२०८३ मंसिर ७ गते आईतवार
२०८३ मंसिर ७ गते आईतवार

नेपाली कांग्रेसको १५ औँ महाधिवेशन नजिकिँदै गर्दा पार्टीभित्र नयाँ नेतृत्व, सांगठनिक पुनर्संरचना र पुस्तान्तरणबारे तीव्र बहस सुरु भएको छ ।

यसैबीच, नेपाल विद्यार्थी संघका पूर्वकेन्द्रीय अध्यक्ष एवं कांग्रेसका केन्द्रीय कार्यसमिति सदस्य नैनसिंह महरले महामन्त्री पदमा आफ्नो सशक्त उम्मेदवारी रहने घोषणा गर्दै अभियान तीव्र पारेका छन् ।
प्रतिनिधिसभा एवं प्रदेशसभा क्षेत्रीय अधिवेशन गृह जिल्ला डडेल्धुरा कांग्रेसले महरलाई सर्वसम्मत रूपमा महामन्त्रीको उम्मेदवारका रूपमा अघि बढाउने निर्णय गरेपछि उनको उम्मेदवारीले औपचारिक र मजबुत राजनीतिक आधार पाएको छ ।

सुदूरपश्चिमको विकटताबाट सुरु भएको राजनीतिक यात्रा २०३१ साल साउन १४ गते डडेल्धुराको भागेश्वर गाउँपालिका–३ लामिकान्डेमा जन्मिएका महरले २०४६ सालको प्रजातान्त्रिक आन्दोलनबाट राजनीतिक यात्रा सुरु गरेका थिए ।

सुदूरपश्चिमको ग्रामीण र विकट परिवेशबाट उठेर विद्यार्थी हकहित र प्रजातन्त्रका लागि भएका हरेक आन्दोलनमा उनी अग्रपंक्तिमा रहे ।

स्ववियु राजनीति हुँदै नेविसंघको सांगठनिक तह चढेका महर २०७३ सालको ११ औँ महाधिवेशनबाट नेविसंघको केन्द्रीय अध्यक्षमा निर्वाचित भएका थिए । २०७३ सालदेखि २०७५ सम्म उनको नेतृत्वमा नेविसंघले क्याम्पसहरूमा डिजिटल शिक्षा, निःशुल्क वाई–फाई, निजी शिक्षण संस्थाको मनपरी शुल्क वृद्धि नियन्त्रण र त्रिविको शैक्षिक क्यालेन्डर नियमित बनाउने जस्ता महत्त्वपूर्ण सुधारका मुद्दाहरूमा देशव्यापी दबाब सिर्जना गरेको थियो ।

नेविसंघको सफल नेतृत्वपछि नेपाली कांग्रेसको १४ औँ महाधिवेशनबाट उनी खुलातर्फ भारी मतका साथ केन्द्रीय सदस्य बने । पार्टीमा उनले केन्द्रीय शिक्षा विभाग प्रमुखको जिम्मेवारी समेत सम्हालिसकेका छन् ।

राजनीतिक सक्रियताका बीच पनि महरले आफ्नो अध्ययनलाई निरन्तरता दिँदै पार्टीभित्र प्राज्ञिक र वैचारिक नेताको छवि बनाएका छन् ।

त्रिभुवन विश्वविद्यालयबाट राजनीतिशास्त्रमा स्नातकोत्तर, कानुनमा स्नातक, तथा राजनीतिशास्त्रमै एम.फिल उत्तीर्ण गरेका महर हाल राजनीतिक अर्थशास्त्रमा विद्यावारिधि अध्ययनरत छन् ।
उनी नेपाल पत्रकार महासंघ डडेल्धुरा शाखाका संस्थापक सभापति हुन् । लोकतान्त्रिक मूल्य, सुशासन र युवा सशक्तीकरणका लागि काम गर्ने संस्था ’स्कूल अफ डेमोक्रेसी’ को नेतृत्व समेत उनले गर्दै आएका छन् ।

वैचारिक विश्लेषकका रूपमा उनका ’शिक्षाका चुनौतीहरू’, ’नेपाली कांग्रेस र भ्रातृ संगठन’, ’अबको कांग्रेस’, ’संकल्प’ र ’काण्डैकाण्ड–महाकाण्ड’ जस्ता पुस्तकहरू प्रकाशित छन् ।
यसका साथै राष्ट्रिय भावनाले ओतप्रोत चेतनामूलक गीतहरू पनि उनले रचना गरेका छन् ।

’नयाँ सोच, डिजिटल कांग्रेस’ १५ औँ महाधिवेशनलाई केवल नेतृत्व छान्ने मेला मात्र नभई कांग्रेस बदल्ने र सुदृढ बनाउने ऐतिहासिक अवसरका रूपमा लिनुपर्ने महरको तर्क छ ।

उम्मेदवारी घोषणासँगै उनले पार्टीको परम्परागत संरचनालाई विस्थापित गरी प्रविधिमा आधारित पारदर्शी र आधुनिक ’डिजिटल कांग्रेस’ बनाउने ।युवाहरूलाई राजनीतिप्रति आकर्षित गर्दै नीति निर्माण र पार्टीका प्रमुख संरचनाहरूमा उनीहरूको सुनिश्चित सहभागिता गराउने । बिपी कोइरालाको प्रजातान्त्रिक समाजवादलाई २१ औँ शताब्दीको आर्थिक समृद्धि, रोजगारी र प्रविधिसँग जोडेर परिमार्जन गर्ने । गुटबन्दी अन्त्य गर्दै सुशासन, पारदर्शी राजनीति र भ्रष्टाचारविरुद्ध शून्य सहनशीलता कायम गर्ने ।लगायतका मुख्य संकल्प अगाडी सारेका छन् ।

डडेल्धुरा कांग्रेसको सर्वसम्मत समर्थन पाएपछि उत्साहित बनेका महर हाल देशव्यापी जिल्ला दौडाहा र प्रदेशस्तरीय राजनीतिक भेटघाटमा व्यस्त छन् । उनले भविष्यको जिम्मेवारी लिने भरोसायोग्य कांग्रेसको निम्ति महामन्त्री पदमा प्रतिष्पर्धा गरेको स्पष्ट पार्दै साथ सहयोग र समर्थनको लागि कांग्रेसजनमा अपिल गरेका छन् ।

विचार, संगठन र पुस्तान्तरणको मुद्दालाई अघि सारेका महरको महामन्त्री पदको दाबेदारीलाई १५औँ महाधिवेशनमा चासोका साथ हेरिएको छ ।

नेपाली कांग्रेसको १५ औं अधिवेशन काठमाण्डौको खुलामंचमा चलिरहेको छ। सभापतिमा गगन थापाको जित अकाट्य जस्तै देखिंदा यता विधान संशोधन गरेर वरिष्ठ उपसभापति देखि महामन्त्री र सह-महामन्त्री सम्म कोटा थपिएका छन्। त्यसमध्य पनि कांग्रेस भित्र शक्तिशाली मानिने महामन्त्री पदमा कसले वाजी मार्छ भन्ने बहस चलेको छ।

तिन महामन्त्री मध्य एउटा नाम शक्तिशाली सम्भावित उम्मेदवारको नामका रुपमा सुनिल शर्माको नाम अहिले सबै भन्दा चर्चामा छ। त्यसो त सुकुम्वासी परिवारमा जन्मिएका डा सुनिल शर्माको जीवनको संघर्षको लामो कथा बन्न सक्छ । स्वास्थ्य सेवा क्षेत्रको टाइकोनको रुपमा आफ्नो परिचय बनाएका सुनिलको राजनीतिक पृष्ठ भूमि र योगदानको विगत पनि राजनैतिक आन्दोलनको रापबाट आएको व्यक्तिका रुपमा समेत परिचित छ । शसस्त्र द्वन्दकालमा गिरिजा प्रसाद कोइराला र प्रचण्डको वार्तालाप गराउने प्रमुख सूत्राधार पात्र भएर डा सुनिलले महत्वपूर्ण भूमिका मात्रै निर्वाहा गरेनन् । राजाको प्रत्यक्ष शासनमा गिरिजा प्रसाद कोइराला र सुजाता कोइरालालाई भारतको नयाँ दिल्ली सम्म लैजाने भूमिकामा समेत सुनिलले नै महत्वपूर्ण भूमिका निर्वाह गरेका थिए । युद्दको आगोको लप्कामा जलिरहेको देशलाई निकास दिन कांग्रेसको सिपाही भएर गिरिजाप्रसाद कोइराला र प्रचण्ड सम्म भेटघाटको चाजोपाजो मिलाएका सुनिलले कहिल्यै नेतृत्वको नजिक भएकै आधारमा राजनैतिक लाभ लिएनन् ।

व्यावसायिक यात्रा संगै काङ्ग्रेसको सक्रिय राजनीतिमा होमिएका सुनिलले २०८९ सालको निर्वाचनमा कांग्रेसबाट सबै भन्दा लोकप्रिय मत सहित मोरङ ३ बाट निर्वाचित भएका थिए। जुन निर्वाचन क्षेत्र कम्यूनिष्टको आधार इलाकाको रुपमा परिचित थियो । सुनिल शर्माले कांग्रेस सरकारमा हुँदा समेत मन्त्री बन्न र शासन सत्ताको लाभ लिन कांग्रेस नेतृत्व संग कुनै सम्झौता गरेनन्। बरु कांग्रेस भित्रकै प्रतिपक्षको भूमिकामा आफूलाई शशक्त रुपमा उभ्याए। सत्ता सिन नेताका भ्रष्टाचारका काण्डको बारेमा भण्डाफोर गर्दा बहालवाल सांसदलाई सिआइवी लगाएर हिरासतमा लिने काम समेत तत्कालिन सत्ताले सुनिल माथि गर्यो। जसको संसदमा तत्कालिन समयको प्रतिपक्षले नै चर्को विरोध गरेपछि प्रचण्ड नेतृत्वको कांग्रेस सम्मेलित सरकार लज्जित हुनुपरेको थियो।

डा सुनिल सर्माले आफ्नो ब्यक्तिगत फाइदाका लागि कहिल्यै कसैसंग सम्झौता गरेनन्। हिरासत भित्रको चिसो छिडिमा सुत्नु पर्दा समेत जनता र मूलुकका लागि बोले,सत्ता संग न डराए न झुके।

डा सुनिल शर्मा स्वास्थ्य सम्बन्धी सार्वजनिक महत्वको प्रस्ताव संसदमा टेवल गराए जुन विधेयक पारित भएको खण्डमा संविधानले सुरक्षीत गरेको निशुल्क स्वास्थ्य सम्बन्धी अधिकार नेपाली जनताले पाउने लगालग फिक्स थियो। तर अफसोस उक्त विषय जेनजी आन्दोलन पछि गुमनाम पारियो।

नेपालका आद्नोलन होस् या प्राकृतिक विपत्ति सबैमा घाइते देखि अशक्त र गरि असाहयको उपचार निशुल्क गरिदिने दया र करुणाका पर्याय सुनिल शर्मा बनेका छन्।

बादी समुदाय पहिलो डाक्टर बनाउने सुनिल शर्मा भोटेकोशी बाढीमा पैसा बगाएर श्रीमतीको किड्नी ट्रान्सप्लाण्ट गर्न नपाएर छट्पटाएकाको निशुल्क उपचार गरिदिने सुनिल शर्मा देशका दुरदराजमा स्वास्थ्य शिविर निशुल्क चलाएर देश स्वस्थ बनाउने आन्दोलन चलाउने सुनिल शर्मा।

डा सुनिल शर्मा मेडिकल उधमी र भन्दा अधिक राजनीतिज्ञ भएका छन्। विशेष महाधिवेशनको मन्चबाट परिवर्तनको शंघघोष गर्ने डा सुनिल पुस्तान्तर र रुपान्तरणका बलियो पक्षधर बनेर मात्रै उभिएनन बरु आफै नेतृत्व हाक्ने कसरतमा हिमोएका छन्।

कांग्रेस पार्टी भित्र होस् या वाहिर भ्रष्टाचार र कुशासनको विरुद्ध शक्तिशाली आवाज सडक देखि सदन सम्म बोल्ने सुनिल शर्मा महामन्त्री पदका सबै भन्दा बलिया उम्मेदवार भनिएको छ। त्यसो त कांग्रेसका महाधिवेशन प्रतिनिधि विवेक र राजनैतिक चेतनाका हिसावले अव्वल हुने भएकाले पनि महामन्त्रीमा डा सुनिल शर्माले जित्ने सम्भावना प्रवल भएको आंकलन गर्न सकिन्छ। कांग्रेसका कार्यकर्ताले न्याय गर्छन्। समयको पदचापलाई बुझ्छन् भनिन्छ। सोहि कारण पनि ८० बर्षको शेरबहादुर देउवा बाट नेतृत्व ५० बर्षमा गगनमा रुपान्तरण गरे। पुस्तान्तरण गरे। परिवर्तनको पक्षमा उभिए। कांग्रेसी कार्यकर्ताको न्यायको तराजुमा डा सुनिल शर्माको पल्ला कति भारि छ त्यो भने हेर्न बाकि छ।

सुरक्षासँग सम्बन्धित संवेदनशील सूचना चुहावट गरी पदीय आचरणविपरीत कार्य गरेको आरोप लागेका सशस्त्र प्रहरी बल, नेपालका अतिरिक्त महानिरीक्षक (एआईजी) वंशीराज दाहाल निलम्बनमा परेका छन्।

गृह मन्त्रालयले सोमबार जारी गरेको विज्ञप्तिअनुसार दाहालले सुरक्षासँग सम्बन्धित संवेदनशील सूचना चुहावट गरी आचरणविपरीत कार्य गरेको भन्ने विषयमा सशस्त्र प्रहरी बल, नेपालबाट कारबाहीका लागि मन्त्रालयमा सिफारिस प्राप्त भएको थियो।

सोही सिफारिसका आधारमा मन्त्रालयले दाहालमाथि लागेको अभियोगको जाँचबुझ प्रक्रिया अघि बढाएको हो। मन्त्रालयको असोज १९ गतेको निर्णयअनुसार उक्त विषयमा जाँचबुझ गर्न जाँचबुझ अधिकृतसमेत तोकिएको छ।

गृह मन्त्रालयले तोकिएका जाँचबुझ अधिकृतलाई दाहालमाथि लागेको अभियोगका सम्बन्धमा आवश्यक जाँचबुझ गरी तीन दिनभित्र प्रतिवेदन मन्त्रालयमा पेस गर्न निर्देशन दिएको छ।

मन्त्रालयले निजामती तथा प्रहरी कर्मचारीले पालना गर्नुपर्ने पदीय आचरणसम्बन्धी व्यवस्था प्रचलित कानुनमा स्पष्ट रहेको जनाएको छ। प्रत्येक सशस्त्र प्रहरी कर्मचारीले आफ्नो सेवा र पदअनुसारको आचरण पालना गर्नुपर्ने तथा सुरक्षासँग सम्बन्धित संवेदनशील सूचनाको संरक्षण र गोपनीयता कायम गर्नुपर्ने कानुनी व्यवस्था रहेको मन्त्रालयले उल्लेख गरेको छ।

गृह मन्त्रालयले मातहतका कर्मचारीबाट हुने पदीय आचरणविपरीतका गतिविधि, संवेदनशील तथा गोप्य सूचनाको चुहावट र शान्ति सुरक्षामा प्रतिकूल असर पार्न सक्ने गतिविधिमाथि सूक्ष्म निगरानी तथा विश्लेषण भइरहेको जनाएको छ।

कानुन विपरीत हुने हरेक गतिविधि वा घटनामा संलग्न जोसुकैलाई प्रचलित कानुनबमोजिम कारबाही गरिने मन्त्रालयले स्पष्ट पारेको छ।

मन्त्रालयले विधिको शासन, कानुनको परिपालना तथा सार्वजनिक शान्ति सुरक्षाको संरक्षणप्रति प्रतिबद्ध रहेकोसमेत जनाएको छ।

दाहालको पदावधि थपका लागि यसअघि सशस्त्र प्रहरी मुख्यालयले गृह मन्त्रालयमा पत्राचार गरेको थियो। सशस्त्र प्रहरी नियमावलीअनुसार उनको चार वर्षे पदावधि सकिन लागेको र सरकारले चाहेमा एक वर्ष थप गर्न सक्ने व्यवस्था रहेको छ।

यसअघि दाहाललाई ‘चेन अफ कमान्ड’ उल्लंघन गरेको विषयमा स्पष्टीकरण सोधिएको विवरणसमेत सार्वजनिक भएको थियो।

नेपाली कांग्रेसको १५ औँ महाधिवेशनको सरगर्मी चुलिँदै गर्दा पार्टीको भावी दिशा तय गर्ने नेतृत्वका लागि नयाँ र रूपान्तरणकारी अनुहारहरूको खोजी तीव्र बनेको छ । यही वैचारिक र सांगठनिक मन्थनका बीच इञ्जिनियरिङ शिक्षाका बौद्धिक व्यक्तित्व, नेविसङ्घका पूर्वअध्यक्ष एवं पूर्वसभासद रञ्जित कर्णले महामन्त्री पदमा आफ्नो सशक्त दाबेदारी प्रस्तुत गर्दै कांग्रेस राजनीतिमा छुट्टै उत्साह र तरङ्ग पैदा गरिदिएका छन् ।

सप्तरीको राजविराजबाट सुरु भएको निष्ठावान् राजनीतिक यात्रा, पुलचोक क्याम्पसबाट हासिल गरेको सहरी योजनाको प्राविधिक ज्ञान, अनि संविधान सभा र राष्ट्रियसभामा खेलेको परिपक्व संसदीय भूमिका—यी तीन मुख्य खम्बा नै कर्णलाई समकालीन कांग्रेस राजनीतिमा अन्य दाबेदारभन्दा भिन्न, बौद्धिक र नतिजामुखी नेताका रूपमा उभ्याउने बलिया आधार हुन् ।
सप्तरीको राजविराजबाट सुरु भएको राजनीतिक पृष्ठभूमि, बौद्धिक क्षमता र उच्च संसदीय अनुभवका आधारमा कर्णले पार्टीभित्र सांगठनिक पुनर्जागरण र पुस्तान्तरणको एजेन्डासहित महामन्त्रीमा आफ्नो दाबेदारी प्रस्तुत गरेका हुन् ।

रञ्जित कर्ण केवल राजनीतिक कार्यकर्ता मात्र होइनन्, उनी प्राविधिक रूपमा दक्ष र बौद्धिक व्यक्तित्व पनि हुन् । त्रिभुवन विश्वविद्यालय, इन्जिनियरिङ अध्ययन संस्थान पुलचोक क्याम्पसबाट आर्किटेक्चरमा स्नातक, र सहरी योजनामा स्नातकोत्तर तह पूरा गरेका कर्णले अध्ययन र राजनीतिलाई सँगसँगै अघि बढाएका हुन् ।

उनको राजनीतिक यात्रा २०४० को दशकको उत्तरार्धबाट सुरु भएको हो । २०४४ सालमा राजविराजस्थित राजदेवी माध्यमिक विद्यालयमा नेविसङ्घको एकाइ अध्यक्ष, २०४६ मा ठाकुरराम बहुमुखी क्याम्पस वीरगन्जको विज्ञान संकाय अध्यक्ष र २०५१ मा त्रि–चन्द्र क्याम्पस काठमाडौँमा स्वतन्त्र विद्यार्थी युनियन (स्ववियु) सदस्यका रूपमा उनको राजनीतिक जग बस्यो ।
पुलचोक क्याम्पसमा २०५३ मा स्ववियु सचिव र २०५६ देखि २०५८ सम्म स्ववियु अध्यक्ष निर्वाचित भई उनले प्राविधिक विद्यार्थीहरूको हकहित र शैक्षिक सुधारमा नेतृत्वदायी भूमिका निर्वाह गरे ।
२०५८ सालमा नेविसङ्घको केन्द्रीय सदस्य बनेका कर्ण, (२०६०–२०६२ सम्म उपाध्यक्ष , ६४ सालसम्म महामन्त्री हुँदै २०६९ देखि २०७३ सम्म नेविसङ्घको केन्द्रीय अध्यक्ष बने ।
उनको नेतृत्वमा नेविसङ्घले देशभरका क्याम्पसहरूमा शैक्षिक समानता, स्ववियु निर्वाचनको नियमितता, त्रिभुवन विश्वविद्यालयको प्रशासनिक सुधार र विद्यार्थी हकहितका पक्षमा सशक्त आन्दोलन सञ्चालन ग¥यो ।

लामो समयदेखि हुन नसकेको नेविसङ्घको महाधिवेशन सम्पन्न गराई भ्रातृ संस्थाभित्र सांगठनिक अनुशासन र गतिशीलता ल्याउन कर्णले खेलेको भूमिकालाई पार्टीभित्र महत्त्वपूर्ण मानिन्छ।
नेपाल बाहिर पनि अन्तर्राष्ट्रिय युवा तथा शैक्षिक कार्यक्रमहरूमा नेपालको प्रतिनिधित्व गरिसकेका कर्णसँग अन्तर्राष्ट्रिय सम्बन्ध र सांगठनिक अनुभव रहेको छ ।

उनले सन् २००१ मा जर्मनीको इलुमानियाबादमा आयोजित ’इन्टरनेसनल युथ फेस्टिभल’मा सहभागिता जनाए । २०१२ मा ’डेमोफिनल्यान्ड’द्वारा आयोजित ’नेपाल–फिनल्यान्ड विद्यार्थी नेता अन्तरक्रिया कार्यक्रम’ र सोही वर्ष लन्डनमा आयोजना भएको ’अन्तर्राष्ट्रिय विद्यार्थी नेता शिखर सम्मेलन’मा सहभागिता जनाएर अनुभव बटुलेका छन् ।

यसबाहेक फिनल्यान्ड, संयुक्त अधिराज्य, जर्मनी, भारत, अस्ट्रेलिया र संयुक्त राज्य अमेरिका जस्ता देशहरूको भ्रमण गरिसकेका कर्ण पत्रपत्रिकाहरूमा राजनीतिक अर्थशास्त्र, लोकतान्त्रिक मूल्य–मान्यता र पार्टीको आन्तरिक लोकतन्त्रका विषयमा विश्लेषणात्मक लेखहरू लेख्ने बौद्धिक नेताका रूपमा चिर परिचित छन् ।

कर्ण सडक र संगठनका नेता मात्र नभई संसद्मा नीतिगत बहस र कानुन निर्माण प्रक्रियामा प्रभावकारी भूमिका निर्वाह गर्ने परिपक्व राजनीतिज्ञ हुन् ।दोस्रो संविधानसभामा समानुपातिक प्रणालीमार्फत सभासद बनेका उनले नेपालको संविधान २०७२ निर्माणका क्रममा समावेशी लोकतन्त्र, मधेसी तथा पछाडि पारिएका समुदायको अधिकार र युवा नेतृत्वको प्रतिनिधित्व सुनिश्चित गराउन महत्त्वपूर्ण भूमिका खेले ।

संसद्को माथिल्लो सदन राष्ट्रियसभामा जनसरोकारका मुद्दा, सुशासन, संघीयताको प्रभावकारी कार्यान्वयन र नीतिगत सुधारका विषयमा उनले निरन्तर प्रखर आवाज उठाउँदै आएका छन् ।

“वैचारिक स्पष्टता, सांगठनिक सुदृढीकरण र समावेशी कांग्रेस“ को नारासहित १५ औँ महाधिवेशनमा महामन्त्री पदका लागि अघि सरेका कर्णले सांगठनिक चुस्तता, २१ औँ शताब्दीको समाजवाद, युवा सहभागिता, अनुसन्धान र विचारमा आधारित राजनीतिलाई आफ्नो मुख्य एजेण्डा बनाएका छन् ।

विद्यार्थी राजनीति, इञ्जिनियरिङ क्षेत्रको प्राविधिक ज्ञान, संविधान सभा र राष्ट्रियसभाको लामो अनुभव, मधेस तथा राष्ट्रिय राजनीतिमा बलियो पकड एवं वैचारिक स्पष्टताका कारण नेपाली कांग्रेसको १५ औँ महाधिवेशनमा रञ्जित कर्णको महामन्त्री पदको दाबेदारीलाई पार्टीभित्र विशेष चासो र सम्भावनाका साथ हेरिएको छ ।

सरकारले जेनजी आन्दोलनका क्रममा प्रदर्शनकारीमाथि लगाइएका फौजदारी मुद्दा फिर्ता गर्न सकिने वा नसकिनेबारे अध्ययन गर्न गठित समितिको प्रतिवेदन गृह मन्त्रालयमा पठाउने निर्णय गरेको छ ।

सोमबार सिंहदरबारमा बसेको मन्त्रिपरिषद् बैठकले पूर्वन्यायाधीश बाबुराम रेग्मीको अध्यक्षतामा गठित समितिले बुझाएको प्रतिवेदन आवश्यक कार्यान्वयनका लागि गृह मन्त्रालयमा पठाउने निर्णय गरेको हो ।

जेनजी आन्दोलनसँग सम्बन्धित घटनामा फौजदारी अभियोग लागेका मुद्दा फिर्ता गर्न मिल्ने वा नमिल्ने विषयमा छानबिन गरी सिफारिस गर्न रेग्मीको अध्यक्षतामा समिति गठन गरिएको थियो ।

मन्त्रिपरिषद्को निर्णयबारे जानकारी दिँदै सरकारका प्रवक्ता एवं शिक्षामन्त्री सस्मित पोखरेलले समितिले पेस गरेको प्रतिवेदन आवश्यक कार्यार्थ गृह मन्त्रालयमा पठाउने निर्णय भएको बताए।

नेपाली कांग्रेसको १५औँ महाधिवेशनमा स्थानीय तहका जनप्रतिनिधिहरूको उल्लेख्य सहभागिता भएको छ।

नगरपालिका संघका अध्यक्ष भीम ढुंगाना, गोकर्णेश्वरका मेयर दीपक रिसाल, कागेश्वरी मनोहरा नगरपालिकाका मेयर उपेन्द्र कार्की, मध्यपुर थिमिका मेयर सुरेन्द्र श्रेष्ठ, चाँगुनारायणका मेयर जीवन खत्री र रामेछापका मेयर लबश्री न्यौपाने सहित विभिन्न नगरपालिका र गाउँपालिकाका प्रमुखहरू महाधिवेशन प्रतिनिधि बनेका छन्।

उनीहरूले स्थानीय तहका समस्या, विकास र जनताका मुद्दालाई पार्टीको केन्द्रीय नेतृत्वसम्म पुर्‍याउँदै नीति निर्माणमा स्थानीय आवाज समेट्न भूमिका खेल्ने बताएका छन्। साथै, केन्द्रीय समितिलाई सहयोग गर्दै केन्द्रीय समितिमा आफूहरुको पनि सहभागिता हुने गरी महाधिवेशनमा सक्रिय सहभागिता जनाउने उनीहरूको भनाइ छ।

पूर्वप्रधानमन्त्री तथा नेपाली कम्युनिष्ट पार्टीका नेता झलनाथ खनालले पार्टीबाट अलग हुँदै ‘समाजवादी जागरण अभियान’ घोषणा गरेका छन् ।

सोमबार काठमाडौंमा पत्रकार सम्मेलन गर्दै खनालले पार्टीबाट अलग भएको घोषणा गर्दै ‘समाजवादी जागरण अभियान’ सुरु गरेको जानकारी दिए।

खनाल नेतृत्वको अभियानको पहिलो भेलाले १५ वटा विभिन्न प्रस्तावसमेत पारित गरेको छ। कम्युनिस्ट आन्दोलनलाई वैचारिक रूपमा पुनर्गठन गर्ने उद्देश्यसहित अभियान घोषणा गरिएको उनले बताए।

उनको नेतृत्वमा शनिबार भेला गरी अभियान सञ्चालन गर्ने निर्णय गरिएको थियो। सोही भेलाबाट पारित निर्णय र अभियानका विषयमा सोमबार पत्रकार सम्मेलनमार्फत सार्वजनिक गरिएको हो।

पत्रकार सम्मेलनमा खनालले नेकपा गठन हुँदाको अवस्थालाई स्मरण गर्दै भने, ‘नेकपा गठन हुँदा सबैभन्दा धेरै म नै खुसी थिएँ। यो पार्टीले कायापलट नै गर्छ कि भन्ने लागेको थियो। पार्टी निर्माण गर्दा जसरी जनतालाई भन्दै आएका थियौँ, त्यो पूरा हुन्छ कि भन्ने आशा थियो।’

उनले पार्टीले जनअपेक्षाअनुसार काम गर्न नसकेको र दुई तिहाइ बहुमत भएको संसद्समेत विघटन गर्ने अवस्था आएको बताए।

‘तर हेर्दाहेर्दै दुई तिहाइ बहुमत भएको संसदलाई समेत विघटन गर्ने बेला आयो। त्यसपछि पनि पार्टीले जसरी जनमुखी भएर नीति कार्यक्रम लागू गर्नुपर्ने थियो, त्यो नहुँदा पार्टी विस्तारै जनताबाट अलग हुँदै गयो । पार्टीले जनतासँग घनिष्ठ सम्बन्ध हुँदैन, त्यसले चौतर्फी पराजय व्यहोर्नु अनिवार्य हुन्छ,’ उनले भने।

खनालले अब समाजवादमा जानुको अर्को विकल्प नरहेको भन्दै सबै वामपन्थी शक्तिलाई एक ठाउँमा ल्याउनुपर्ने बताए।

उनले भने,‘अब समाजवादमा जानुको अर्को विकल्प छैन। त्यसैले समाजवादी जागरण अभियान सञ्चालन गरेर सम्पूर्ण वामपन्थीलाई एक ठाउँमा ल्याउनुपर्छ भनेर यो अभियान सुरु गर्न लागेका हौँ।’

उनले अभियान देशका समस्त कम्युनिस्टलाई एकताबद्ध गर्नका लागि भएको बताए।

‘अभियान देशका समस्त कम्युनिस्टहरूलाई एकताबद्ध गर्नको लागि हो। अहिले हावी भएको दक्षिणपन्थी भड्काउबाट मुक्त गर्नको लागि सुरु गरेको हो,’ उनले भने।

नेपालको कम्युनिस्ट आन्दोलनलाई एकीकृत गर्न अभियानले भूमिका खेल्ने दाबी गर्दै उनले भने, ‘यो अभियानले नेपालको कम्युनिस्ट आन्दोलनलाई एकीकृत गरेर मात्र विर्सजित हुन्छ ।’

सरकारले अत्यावश्यकबाहेक हालका लागि भोटेकोशी–त्रिशूली बाढीपछिको खोज तथा उद्धार चरणलाई स्थगन गर्ने निर्णय गरेको छ ।

प्रधानमन्त्री बालेन्द्र शाहको अध्यक्षतामा आज प्रधानमन्त्री तथा मन्त्रिपरिषद्‍को कार्यालयमा बसेको विपद् जोखिम न्यूनीकरण तथा व्यवस्थापन राष्ट्रिय परिषद्को एक्काइसौँ बैठकले अत्यावश्यक खोजसँगै पुनर्निर्माण र पुनस्र्थापनाको कार्य तीव्र रुपमा अगाडि बढाउन सम्बन्धित निकायलाई निर्देशन दिने निर्णय गरेको छ ।

जिल्ला सुरक्षा समिति, जिल्ला विपद व्यवस्था समिति, राष्ट्रिय विपद् जोखिम न्यूनीकरण तथा व्यवस्थापन प्राधिकरणको कार्यकारी समिति र स्थलगत अवलोकनसमेतको सिफारिसका आधारमा उक्त निर्णय गरिएको हो ।

यसैगरी, बैठकले प्रभावित क्षेत्रको पुनर्निर्माण तथा पुनस्र्थापनाका लागि विभिन्न मन्त्रालय र निकायहरूबाट प्राप्त ५०४ वटा योजना तथा कार्यक्रमका लागि ५ खर्ब ५९ अर्ब १७ करोड ७२ लाख २७ हजार रुपैयाँ बराबरको बजेट स्वीकृतिका लागि अर्थ मन्त्रालयमा सिफारिस पठाउने निर्णय गरेको छ ।

आर्थिक कार्यविधि तथा वित्तीय उत्तरदायित्व नियमावली, २०७७ बमोजिम स्वीकृत यी योजनाहरूका लागि अर्थ मन्त्रालयमार्फत स्रोत व्यवस्थापन गरिनेछ । यसैगरी, लागत अनुमान नखुलेका र प्राथमिकीकरण हुन बाँकी आयोजनाहरूको विवरण प्राप्त भएपछि आवश्यक बजेट व्यवस्थाका लागि अर्थ मन्त्रालयमा सिफारिस गर्न राष्ट्रिय विपद् जोखिम न्यूनीकरण तथा व्यवस्थापन प्राधिकरणलाई निर्देशन दिइएको छ ।

बैठकमा प्रधानमन्त्री शाहले विपद् व्यवस्थापनको काम संघ, प्रदेश र स्थानीय सरकारको समन्वयमा भइरहेको र अब पुनर्निर्माण र पुनस्र्थापनाको काम पनि त्यसै गरी हुने बताए । यस कार्यमा विपक्षी दल तथा नेपाली कांग्रेसका संसदीय दलका नेता र बाग्मती, गण्डकी, मधेश र कोशी प्रेदशका मुख्यमन्त्रीहरुले आफ्नो पूर्ण साथ रहेको बताए ।

बैठकले भोटेकोशी–त्रिशूली बाढी तथा मनसुनजन्य विपद्का कारण भएको जनधनको क्षतिप्रति दुःख व्यक्त गर्दै सम्पूर्ण मृतकहरूप्रति भावपूर्ण श्रद्धाञ्जली र शोकसन्तप्त परिवारजनमा गहिरो समवेदना प्रकट गरेको छ ।

यसका साथै, विषम परिस्थितिमा खोज, उद्धार, राहत तथा पुनस्र्थापनामा खटिने सुरक्षाकर्मी, जनप्रतिनिधि, राष्ट्रसेवक, निजी क्षेत्र, स्वयंसेवक, सञ्चारकर्मीका साथै सहयोग पुर्याउने दातृराष्ट्र र विकास साझेदारहरूप्रति परिषद्ले उच्च प्रशंसा गर्दै हार्दिक धन्यवाद ज्ञापन गरेको छ ।

नेपाली कांग्रेसका सभापति गगन थापाले १५औँ महाधिवेशनको बन्दसत्रमा राजनीतिक प्रतिवेदन पेश गरेका छन् ।

खुल्लामञ्चमा जारी महाधिवेशनमा सभापति थापाले आगामी चार वर्षका लागि कांग्रेसको राजनीतिक, वैचारिक, संगठनात्मक तथा आर्थिक कार्यदिशा प्रस्तुत गरेका हुन् ।

प्रतिवेदनमा गठबन्धन व्यवस्थापन, भागबन्डा, गुटबन्दी र लेनदेनको राजनीतिले पार्टीको नैतिक धरातल कमजोर बनाएको तथा भ्रष्टाचार र अनियमिततामा आफ्नै पक्षका व्यक्तिलाई संरक्षण गर्ने प्रवृत्तिले सार्वजनिक संस्थाको स्वायत्तता कमजोर बनाएको उल्लेख छ।

 

बागलुङको निसीखोला गाउँपालिका–३ बोहोरागाउँमा सडक स्तरोन्नतिको क्रममा माटोको ढिस्को खस्दा पुरिएर दुई जना मजदुरको मृत्यु भएको छ । भने एक जना गम्भीर घाइते भएका छन् ।

आज बिहान करिब ७ः२० बजे झिवाखोलाबाट बोहोरागाउँ जाने भित्री सडकखण्डमा लु १ क ३४४६ नम्बरको जेसीबीले सडक खन्ने क्रममा अचानक माथिबाट माटोको ढिस्को खसेर मजदुरहरू पुरिएका थिए ।

माटोको ढिस्कोमा पुरिएर मृत्यु हुनेमा सल्यानका ३२ वर्षीय लालबहादुर बुढाथोकी र उदयपुर गाईघाटका ३२ वर्षीय राजु थापामगर रहेका छन् । उनीहरूलाई ढिस्कोबाट उद्धार गरी मृत अवस्थामा फेला पारिएको हो ।

घटनामा रोल्पाको त्रिवेणी गाउँपालिका–५ का २५ वर्षीय कृष्णबहादुर घर्ती गम्भीर घाइते भएका छन् । उनलाई तत्काल उद्धार गरी उपचारका लागि बुर्तिबाङ अस्पताल पठाइएको छ ।

घटनाबारे थप विवरण आउन बाँकी रहेको प्रहरीले जनाएको छ ।

ताजा अपडेट

Login

कृपया ध्यान दिनुहोस्:

  • अब तपाइले कमेन्ट गर्नका लागि अनिवार्य रजिस्ट्रेसन गर्नुपर्ने छ ।
  • आफ्नो इमेल वा गुगल, फेसबुक र ट्वीटरमार्फत् पनि सजिलै लगइन गर्न सकिने छ ।
  • यदि वास्तविक नामबाट कमेन्ट गर्न चाहनुहुन्न भने डिस्प्ले नेममा सुविधाअनुसारको निकनेम र प्रोफाइल फोटो परिवर्तन गर्नुहोस् अनि ढुक्कले कमेन्ट गर्नहोस्, तपाइको वास्तविक पहिचान गोप्य राखिने छ ।
  • रजिस्ट्रेसनसँगै बन्ने प्रोफाइमा तपाइले गरेका कमेन्ट, रिप्लाई, लाइक/डिसलाइकको एकमुष्ठ बिबरण हेर्नुहोस् ।