२०८३ मंसिर ५ गते शुक्रबार
२०८३ मंसिर ५ गते शुक्रबार

काठमाडौं । नेपाल पुकार डटकमका सम्पादक प्रकाशचन्द्र दाहाल आज काठमाडौँ जिल्ला अदालतमा आफै उपस्थित भएका छन्।

गत चैत १५ गते काठमाडौंको तीनकुनेमा आयोजित विरोध प्रदर्शनको प्रत्यक्ष रिपोर्टिङ गरेका दाहालमाथि झुटा मुद्धा लगाइएको छ । 

दाहालविरुद्ध आपराधिक उव्द्रव र साङ्गठनिक अपराधसम्बन्धी गम्भीर अभियोगमा जिल्ला अदालतमा मुद्दा दर्ता भएको छ।

न्यायाधीश रेशराज शर्माको इजलासमा दाहाल विरुद्धको मुद्धाको सुनुवाई हुँदैछ ।

सम्पादक दाहालले दुर्गा प्रसाईँको गाडी भित्र बसेर तिनकुने घटनाको भिडियो खिचेका थिए । आफूले घटनास्थलमा “पत्रकारिताको धर्मअनुसार” मात्र रिपोर्टिङ गरेको दाबी गर्दै उनले भनेका छन्, “मैले एक्सक्लुसिभ भिडियो खिचें, त्यसबाहेक मेरो कुनै संलग्नता थिएन। प्रहरीले प्रदर्शनमा हस्तक्षेप गर्न नसकेको कमजोरी ढाकछोप गर्न मलाई गलत रूपमा फसाइएको हो।”

उनले घटनास्थलमा खिचिएका तस्बिर र भिडियोहरू अनुसन्धानका प्रमाणका रूपमा प्रयोग गरिएको जनाउँदै, त्यसै आधारमा आफूलाई अभियुक्त बनाइएकोमा आपत्ति जनाएका छन्।

काठमाडौं- हाल कोशी, मधेस, बागमती र गण्डकी प्रदेशका केही भाग तथा लुम्बिनी प्रदेशका पूर्वी क्षेत्रका केही भागमा मनसुनी वायुको प्रभाव रहेको छ। साथै देशका पश्चिमी भागमा पश्चिमी तथा स्थानीय वायुको पनि आंशिक प्रभाव रहेको छ।

भारतको पश्चिम बङ्गाल आसपास बनेको न्यूनचापीय क्षेत्रको समेत आंशिक प्रभाव रहेको जल तथा मौसम पूर्वानुमान महाशाखाले जनाएको छ।

आज (बुधबार) दिउँसो देशभर साधारणतया बदली हुनेछ। कोशी, बागमती, गण्डकी र लुम्बिनी प्रदेशका धेरै स्थान र अन्य प्रदेशका केही स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ । कोशी, बागमती, गण्डकी र लुम्बिनी प्रदेशका एक–दुई स्थानमा भारीदेखि धेरै भारी वर्षाको सम्भावना छ । देशका उच्च पहाडी तथा हिमाली भू–भागका केही स्थानमा हल्का वर्षा र हिमपातको सम्भावना छ।

महाशाखाका अनुसार आज राति देशभर साधारणतया बदलीदेखि पूर्णयता बदली रहने छ। कोशी, मधेस, बागमती, गण्डकी र लुम्बिनी प्रदेशका धेरै स्थान तथा अन्य प्रदेशका केही स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ।

कोशी, मधेस, गण्डकी र लुम्बिनी प्रदेशका केही स्थानमा भारीदेखि धेरै भारी वर्षाको सम्भावना छ।

मेष (चु, चे, चो, ला, लि, लु, ले, लो, अ)

ज्ञानको भण्डार पूर्ण हुने तथा दार्शनिक भावना जाग्ने समय हो, साथीहरू र गुरुसँग छलफल गरेमा दिमागलाई अझ तिखार्न पाइने छ। शान्त र स्थिर मतिको उदय हुनेछ, परोपकारी समय हो, प्रेम र भाइचारालाई समेत जीवन्त तुल्याउन सकिने छ। ठूलाबडाको सहयोग लिन सके नबन्ने काम पनि बन्नसक्छ। क्षमता प्रदर्शन गरी अरुमाथि छाप छोड्ने समय हो। कार्य सम्पादनका माध्यमबाट सिनियरलाई समेत आकर्षित तुल्याउन सकिने छ।

बृष (इ, उ, ए, ओ, बा, बि, बु, बे, बो)

कुनै कुरालाई लिएर वैचारिक मतभेद हुनसक्छ, आफूलाई चित्त नबुझेको कुरामा ‘हँ मा हँ’ मिलाउनुभन्दा ‘नाइँ’ पनि भन्न सक्नुपर्छ। लड्ने वा चिप्लने डर भएकाले सचेत हुनुपर्ने दिन हो, घरपरिवारमा सम्पर्क राखी खरखाँचोका बारेमा पनि जानकारी बटुल्नु ठीक हुन्छ। लेनदेनका क्रममा दबाबमा हुनुहुन्छ भने पनि समझौता गर्नुहुँदैन, बरु परिस्थिति विपक्षमा छ भने पुनर्विचार गर्नुहोस्, समय बित्दै जाँदा दैनिकीमा सुधार आउने छ।

मिथुन (का, कि, कु, घ, ङ, छ, के, को, ह)

पारिवारिक भ्रमणमा निस्कनुपर्ने हुन्छ, अथवा भविष्यमा हुने कुनै यात्राको योजना बनाउन सकिन्छ। तपाईंको प्रस्तावमा छोराछोरीको पूर्ण समर्थन रहनेछ। नयाँ साथी बनाउन पाइने तथा नौलो विषयको जानकारी बटुल्ने दिन हो, मित्रवर्ग र सँगीसाथीको सहयोगमा नजानेको कुनै विषयको ज्ञानसमेत पाउन सकिन्छ। सबैको सहयोग प्राप्त हुनाले ताकेको कामबाट छिट्टै फुर्सद पाइने छ र नयाँ काममा हात हाल्ने मानसिकतासमेत बन्नसक्छ। यो रचनात्मक उर्जाले भरिपूर्ण समय हो, प्रियजनसँगको भेटघाटले वातावरण रमाइलो बन्नेछ।

कर्कट (हि, हु, हे, हो, डा, डि, डु, डे, डो)

हाकिम वा सेवाग्राहीको रिसको चक्रमा पर्न सकिन्छ, समस्या देखिएमा कलह वा विवादलाई होइन, बुद्धिकौशलको उपयोग गरी मिलनसार बनिदिनु राम्रो हुन्छ। दोधारेपन, अलमल र चिडचिडेपन हाबी हुने दिन हो, अझ पार्टनरका क्रियाकलाप वा कुनै कुराप्रति शङ्का उब्जनाले दिक्क लाग्ने समय छ। स्वास्थ्य अनुकूल रहनेछ, आकस्मिक यात्राबाट भाग्य बढ्ने दिन हो, प्रतिस्पद्र्धी र शत्रुले आँखा तरे पनि सामना गर्ने साहस गर्ने छैनन्।

सिंह (मा, मि, मु, मे, मो, टा, टि, टु, टे)

मन्दी र नोक्सानीका बारेमा पुनर्मूल्याङ्कन गरी अघि बढ्ने समय हो, नयाँ कामको प्रस्ताव आउनसक्छ, बुद्धिको प्रयोग गरेमा लाभसमेत पाइने छ। बाल्यावस्थाका मित्रहरू, आत्मीयजन वा छोराछोरीसित सम्पर्क वा भेटघाट हुने तथा रामरमाइलोमा सरिक हुने दिन हो, भावना र इच्छाहरूको कदर हुनेछ। पठनपाठन र सीप देखाएर भाग्य चम्काउने समय हो। सिनियर विद्यार्थी वा गुरुजनको सहयोग पाउनाले आत्मबल र हौसलामा समेत बृद्धि हुनेछ।

कन्या (टो, प, पि, पु, ष, ण, ठ, पे, पो)

दाम्पत्यजीवन सुखद रहने एवं परिवारमा सुखशान्ति र सम्मृद्धि छाउने राम्रो समय छ, तर बुढाबुढी र बुजुर्ग सदस्यको भावनाको कदर गर्नुहोला। सोच्ने शक्ति र निर्णयात्मक क्षमतामा कमी आउने दिन हो। आज हरेक कुरामा यो गरौं कि त्यो गरौं भन्ने अलमल हुनसक्छ। आवेगहरूमा नियन्त्रण गर्न नसक्नाले निराशा र खिन्नताको अनुभूति हुनसक्छ, अतः आफ्ना लागि समय प्रदान गर्नु र चिन्तन गरी वर्तमान समस्याको हल गर्ने प्रयास गर्नु उपयोगी हुनेछ।

तुला (र, रि, रु, रे, रो, ता, ति, तु, ते)

नयाँ एवं पुराना मित्रसित भुलिनाले पार्टनरलाई समय प्रदान गर्न सकिंदैन, तर कुनै व्यक्तिगत कार्य सम्पन्न हुने दिन छ। हर्षित हुने समाचार आउने छ, सानो प्रयासले मात्र भाग्य बढ्ने समय छ, त्यसैले मिहिनेत गरेर आम्दानीका मार्ग सुधार्न सकिने छ। सहयोगी र साझेदारहरूसँग राम्रो सम्बन्ध कायम हुनेछ। बिजुलीका उपकरण, खेलकुद सामाग्री र फलामसम्बद्ध निर्माणको कामबाट फाइदा लिन सकिने दिन हो।

बृश्चिक (तो, ना, नि, नु, ने, नो, या, यि, यु)

अभिव्यक्ति, कला र मनोरञ्जनसम्बद्ध विषयमा रुचि जाग्ने समय हो, अझ स्पष्टसँग मानसिक धारणा व्यक्त गरेमा आफ्नो सही पहिचान कायम गर्न सकिने छ। सञ्चार वा नेटवर्किङका विभिन्न माध्यमले अल्मल्याउन सक्छन्। पराईसँग व्यवहार गर्दा शब्दहरूको चयन र प्रस्तुतिमा ध्यान दिनुहोला। धनको सहजता देखिए पनि खर्च गर्नुपर्दा होस राखेर चल्नुपर्ने समय छ। मुखका माध्यमले नै महत्त्वपूर्ण काम बन्नसक्ने राम्रो समय छ, सिनियर कर्मचारी वा वरिष्ठ कर्मचारीलाई खुसी पारेर आफ्नो स्वार्थ पूरा गर्न सकिन्छ।

धनु (ये, यो, भ, भि, भु, ध, फा, ढ, भे)

महत्त्वाकाङ्क्षा र अदम्य उत्साह जाग्ने दिन हो। अल्छीपन बढ्न सक्छ। याद गर्नुहोला, कल्पना गरेरमात्र केही पनि हुँदैन। प्रतिफल प्राप्त गर्न मज्जाले खट्नुपर्ने हुन्छ। अध्ययनप्रतिको लगावले बौद्धिक क्षेत्र फराकिलो बन्नेछ, प्रतिस्पद्र्धामा जीत हुनेछ, विगतका कमीकमजोरीमा सुधार गरी प्रयत्न गरेको काममा सफल भइने छ। व्यक्तिगत उन्नति र प्रगतिको समाचारले मन प्रसन्न हुनेछ। अझ पार्टनरबाट शुभकामना प्राप्त गर्नाले थप सन्तुष्टि र आनन्दको अनुभूति हुनेछ।

मकर (भो, ज, जि, खि, खु, खे, खो, गा, गि)

खर्चको मात्रा बढ्नुका साथै वैचारिक अस्थिरता देखिने दिन छ, तथापि सँगीसाथीको मद्दत लिएर हिम्मतका साथमा प्रयास गरेमा पेसागत र व्यवसायिक परिस्थितिमा सुधार आउने छ। सानोतिनो यात्रामा जानुपर्दा व्यापारमा ध्यानकेन्द्रित हुनसक्दैन। दण्ड वा जरिवानामा पर्न सकिने वा कुनै कानूनी बाधाअड्चन व्यहोर्नुपर्ने हुन्छ। आर्थिक दृष्टिले कमजोर समय भएकाले हरेक काममा तौलेर खर्च गर्ने दिन हो, आज कुनै योजना कार्यान्वयन गर्न वा नयाँ कुरा किन्न अनुकूल समय देखिंदैन।

कुम्भ (गु, गे, गो, सा, सि, सु, से, सो, द)

मोटो धनमाल हातपार्ने समय हो, इच्छा पूर्ति गर्न वा शारीरिक सुख प्राप्त गर्ने बहानामा केही धन खर्च पनि हुनेछ। कारोबारमा राम्रै फड्को मार्ने समय छ, लागी परेमा रोकिएको काम बन्नेछ तर दायित्व र जिम्मेवारी भने बढिरहने समय हो। दाजुभाइ र दिदीबहिनीसँग सहायता आदान/प्रदान गर्ने समय हो। काम छैन भने पनि माइतीपक्षसँग सम्पर्क गरी खैखबर बटुल्नु राम्रो हुन्छ।

मीन (दि, दु, थ, झ, ञ, दे, दो, च, चि)

प्रतिष्ठा बढ्ने दिन हो, वंश, कुल र पितृपक्षका विषयमा आकर्षण देखिने छ। कार्यक्षेत्रमा पनि वरिष्ठ कर्मचारी प्रसन्न रहनेछन्। अझ बृद्धबृद्धा वा मान्यजनको सेवाचाकरी गरेमा भाग्यबल बढाउन सकिने छ। समुचित योजनाका साथ आफ्ना जिम्मेबारी र दायित्वलाई कार्यान्वयन गर्नुपर्छ। रामरमाइलोमा आकर्षण देखिंदैन। बरु कार्यस्थलमा बोझ बढ्ने सम्भावना छ। व्यवसायिक र आन्तरिक जीवनमा तालमेल मिलाउन हम्मेहम्मे पर्नेछ। घरायसी कामको चापसमेत बढ्नेछ, समय निकालेर लवमेटसँग कुराकानी गर्नु बेस हुनेछ।

काठमाडौं- धरान उपमहानगरपालिकाका मेयर हर्कराज राई साम्पाङ र उपमेयर आइन्द्रविक्रम बेघाका समर्थकहरूबीच झडप भएको छ । उपमहानगरपालिका कार्यालयबाहिर दुवै पक्षका समर्थकहरूबीच तनाव उत्पन्न भएको हो ।

दुई पक्षबीचको विवाद र झडपले गर्दा मंगलबार दिनभर नगर परिसर तनावग्रस्त बन्यो ।

‘बहुभाषिक विद्यालय पश्चिम सर्दु रोकथाम समिति’ले नगरपालिकासँग ७ लाख ४१ हजार भुक्तानी माग गरेको थियो ।

१७ लाख ४० हजार बराबरको काम मध्ये ९ लाख ९८ हजारको श्रमदान र नगरपालिकाबाट ७ लाख ४१ हजार भुक्तानी मागेपछि उपमेयर बेघाले रोकिदिए । त्यसपछि धरान १० को रायणपथमा श्रमदानमा प्रयोग भएको नगरको सवारीको चाबी बेघाले खोस्न लगाए ।

दुई वटा काम रोकिएपछि सोमबार दुई पक्षबीच सामान्य विवाद भएको थियो । मंगलबार भने हात हालाहालको स्थिति बनेको प्रहरीले बताएको छ ।

इलाका प्रहरी कार्यालय धरानका डीएसपी प्रकाश जबेगुले दुई पक्षबीच विवाद भएको बताए । दुवै पक्षलाई नगर परिसरबाट हटाएपछि अवस्था सामान्य बनेको उनले बताए ।

सोमबार मेयरका समर्थकले उपमेयर बेघालाई हातपात गर्ने प्रयास गरेका थिए, मंगलबार साम्पाङको समूहले उपमेयरसँग श्रमदानका क्रममा खोसिएका सवारीको चाबी माग गरेको थियो । बेघाले चाबी छैन भनेपछि विवाद सुरु भएको थियो । हुलहुल्जत गरेपछि बेघाले पनि आफ्ना समर्थकलाई बोलाएका थिए ।

दुई पक्षबीच आरोप प्रत्यारोप चर्किएपछि झडप भएको थियो ।

मेयर पक्षधरले भने श्रमदानबाट काम भइरहेको स्थानमा उपमेयरले अनावश्यक अवरोध सिर्जना गरेको दाबी गरको छ । बेघा पक्षले भने श्रमदानमा सरकारी सम्पति दुरुपयोग हुन नदिने बताएको छ ।

 
 

काठमाडौं । प्रतिपक्षी दल राष्ट्रिय स्वतन्त्र पार्टी (रास्वपा) सांसद मनिष झाले संसदमा निलो रिवन लगाउनु अमर्यादित नहुने बताएका छन्।

प्रतिनिधि सभा बैठक स्थगित भएपछि सामाजिक सञ्जाल ट्वीटर (एक्स) मा लेख्दै सांसद झाले निलो रिवन–सल लगाउँदा संसदीय मर्यादा नतोडिने बताएका छन्।

उनले विगतको संसद वैठकमा नेकपा एमाले र नेकपा माओवादीका शीर्ष नेताहरुले रातो मफ्लर लगाएको तस्वीरहरु सार्वजनिक गर्दै प्रश्न गरेका छन्–सदनमा रातो मफलर लगाउन पाउने, निलो नलगाउ भन्ने कुन नियमावलीले भन्छ ? भिजिट भिसामा मानव तस्करीको विरोध स्वरुप आज रास्वपाका सांसदहरु गलामा निलो रिवन लगाएर संसदमा उपस्थित भएका थिए । रास्वपा सांसदहरु निलो रिवन गलामा भिरेर संसदमा आएपछि सत्ता साझेदार नेपाली कांग्रेसले पोसाक अमर्यादित भएको भन्दै रास्वपा सांसदहरुलाई निष्कासन गर्न सभामुख देवराज घिमिरेको ध्यानाकर्षण गराएका थिए। मंगलबार संसदमा निलो रिवन लगाएर उपस्थित भएको विषयमा नेपाली कांग्रेसका प्रमुख सचेतक श्याम घिमिरेले नियमापत्ति जनाएका थिए।

‘उहाँहरू सबै स्कार्फ बाँधेर आउनु भएको छ। यो मर्यादित पोशाकभित्र पर्छ कि पर्दैन ? जे पनि लगाएर आउने गर्न थालियो भने भोलि कोही हाफ प्यान्टमा आए भने ?,’ उनले प्रश्न गरेका थिए।भिजिट भिसा प्रकरणमा गृहमन्त्री रमेश लेखकको राजीनामा र छानबिन समिति गठनको माग गरिरहेको रास्वपाका सबै सांसदहरूले निलो रिवन लगाएर संसद पुगेका थिए। उनीहरूले संसद सुरू भएपछि वेल घेरेर नाराबाजी गरेपछि बैठक स्थगित भएको थियो। भिजिट भिसा प्रकरणमा माओवादी केन्द्रले सत्तापक्षसँग दुई बुँदे सहमति गरेर संसद खोल्न तयार भए पनि रास्वपाले अवरोध जारी राखेको छ। यस्तै रास्वपाकी सांसद तोसिमा कार्कीले संसदमा निलो सल लगाउनु अमर्यादित नहुेन बताएकी छन्।

प्रतिनिधी सभा बैठक स्थगित भएपछि संसद भवन परिसरमा पत्रकारहरूसँगको कुराकानीमा सांसद कार्कीले सल लगाउँदा संसदीय मर्यादा नतोडिने बताइन्् । ‘हामीले गर्ने अबको क्रान्ति भनेको यस्तै किसिमको निलो शान्त विद्रोह बौद्धिक क्रान्ति हो । रचनात्मक ढंगले सांकेतिक रूपमा खबरदारी गर्दा आवज उहाँहरूको सात्तोपुत्लो उडेको छ,’ उनले भनिन्, ‘हामी प्रश्न गर्न चाहन्छौं हामीले आज सल लगाएर आउँदै गर्दा कहाँ निर अभद्र भयो ? हाम्रो आन्दोलन जारी छ।’

उनले आफूहरू हिंसाको पक्षमा नरहेको भन्दै अहिले शान्त विद्रोह गरेको पनि बताए। सरकारले मौलिक हकलाई नै बेवास्ता गरी गिरोह बनाएर भिजिट भिसामा मानिसहरू पठाउने गरिएको बताएकी छन्। ‘यी तमाम हकलाई बेवास्ता गरेर जालो नै क्रिएट गरेर गृह मन्त्रालयको सचिवालय स्वयम् आवद्ध भएर अध्यागमन विभागदेखि ट्राभल एजेन्सी म्यानपावर सबैलाई तानिने गरी ठूलो गिरोह छ। यसमा छानबिन हुनुप¥यो, उच्चस्तरीय छानबिन समिति भनेका छौं,’ उनले भनिन्। अहिले गृहमन्त्रीको सचिवालयमै रहेका व्यक्ति मुछिएका खबर आइरहेकाले सरकारले छानबिन गर्न नसक्ने भएकाले समिति बनाएर छानबिन गर्नुपर्ने अडान राखेको उनले बताइन्।

काठमाडौं । काठमाडौं महानगरपालिकाका निलम्बित नगर प्रहरी प्रमुख राजुनाथ पाण्डे उच्च अदालत पुगेका छन्।

महानगरका प्रमुख प्रशासकीय अधिकृत सरोज गुरगाईंको निर्णयविरुद्ध उनी उच्च अदालत पुगेका हुन्। पाण्डेको रिटमाथि भोलि बुधबार सुनुवाइ हुने अदालतले जनाएको छ। गत चैत २१ गते गुरागाईं कार्यालयमा हाजिर हुन जाँदा पाण्डेकै नेतृत्वमा रहेको नगर प्रहरीको टोलीले अवरोध गरेको आरोपमा उनीमाथि कारबाही अघि बढाइएको थियो। महानगरले उक्त घटनाबारे छानबिन गर्न प्रशासन प्रमुख ध्रुव काफ्लेको नेतृत्वमा जाँचबुझ समिति पनि अध्ययन गरिरहेको छ।

त्यसअघि गुरागाईंले पाण्डेसँग स्पष्टीकरण सोधेका थिए। प्रारम्भिक रूपमा उनको स्पष्टीकरण चित्तबुझ्दो नआएकाले निलम्बन गरी थप जाँचबुझ अघि बढाइएको गुरागाईको भनाई थियो। चैत २१ गते उपप्रमुख, प्रमुख प्रशासकीय अधिकृत, वडाध्यक्षहरू र कार्यपालिका सदस्यहरूले पटक–पटक अनुरोध गर्दा समेत प्रमुख प्रशासकीय अधिकृतको कार्यकक्षको ताला खोल्ने काममा अवरोध किन गरेको भनेर ७ बुँदे पत्र पाण्डेलाई थमाइएको थियो।

काठमाडौँ भ्यू टावरको नक्सा पास विवादपछि बिदामा बसेका गुरागाईं महानगरमा हाजिर हुन जाँदा विवाद भएको थियो। उपप्रमुख सुनीता डंगोलकै नेतृत्वमा गुरागाईं हाजिर हुन भनेर महानगर पुगेका थिए। महानगरको नगर प्रहरी बलले कार्यालय प्रवेशमा अवरोध गरेको थियो । काठमाडौँ महानगरपालिकाको कर्मचारीको रूपमा प्रमुख प्रशासकीय अधिकृतको निर्देशन पालना गर्नुपर्नेमा पाण्डेले कर्मचारी आचरण र अनुशासन पालना नगरी अनुशासनहीन कार्य गरेको आरोप लगाइएको छ।

काठमाडौं । प्रमुख सत्तारुढ नेपाली कांग्रेसले भिजिट भिसा प्रकरणमा मुछिएका गृहमन्त्री रमेश लेखकको राजीनामा माग्दै विरोधमा उत्रिएका राष्ट्रिय स्वतन्त्र पार्टी (रास्वपा) का सांसदहरूलाई संसद् बैठकबाट निष्कासन गर्न माग गरेको छ ।

मंगलबार दिउँसो २ बजे बसेको प्रतिनिधिसभा बैठकमा नियमापत्ति जनाउँदै कांग्रेसका प्रमुख सचेतक श्याम घिमिरेले यस्तो माग राखेका हुन् ।

‘सभामुख महोदय, संसद् सचिवालयको नियमावली ३० मा अभद्र व्यवहार नियन्त्रणको व्यवस्था छ । नियम ३१ मा बैठक कक्षबाट निष्कासनको प्रावधान छ,’ उनले नीलो स्कार्फ लगाएर आएका रास्वपा सांसदहरूतर्फ सङ्केत गर्दै भने, ‘नीलो स्कार्फ लगाएर संसद्मा आउनु मर्यादित हो कि होइन ? भोलि हाफ प्यान्ट मात्र लगाएर वा जथाभावी पोशाकमा आएमा त्यो संसद्को मर्यादामा पर्छ कि पर्दैन ?’

उनले सभामुखलाई रास्वपा सांसदहरूलाई चेतावनी दिएर निष्कासन गर्न आग्रह गरे । ‘सभामुखले चेतावनी दिएर उनीहरूलाई संसद्बाट निष्कासन गर्नुपर्छ,’ उनले भने, ‘यो संसद्को मर्यादाविपरीतको कार्य हो । यसमा उचित निर्णय लिन जरुरी छ ।’

काठमाडौं । राष्ट्रिय स्वतन्त्र पार्टी (रास्वपा) ले भिजिट भिसा प्रकरण छानबिनको माग गर्दै संसदमा विरोध गर्दै आइरहेको छ। गृह मन्त्रालय अन्तर्गतको त्रिभुवन अन्तर्राष्ट्रिय विमानस्थल अध्यागमन कार्यालयका कर्मचारीले संगठित रूपमा पैसा उठाएको विषय भिजिट भिसा प्रकरणका रूपमा चर्चित छ।

भिजिट भिसा प्रकरणमा गृहमन्त्री रमेश लेखकको राजीनामा र छानबिन समिति बनाउन माग गर्दै रास्वपाले बैठक अवरोध गर्दै आइरहेको छ। रास्वपाले संसदमा नाराबाजी र वेल घेराउ गर्दै आइरहेको छ। यसैबीच आज (मंगलबार) संसद भवन प्रवेश गर्नुअघि रास्वपाले विरोधको फरक शैली अपनाएको छ। रास्वपाका सबै सांसदहरूले निलो रङको खादा (रिवन) लगाएर विरोध जनाएका छन्।

‘हामीले रचनात्मक ढंगले कसरी विरोध गर्न सकिन्छ भनेर सोच्यौं,’ रास्वपाका एक सांसदले भने, ‘त्यही अनुरूप हामीले निलो रङको खादा लगाएर विरोध जनाएका छौं ।’ रास्वपाका सांसद तथा कार्यवाहक प्रवक्ता मनीष झाका अनुसार मानव तस्करीविरुद्धको अभियानलाई विश्वभर ‘निलो रिबन’ को प्रतिकले जनाउने भएकाले आफूहरू त्यस्तै गरी प्रस्तुत भएको बताए। रास्वपा गत जेठ १३ गतेदेखि लगातार सदनमा भिजिट भिसा प्रकरणमा गृहमन्त्री रमेश लेखकमाथि छानबिन हुनुपर्ने भन्दै विरोध जनाउँदै आइरहेको छ। तर सत्तापक्षले भने यसलाई इन्कार गरिरहेका छन्। प्रतिनिधि सभाको केहीबेरमा बस्दैछ । बैठकमा जेठ १५ गते पेस भएको बजेटमाथिको छलफल हुनेछ।

जनकपुरधाम । गौशाला नगरपालिकाकी उपप्रमुख रेणु कुशवाहालाई नगरपालिका प्रवेशमा रोक लगाइएको छ। आइतबार उपप्रमुख कुशवाहाले नगर प्रमुख र प्रमुख प्रशासकीय अधिकृतको मिलोमतोमा अनियमितताको लागि दर्ता चलानी खाली राखेको भेटाएपछि दर्ता तथा चलानी किताब खोसेको लगेको समाजिक सञ्जालमा पोष्ट गरेकी थिइन्। सोही विषयलाई लिएर नगर प्रवेशमा रोक लगाएको उपप्रमुख कुशवाहको भनाइ छ।

गौशाला उपप्रमुख कुशवाहाले नगरपालिकामा आफूलाई मेयरको निर्देशनमा नगर प्रहरीले रोक लगाएको भन्दै भिडियो सन्देश जारी गरेकी छन्। भिडियोमा उनी नगरपालिकाको मुख्य गेटमा छिर्न खोज्दा नगर प्रहरीले माथिको आदेश भन्दै उनलाई प्रवेशमा रोक लगाएको देखिन्छ । भिडियोमा नगर प्रहरीले उपमेयरलाई प्रवेश गर्न खोज्दा मूल ढोक बन्द गरेको देखिन्छ । उनले पटक–पटक पत्राचार गरी कागजात उपलब्ध गराउन अनुरोध गर्दा पनि उपलब्ध नगराएको तथा प्रमुख प्रशासकीय अधिकृतलाई अनुगमनको लागि पत्राचार गर्दा पनि जवाफ नपठाएकाले गौशाला नगरपालिकाको दर्ता,चलानी फाइल नियन्त्रणमा लिएको दावी गरेकी छन्।

सोमबार राखिएको कार्यपालिका बैठकमा उपस्थित हुन जाँदा मेयर डा. दिपेन्द्र महतो र प्रमुख प्रशासकीय अधिकृत केशव कुमार अधिकारीको निर्देशनमा नगरप्रहरीले प्रवेश गर्न नदिएको उपमेयर कुशवाहाको भनाइ छ। उनले भिडियोमार्फत् दर्ता चलानीको किताब नियन्त्रणमा लिएपछि आफ्नो कार्यकक्षमा तोडफोड समेत भएको आफूले सूचना पाएको भिडियोमार्फत् जानकारी गराएकी छन्। नगरपालिकामा मेयर डा. महतो र उपमेयर कुशवाहा जसपा नेपालबाट निर्वाचित भएका हुन्। निर्वाचनको केही महिनामै मेयर र उपमेयरबीच खटपट सुरू भएको थियो।

काठमाडौं महानगरपालिकाले आफ्नो क्षेत्रभित्र तीन महिनाका लागि सडक तथा फुटपाथ खन्न पूर्ण रूपमा रोक लगाएको छ ।

महानगरको सार्वजनिक निर्माण विभागले मंगलबार एक सूचना जारी गर्दै असार १ गतेदेखि भदौ मसान्तसम्म नगर पालिका क्षेत्रका सडक तथा फुटपाथ खन्न स्वीकृति दिने कार्य रोकिएको जानकारी दिएको हो ।

सूचनामा भनिएको छ ‘काठमाडौं महानगरपालिका क्षेत्रभित्र मिति २०८२ असार १ गतेदेखि भदौ मसान्तसम्म सार्वजनिक सडक र फुटपाथ खन्न स्वीकृति र सहमति दिने कार्य रोकिएको ब्यहोरा सम्बन्धित सबैको जानकारीका लागि यो सूचना प्रकाशन गरिएको छ ।’

मनसुनको समयमा सडक खन्दा हिलो, खाल्डाखुल्डी र पानी जम्ने जस्ता समस्याले सर्वसाधारणलाई सास्ती हुने तथा दुर्घटनाको जोखिम बढ्ने भएकाले यस्तो निर्णय गरेको हो ।

ताजा अपडेट

Login

कृपया ध्यान दिनुहोस्:

  • अब तपाइले कमेन्ट गर्नका लागि अनिवार्य रजिस्ट्रेसन गर्नुपर्ने छ ।
  • आफ्नो इमेल वा गुगल, फेसबुक र ट्वीटरमार्फत् पनि सजिलै लगइन गर्न सकिने छ ।
  • यदि वास्तविक नामबाट कमेन्ट गर्न चाहनुहुन्न भने डिस्प्ले नेममा सुविधाअनुसारको निकनेम र प्रोफाइल फोटो परिवर्तन गर्नुहोस् अनि ढुक्कले कमेन्ट गर्नहोस्, तपाइको वास्तविक पहिचान गोप्य राखिने छ ।
  • रजिस्ट्रेसनसँगै बन्ने प्रोफाइमा तपाइले गरेका कमेन्ट, रिप्लाई, लाइक/डिसलाइकको एकमुष्ठ बिबरण हेर्नुहोस् ।