गरेको छ।

जिल्ला प्रहरी कार्यालय सप्तरीका अनुसार पक्राउ पर्नेमा महादेवा गाउँपालिका–१ घर भई हाल राजविराज नगरपालिका–३ बस्दै आएका २७ वर्षीय मुस्तकिम मियाँ छन्। उनी बहालवाला श्रम, रोजगार तथा सामाजिक सुरक्षा मन्त्री रामजी यादवको सचिवालयमा चालकको नियुक्ति पाएका युवा हुन् ।

उनलाई सोमबार राजविराज नगरपालिका–८ क्षेत्रबाट पक्राउ गरिएको प्रहरीले जनाएको छ।

प्रहरीका अनुसार मुस्तकिम मियाँसहितको समूहले एक युवकलाई अपहरण गरी सुनसान स्थानमा लगेर शरीर बन्धक बनाएको, कुटपिट गरेको तथा कपडा खोली नग्न बनाई भिडियोसमेत बनाएको आरोप छ।

घटनापछि फरार रहेका प्रतिवादीको खोजतलास गर्ने क्रममा उनलाई पक्राउ गरिएको प्रहरीले जनाएको छ। उनलाई जिल्ला सरकारी वकिल कार्यालय सप्तरीमार्फत सप्तरी जिल्ला अदालतबाट सात दिनको म्याद थप गरी थप अनुसन्धान भइरहेको प्रहरीको भनाइ छ।

उनीसहित चारजनाले एक युवकलाई अपहरण गरी नग्न बनाएर कुटपिट, मानसिक तथा शारीरिक यातना दिएको आरोपमा प्रहरीले पक्राउ पूर्जी जारी गर्न जिल्ला अदालतसँग यही वैशाख २४ गते अनुमति मागेको थियो ।

जिल्ला प्रहरी कार्यालय सप्तरीको अपराध अनुसन्धान शाखाले राजुकुमार चौधरीको जाहेरीका आधारमा मुस्तकिम मियाँसहितलाई प्रतिवादी बनाएर अपहरण तथा शरीर बन्धक र अमानवीय व्यवहारसम्बन्धी कसुरमा अनुसन्धान अघि बढाएको थियो ।

प्रहरीका अनुसार मिति २०८२ फागुन १४ गते बिहान करिब ८ बजे राजविराज नगरपालिका–३ हनुमानचोकबाट जाहेरवालालाई मोटरसाइकलमा आएका समूहले बन्दुक देखाएर अपहरण गरेका थिए।

त्यसपछि उनलाई राजविराज–८ स्थित हिमालय राइस मिल पछाडिको सुनसान क्षेत्रमा लगेर कुटपिट गर्नुका साथै शरीरका सम्पूर्ण कपडा खोलेर नग्न बनाइएको आरोप छ।

जाहेरी अनुसार आरोपितहरूले पीडितलाई भुइँमा थुक चाट्न लगाउनुका साथै भोजपुरी गीतमा नचाएर भिडियोसमेत बनाएका थिए।

उनीहरूले पीडितसँग रहेको करिब २२ हजार रुपैयाँ मूल्यको मोबाइल, दुई तोला सुनको सिक्री र नगद १ लाख ३० हजार रुपैयाँ समेत लुटेको आरोप छ।

प्रहरीका अनुसार करिब तीन घण्टासम्म बन्धक बनाएर यातना दिँदै घटना सार्वजनिक गरे भिडियो भाइरल बनाइदिने, ज्यान मार्ने तथा शारीरिक अंग काटिदिने धम्कीसमेत दिइएको जाहेरीमा उल्लेख छ।

प्रहरीले घटनामा संलग्न रहेको आरोपमा सप्तरीका मुस्तकिम मियाँ, मो. जुनेद मियाँ, मो. एकवाल मियाँ र आदित्य कुमार यादवविरुद्ध अदालतबाट पक्राउ पूर्जी जारी गराएर कारबाही थालेको थियो ।

मुस्तकिमलाई मन्त्री यादवले गत चैत २७ गते स्वकीय सचिवालयको हलुका सवारी चालक पदमा कामकाज गर्न नियुक्ति दिएका थिए ।

उनले त्यसबेला तोकिएको जिम्मेवारी इमान्दारी र कर्तव्यनिष्ठापूर्वक सम्पन्न गर्न पनि मुस्तकिमलाई भनेका थिए । मुस्तकिमलाई दिएको नियुक्तिको जानकारी प्रधानमन्त्री तथा मन्त्रिपरिषदको कार्यालयलाई पनि दिइएको थियो ।