२०८३ मंसिर ५ गते शुक्रबार
२०८३ मंसिर ५ गते शुक्रबार

बागलुङ । प्रमुख प्रतिपक्षी नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले विस्तृत शान्ति सम्झौताका अधिकांश काम पूरा भएको बताएका छन् । बाँकी कामलाई पनि छिटै पूरा गर्ने बताएका छन् । ‘जनतासँग माओवादी, मध्यपहाडी लोकमार्ग जनजागरण अभियान’ को क्रममा बागलुङको ताराखोला पुगेका प्रचण्डले ‘जनयुद्ध’ का सहिदलाई ‘राष्ट्रिय सहिद’ घोषणा गर्नु महत्वपूर्ण उपलब्धि भएको बताए । उनले आफ्नो प्रधानमन्त्रीकालमा त्यो निर्णय गरेको बताए । त्यसबाहेक जनयुद्धका धेरै उपलब्धि संस्थागत गर्ने काममा पनि माओवादी नेतृत्वको सरकारले नै काम गरेको बताए ।

प्रचण्डले ताराखोला गाउँपालिका–२ को अर्गलमा निर्मित सहिद तथा बेपत्ता पार्कको उद्घाटन गरेका छन् । जनयुद्धका सहिद र बेपत्ता परिवारलाई सम्मान समेत गरे । उनले सहिद परिवारको जगमा नै नेपालको राजनीतिक परिवर्तन सम्भव भएको भन्दै सहिदलाई बिर्से जस्तो भए पनि इतिहासले फेरि खोज गर्ने बताए । ‘क्रान्ति सकिएको छैन, त्यसैले इतिहासमा सहिदका चिहान खनेर कंकाल निकालेर पनि सम्मान गर्ने दिन आउँछ,’ उनले भने, ‘धैर्य गरेर सहिदका सपना पूरा गर्न लाग्नुपर्छ ।’

जनयुद्धको जगमा संघीय लोकतान्त्रिक गणतन्त्र आएको भन्दै अब राजनीतिक परिवर्तनपछि सामाजिक र आर्थिक समृद्धिमा पनि माओवादीले नै अगुवाई गर्ने प्रचण्डले दाबी गरे । काम गर्दागर्दै बहुमतको दम्भ देखाएर कांग्रेस एमालेले माओवादीको सरकार ढालेको आरोप पनि लगाए । ‘संसारमा पहिलो र दोस्रो दल मिलेर सरकार बनाएको कतै छैन,’ उनले भने, ‘सुशासन दिन खोजेपछि भ्रष्टहरूले सरकार ढलाए ।’

उनले जनयुद्धलाई हिंसा र आतंक थियो भन्नेहरूले जनयुद्धको गतिमा काम गर्न नसक्ने समेत ठोकुवा गरे । ‘जनयुद्ध युगान्तकारी परिवर्तनको घटना थियो, सामाजिक समावेशीकरणको लागि महिला, दलित, उत्पीडितले गरेको विद्रोह थियो,’ उनले भने, ‘राजनीतिक रूपमा प्रशिक्षित र सुझबुझपूर्ण आन्दोलन भएकाले देशलाई परिवर्तन गर्न सफल भयौं ।’ उनले जाली र फटाहाहरूले मात्र जनयुद्धको विरोध गरेको टिप्पणी गरे ।

 

मेष – चु, चे, चो, ला, लि, लु, ले, लो, अ

दिगो योजनाका लागि ऋण लिनुपर्ने हुन सक्छ। अवसरको खोजीमा केही दौडधुप गर्नुपर्ला। देश–विदेशको यात्रा गर्ने प्रक्रिया अघि बढ्न सक्छ। तर करकापमा परी काम वा विशेष निर्णय गर्नुपर्ने परिस्थिति आउन सक्छ। आफ्ना कमजोरीबाट लाभ उठाउनेहरू सक्रिय हुने हुँदा समयमै सावधान रहनुहोला। खर्च लागे पनि लगानी बढाउने अवसर आउन सक्छ।

वृष – इ, उ, ए, ओ, बा, बि, बु, बे, बो

आम्दानीका नयाँ स्रोत फेला पर्नेछन्। पहिले गरेका कामबाट प्रशस्त लाभ हुनेछ। आयआर्जन बढ्ने र उठ्नुपर्ने रकम हातलागी हुने समय छ। कृषि, पशुपालन तथा व्यापारमा प्रशस्त फाइदा हुनेछ। चल-अचल धनको उपयोगबाट फाइदा उठाउन सकिनेछ। गरिएका कर्मको छोटो समयमै उचित प्रतिफल पाइनेछ। नयाँ अवसरबाट लाभ उठाउन सकिनेछ।

मिथुन – का, कि, कु, घ, ङ, छ, के, को, ह

कामको सन्दर्भमा प्रतिष्ठित व्यक्तिहरूसँग सहकार्य गर्ने अवसर जुट्नेछ। दिगो फाइदा हुने काम प्रारम्भ हुन सक्छ। विशेष भेटघाटले काममा उत्साह बढाउला। मिहिनेतले नाम, दाम र इनाम दिलाउन सक्छ। तारिफयोग्य काम गर्दै धेरैको उपकार गर्न सकिनेछ। सामाजिक जिम्मेवारी प्राप्त हुनेछ। आफ्नो वर्ग वा क्षेत्रको नेतृत्व गर्दै विशेष जिम्मेवारी हातपार्न सकिनेछ।

कर्कट – हि, हु, हे, हो, डा, डि, डु, डे, डो

अस्वस्थताले काममा खट्न समस्या पर्नेछ। कमजोरीले चिन्ता बढाउनेछ भने परिस्थितिवश चिताएको काम रोकिन सक्छ। अरूका लागि बुद्धि खर्चनुपर्ला। आफ्ना विषयमा अरूले दाबी गर्न सक्छन्। तापनि सत्कार्यमा शुभचिन्तकहरूको साथ पाइनेछ। लगनशीलताले मात्र संकल्प पूरा गर्न सकिनेछ। प्रयत्न गर्दा समाजसेवामूलक काम सम्पादन गर्न सकिनेछ।

सिंह – मा, मि, मु, मे, मो, टा, टि, टु, टे

स्वास्थ्य कमजोर रहनेछ भने चिताएको नतिजा प्राप्त नहुनाले आर्थिक क्रियाकलापमा बाधा पुग्न सक्छ। गोपनीयता बाहिरिनाले लक्ष्यमा पुग्न अप्ठ्यारो पर्नेछ। तापनि मिहिनेत गर्दा केही काम बन्नेछन्। तत्काल उपलब्धि प्राप्त नभए पनि सम्भावना खोजी गर्ने समय छ। रोकिएको काममा दोहोर्याएर प्रयत्न गर्नुहोला। पछि फाइदा हुने काम प्रारम्भ गर्न सकिनेछ।

कन्या – टो, प, पि, पु, ष, ण, ठ, पे, पो

साथीभाइको आगमनले दिन मनोरञ्जनपूर्ण हुनेछ। रमाइलो यात्रा, जमघट एवं खानपानको आनन्द प्राप्त हुनेछ। पहिलेको सफलताले थप हौसला जगाउनेछ। व्यापार बढ्नाले आम्दानी पनि बढ्नेछ। कमजोरी सुधार्दै जीवनशैलीमा परिवर्तन ल्याउन सकिनेछ। नयाँ कामको प्रस्ताव आउनेछ भने सहयोगीहरू प्रशस्तै भेटिनेछन्। परिवारजनसँग भेटघाट हुनेछ।

तुला – र, रि, रु, रे, रो, ता, ति, तु, ते

पहिलेको सफलताले हौसला जगाउनेछ भने पछिका लागि विशेष काममा जग बसाउने मौका छ। प्रयत्न गर्दा विभिन्न अवसर प्राप्त हुनेछन् र मनग्गे फाइदा उठाउन सकिनेछ। परिश्रम परे पनि लक्ष्य प्राप्त हुनेछ। शत्रु परास्त हुनेछन् भने रोगबाट उन्मुक्ति मिल्नेछ। विवाद तथा मुद्दाहरूमा आफ्नो पक्ष बलियो रहनेछ। प्रतिस्पर्धीहरूलाई समेत पछि पार्न सकिनेछ।

वृश्चिक – तो, ना, नि, नु, ने, नो, या, यि, यु

छिटो फल प्राप्त गर्ने आकांक्षाले समस्या निम्त्याउनेछ। अरूका लागि बुद्धि र श्रम खर्चनुपर्ला। अवसर आए पनि नयाँ काममा हातहाल्नुअघि राम्ररी विचार पुर्याउनुहोला। परिस्थितिसँग सम्झौता गर्नुपरे पनि काम बन्नेछ। समयको मागअनुसार चल्न नसक्दा पछि परिनेछ। बौद्धिक व्यक्तिहरूसँग प्रतिस्पर्धा हुन सक्छ। मेहनत गर्दा अध्ययनमा प्रगति हुनेछ।

धनु – ये, यो, भ, भि, भु, ध, फा, ढ, भे

प्रक्रिया नमिल्नाले काम दोहोर्याउनुपर्ने स्थिति आउन सक्छ। हिस्सेदारसँग असमझदारी बढ्नाले पहिलेको सम्झौता भंग हुन सक्छ। बेसुरमा दिइएको वचनले समस्या निम्त्याउन सक्छ। महत्त्वपूर्ण योजना तत्काल सार्वजनिक नगर्नुहोला। घरायसी आवश्यकता बढ्नाले अर्थ अभाव देखा पर्न सक्छ। फाइदाका लागि साइनो गाँसी नजिकिनेहरूबाट सावधान रहनुहोला।

मकर – भो, ज, जि, खि, खु, खे, खो, गा, गि

सहयोगीहरूले राम्रो साथ दिनाले चिताएका काम सम्पादन हुनेछन्। उद्योग र व्यापारमा विशेष फाइदा उठाउन सकिनेछ। गरिएका कर्मको छोटो समयमै उचित प्रतिफल पाइनेछ। विशेष उपहार समेत हातलागी हुन सक्छ। कृषिमा कामको चाप र चौपायामा केही समस्या देखिए पनि धन आर्जन प्रशस्तै हुनेछ। शत्रु र प्रतिस्पर्धीलाई पछि पार्न सफल भइनेछ।

कुम्भ – गु, गे, गो, सा, सि, सु, से, सो, द

मिहिनेत परे पनि सोचेको नतिजा हातलागी नहुन सक्छ। परिबन्धले काममा बाधा पुर्याउन सक्छ। आफ्नो प्रतिफलबाट अरूले फाइदा उठाउन सक्छन्। अध्ययनतर्फ धेरै समय जुट्न नसकिएला। समयमा वचन पुर्याउन नसक्ता आलोचित भइनेछ। द्विविधा बढ्नाले निर्णायक क्षमता कमजोर बन्नेछ। वादविवादले पनि आँटेका काममा बाधा पुर्याउनेछ। आयस्रोत कमजोर रहने समय छ।

मीन – दि, दु, थ, झ, ञ, दे, दो, च, चि

अप्ठ्यारो परिस्थितिमा पनि काम बन्नेछ। तर ठूलो फाइदा नदेखिएकाले लाभ उठाउन हतार नगर्नुहोला। अरूका लागि बुद्धि खर्चनुपर्नेछ। जीवनशैली व्यस्त रहे पनि कम महत्त्वका काममा समय दिनुपर्ला। चिताएका काममा बाधा पुग्न सक्छ। अवसर प्राप्त भए पनि आत्मविश्वासको कमीले पछि परिनेछ। स्वास्थ्यका लागि आराम र खानपानमा ध्यान पुर्याउनुहोला।

होटलमा बोलाएर गोप्य तस्बिर र भिडियो खिच्ने अनि त्यसैलाई हतियार बनाएर लाखौँ रुपैयाँ असुल्ने योजनामा संलग्न दुई युवतीलाई काठमाडौं उपत्यका अपराध अनुसन्धान कार्यालयले पक्राउ गरेको छ।

सामाजिक सञ्जाल फेसबुकबाट सुरु भएको सामान्य चिनजान अन्ततः ब्ल्याकमेलको हतियार बनेको प्रहरी अनुसन्धानले देखाएको छ।

कार्यालयका प्रवक्ता प्रहरी उपरीक्षक काजीकुमार आचार्यका अनुसार पक्राउ पर्नेमा कैलाली गोदावरी नगरपालिका-१० घर भई हाल काठमाडौं महानगरपालिका-५ बस्दै आएकी ३४ वर्षीय ममता तामाङ र भक्तपुर नगरपालिका-१७ घर भई हाल काठमाडौं-५ बस्दै आएकी ३४ वर्षीय आँचल श्रेष्ठ भनिने ‘आँचल चौगुठी’ रहेका छन्।

दुबैलाई काठमाडौं महानगरपालिका-११ हनुमानस्थानबाट जेठ ७ गते पक्राउ गरिएको आचार्यले बताए।

उनीहरू फेसबुकमार्फत युवतीको फोटो राखेर पुरुषहरूलाई सम्पर्कमा ल्याउँथे। सुरूमा साधारण कुराकानी गर्दै उनीहरूले आफूप्रति आकर्षण जगाउँथे।

अनि बिस्तारै सम्बन्ध प्रगाढ बनाउँदै जान्थे। सम्बन्ध बलियो बनाएपछि होटल वा रिसोर्टमा भेट्न बोलाउँथे। त्यस्ता भेटघाटहरू विशेष रूपमा नियोजित हुने गरेका थिए।

आचार्यका अनुसार उनीहरूले होटलमा खाजा, खाना र मदिरासहितको सेवा दिँदै गोप्य रूपमा पीडितको फोटो र भिडियो खिच्थे।

अधिकांश अवस्थामा ती दृश्यहरू आपत्तिजनक हुने गरी खिचिएका हुन्थे। ‘यिनै सामग्रीहरूलाई आधार बनाएर उनीहरूले पीडितमाथि मानसिक दबाब दिन्थे,’ आचार्यले भने, ‘तपाईंको घरपरिवार, कार्यक्षेत्र र सामाजिक सञ्जालमा यिनै तस्बिर सार्वजनिक गरिदिन्छौ भन्दै धम्क्याइन्थ्यो।’

त्यस्ता धम्कीबाट डराएका धेरै व्यक्तिहरू आफैँ सम्पर्कमा आएर रकम बुझाउने अवस्थामा पुग्थे।

काठमाडौंमा भएको पछिल्लो घटनामा ती युवतीले एक व्यक्तिलाई ब्ल्याकमेल गरेर काठमाडौंमा चार आना जग्गा माग गरेका थिए। पाँच लाख रुपैयाँ बराबरको चेक लिइसकेको प्रहरी अनुसन्धानबाट खुलेको छ।

प्रहरीका अनुसार, उनीहरूको साथबाट विभिन्न कम्पनीका दुई वटा मोबाइल फोन बरामद गरिएको छ, जसमा अनुसन्धानका लागि आवश्यक डिजिटल प्रमाणहरू संकलन भइरहेको छ।

प्रहरीका अनुसार घटनामा संलग्न दुवै युवतीले पछिल्लो समय सामाजिक सञ्जालमा सक्रियता बढाएका थिए। उनीहरूले फेसबुकमार्फत रोजगारी वा सम्बन्धको झुठो प्रस्ताव गरेर लक्षित व्यक्तिहरूसँग सम्पर्क बनाउँथे। अनि व्यक्तिगत भेटघाटमा पुगेर उनीहरूलाई फसाउने योजनामा संलग्न हुन्थे।

प्रहरीले यो घटनालाई ‘हनी ट्रयाप’ अर्थात भावनात्मक सम्बन्धको जालमा पारेर गरिने ठगीको आधुनिक स्वरूपको रूपमा व्याख्या गरेको छ। काठमाडौं उपत्यकामा पछिल्ला वर्षहरूमा सामाजिक सञ्जाल र डिजिटल मिडिया प्रयोग गरेर ठगी गर्ने घटनाहरू बढ्दो क्रममा छन्।

आचार्यका अनुसार हालसम्म यो गिरोहले कति जनालाई निशाना बनाएको भन्ने विषयमा अनुसन्धान भइरहेको छ। उनले भने, ‘गोप्य फोटो र भिडियो खिचेर ब्ल्याकमेल गर्ने प्रवृत्ति खतरनाक रूपमा विस्तार भएको छ। यस्तो प्रवृत्तिबाट जोगिन सबै नागरिक सचेत हुनु आवश्यक छ।’

पक्राउ परेका युवतीलाई थप अनुसन्धान तथा कारबाहीको लागि जिल्ला प्रहरी परिसर काठमाडौं पठाइएको छ।

 सुदूरपश्चिम प्रदेशको बैतडी जिल्लामा आज बिहान १२ मिनेटको छोटो अन्तरालमा दुई पटक भूकम्पको धक्का महसुस गरिएको छ ।

सुर्खेतस्थित भूकम्प मापन केन्द्रका प्रमुख चिन्तन तिमल्सिनाका अनुसार, पहिलो भूकम्प बिहान १:४८ बजे सदरमुकाम खलंगालाई केन्द्रविन्दु बनाएर ५.१ रेक्टर स्केलको गएको थियो । त्यसको ठीक १२ मिनेटपछि, बिहान २:०० बजे पुनः सोही क्षेत्र आसपास केन्द्रविन्दु भई ३.७ रेक्टर स्केलको अर्को भूकम्प गएको हो ।

मध्यरातमा लगातार दुई पटक भूकम्पको कम्पन महसुस भएपछि स्थानीय बासिन्दा त्रसित हुँदै घरबाहिर निस्किएका थिए । भूकम्पको धक्का बैतडीसँगै सीमा जोडिएका दार्चुला, बझाङ र डडेल्धुरा जिल्लामा समेत महसुस गरिएको केन्द्र प्रमुख तिमल्सिनाले जानकारी दिए । हालसम्म भूकम्पबाट भएको मानवीय तथा भौतिक क्षतिको यकिन विवरण प्राप्त भइसकेको छैन ।

स्थानीय प्रशासन र सुरक्षा निकायले सम्भावित क्षतिको विवरण संकलन गरिरहेको बताइएको छ । लगातारको कम्पनले नागरिकमा त्रास छाएको छ भने क्षतिको पूर्ण विवरण आउन केही समय लाग्ने अनुमान गरिएको छ ।

 

काठमाडौं । सरकारले आगामी जेठ १५ गते राजावादीहरूलाई प्रदर्शनका लागि दिइएको छुटलाई कमजोरी नठान्न चेतावनी दिएको छ । सञ्चारमन्त्री पृथ्वीसुब्बा गुरुङले राजावादीहरूले संविधान विरोधी गतिविधि गरिरहेको समेत बताएका छन् ।

मन्त्रिपरिषद्को निर्णय सार्वजनिक गर्न आयोजित पत्रकार सम्मेलनमा बोल्दै संविधानले नै राजतन्त्रको पक्षमा लाग्ने, मुलुक विखण्डनतिर लाने कुरा संविधान विरोधी भनेको बताए । उनले भने, ‘प्रजातन्त्र, लोकतन्त्र र गणतन्त्र विरोधी हो । त्यसैले उहाँहरूले संविधानभित्र रहेर गतिविधि गर्नुपर्छ । अहिले जसरी संविधान विरोधी क्रियाकलाप बढिरहेको छ, हत्या, हिंसा, लुटपाट र आगजनीबाट सरकारलाई चुनौती दिँदै राजा ल्याउने प्रयास भइरहेको छ ।’

जेठ १५ गते राजतन्त्र अन्त्य भएर संघीय लोकतान्त्रिक गणतन्त्रात्मक शासन व्यवस्था स्थापना भएको ऐतिहासिक दिनको रूपमा सरकारले भव्य रूपमा मनाउन लागेको बताए। उनले भने, ‘त्यो दिनमा गणतन्त्रविरुद्ध राजावादीहरूले चुनौती दिने फेरि प्रयास गरेका छन्, हामीले उहाँहरूलाई सभा सञ्चालन गर्ने र बोल्ने अधिकार दिएका छौं । त्यो हाम्रो कमजोरी होइन, हामी डराएका होइन । उदारतापूर्वक अभ्यास गरौं भनेर छाडेका हौं । तर सधैँ यस्तो गतिविधि गरिरहे सरकार सधैँ टुलुटुलु हेरेर बस्दैन । प्रतिवाद हुन्छ। त्यो गतिविधिले कस्तो रूप लिन्छ त्यही अनुसार सरकारले प्रतिवाद गर्छ ।’ उनले राजावादीहरूको गतिविधिलाई प्रतिबन्ध लगाउनु संवैधानिक छुट भए पनि आजको दिनसम्म नलगाएको बताएका छन् ।

काठमाडौं । काठमाडौं मेडिकल कलेज केएमसीमा हाइपरम्याङ्गानेसेमियाको सफल उपचार गरिएको छ । यो नेपालमै पहिलो पटक गरिएको सफल उपचार हो । यो रोग संसारका कमै मानिसमा मात्रै देखिन्छ ।

यही रोगबाट पीडित थिइन् अर्घाखाँचीकी २१ महिनाकी आध्या बिक । दुर्लभ स्नायु सम्बन्धी रोग हाइपरम्याङ्गानेसेमिया बाट पीडित उनको केएमसीमा सफल उपचार गरिएको हो ।

प्रारम्भमा सामान्य रूपमा हिँडडुल गर्न सक्ने बालिका पछिल्लो समय एकाएक हिँड्न नसक्ने अवस्थामा पुगेकी थिइन् । उनको उपचारको लागि परिवारले विभिन्न ठाउँमा उपचार समेत गरेको थियो । तर, उनको विराम निको भएन ।

त्यसपछि उनलाई उपचारका लागि काठमाडौँ मेडिकल कलेज ल्याइएको थियो । उनको पेडियाट्रिक न्युरोलोजिस्ट डा. सन्तोष मिश्रको टोलीले परीक्षण गरेको थियो । परीक्षणपछि उनलाई हाइपरम्याङ्गानेसेमिया भएको पुष्टि भयो । जुन रोग दुनियाँमै अत्यन्तै दुर्लभ मानिन्छ ।

यो रोग मस्तिष्क र स्नायु प्रणालीमा गहिरो असर पार्ने खालको हुन्छ र यसको उपचार अत्यन्तै चुनौतीपूर्ण हुन्छ । यद्यपि डा. मिश्र र उनको विशेषज्ञ टोलीले तत्काल उपचार प्रक्रिया सुरु गरे । केही हप्ताको उपचारपछि आध्या पूर्णरूपमा स्वस्थ भई पुनः हिँड्न सक्ने अवस्थामा पुगेकी छिन् ।

“छोरी कहिल्यै हिँड्न सक्दिन कि भनेर डराएका थियौँ, तर डा. सन्तोष मिश्रज्यूले आशाको उज्यालो फर्काइदिनुभयो,” आमा मनीषा विकले भनिन् ।

नेपालमा बाल न्युरोलोजी सेवा अझै प्रारम्भिक चरणमा रहेको बेला, यति जटिल रोगको सफल पहिचान र उपचार ऐतिहासिक मानिएको छ । डा. मिश्र बालबालिकामा देखिने मस्तिष्क, स्नायु प्रणाली, विकासजन्य विकार र मिर्गौला सम्बन्धी समस्याका विशेषज्ञ हुन् ।

केएमसीको यो सफलता नेपाली कांग्रेसका युवा नेता तथा प्रतिनिधिसभाका सांसद डा. सुनिल शर्माको नेतृत्व र दूरदृष्टिको प्रतिफल हो। केएमसी डा. शर्माको स्वामित्वमा रहेका प्रतिष्ठित संस्थाहरूमध्ये एक हो, जसलाई उनले चिकित्सा सेवामार्फत सामाजिक सेवा र जनकल्याणको केन्द्रबिन्दुमा रूपान्तरण गरेका छन्।

डा. शर्मा प्रतिनिधिसभाका तलब–भत्ता नलिने एक मात्र सांसद हुन्। उनी सुदूरपूर्वदेखि सुदूरपश्चिमसम्म निःशुल्क स्वास्थ्य शिविरहरू सञ्चालन गर्दै आएका छन्। यस्ता शिविरहरूमा उपचार सम्भव नभएका बिरामीलाई काठमाडौं मेडिकल कलेज वा नोबेल मेडिकल कलेजमा ल्याई निःशुल्क उपचारको व्यवस्था मिलाउने कार्य निरन्तर भइरहेको छ।

उनकै पहलमा नोबेल मेडिकल कलेजमा आफ्नै निर्वाचन क्षेत्रका लागि समर्पित ५० शय्याको निःशुल्क क्याबिन स्थापना गरिएको छ। पार्टी वा पहिचानको आधारमा नभई सबै नेपालीलाई समान रूपमा सेवा पुर्‍याउने प्रतिबद्धता उनले जनाएका छन्।

हालै उनले मोरङको बेलबारीमा एम्बुलेन्स हस्तान्तरण गरेका छन्, साथै देशका सात विभिन्न स्थानमा निजी पहलमा एम्बुलेन्स उपलब्ध गराइसकेका छन्। उनका यी मानवीय कार्यहरूले “नेता भनेको जनताको साँचो अभिभावक हो” भन्ने सन्देशलाई बलियो बनाएका छन्।

काठमाडौँ । नेपाली बजारमा सुनको मूल्य बढेको छ । तोलामा एक हजार ७ सय रुपैयाँले बढेर आज प्रतितोला १ लाख ९१ हजार ५ सय रुपैयाँमा कारोबार भइरहेको नेपाल सुनचाँदी व्यवसायी महासंघले जनाएको छ । 

बुधवार भने सुन प्रतितोला १ लाख ८९ हजार ८ सय रुपैयाँमा कारोबार भएको थियो।

यस्तै, चाँदी मूल्य पनि बढेको छ । ३५  रुपैयाँले बढेर आज प्रतितोला २ हजार २५ रुपैयाँमा खरिदबिक्री भइरहेको महासंघले जनाएको छ। बुधवार १ हजार ९ सय ९० रुपैयाँ कायम भएको थियो ।

मकवानपुर । पेट्रोलियम पदार्थ डिजेललाई तेल भनेर कराइमा हाल्दा आगो सल्किएको छ । मकवानपुरको हेटौंडा-८ कमानेस्थित नमुना टोलमा बुधबार साँझ भएको आगलागीमा दुई जना घाइते भएका छ्न् ।

पर्सा, वीरगञ्ज महानगरपालिका-३० घर भई हाल डेरा गरी बस्दै आएका सलाउदिन देवानकी १३ वर्षीया छोरी असिया खातुनले मासु पकाउने क्रममा गल्तीवश डिजेल हाल्दा आगो लागेको हो ।

आगो लागेपछि उनको अनुहार, हात, पिठिउँ र खुट्टा जलेको छ भने उनीसगै बस्ने भारत बिहार राज्य, मोतिहारी जिल्लाकी २५ वर्षीया अफ्रिदा खातुन सामान्य घाइते भएकी छिन् ।

इलाका प्रहरी कार्यालय पशुपतिनगरबाट प्रहरी निरीक्षक विमला कुमारी कठायतको नेतृत्वमा खटिएको प्रहरी टोलीले आगो नियन्त्रणमा लिएर घाइतेहरूलाई उपचारका लागि हेटौंडा अस्पताल पठाएको छ ।

आगलागीबाट काठको ढोका, धान, चामल र लत्ताकपडा जलेर अन्दाजी बीस हजार रुपैयाँ बराबरको क्षति भएको प्रहरीले जनाएको छ ।

‘पोखरा विमानस्थलको स्थलगत अध्ययन तथा अनुगमन प्रतिवेदन’ अख्तियार दुरुपयोग अनुसन्धान आयोगमा पठाइएको छ ।

विमानस्थल निर्माणको क्रममा प्रारम्भदेखि नै आर्थिक तथा प्राविधिक भ्रष्टाचार भएको भन्दै लेखा समितिअन्तर्गत उपसमितिले तयार गरेको प्रतिवेदनमा आवश्यक भाषागत सुधार गरेर थप अनुसन्धान तथा कारबाहीका लागि पठाउनेगरी लेखा समितिले बुधबार निर्णय गरेको हो । योसँगै करिब १० महिनादेखि समितिमा चल्दै आएको एउटा बहस अन्त्य भएको छ ।

राष्ट्रिय प्रजातन्त्र पार्टी (राप्रपा)का अध्यक्षसमेत रहेका राजेन्द्र लिङ्देनको संयोजकत्वमा रहेको उक्त उपसमितिले वैशाख १५ गते उक्त प्रतिवेदन समिति सभापति ऋषिकेश पोखरेललाई बुझाएको थियो । उक्त प्रतिवेदनमा उल्लेख भएकोमध्ये विमानस्थल निर्माणका क्रममा भ्रष्टाचार भएको विषयमा उपसमिति र लेखा समितिका सम्पूर्ण एकमत थिए । तर, जसरी प्रतिवेदनमा नाम उल्लेख गरियो त्यसमा उपसमितिका सदस्य एकमत भएनन् ।

त्यस्तै, प्राविधिक विषयमा भ्रष्टाचार भएको भनेर निष्कर्ष निकालिए पनि प्राविधिकसँग परामर्श नगरिएको तथा उक्त ठेक्का प्रक्रियामा संलग्न रहेका तथा दोषी करार गरिएको भनिएका व्यक्तिलाई सफाइको मौका समेत नदिई प्रतिवेदनमा दोषी देखाइएको भन्दै समितिका केही सदस्यले उक्त प्रतिवेदन जस्ताको त्यस्तै पठाउन असहमति जनाएका थिए । अन्ततः उक्त प्रतिवेदनमा केही भाषा सच्याउने, दोषी भनेर किटान गरिएका नाम हटाउने र प्रतिवेदनमाथि उपसमितिका सदस्यले राखेको फरक मत र समितिमा भएको छलफलमा उठेका फरक मतलाई समेत समेटेर अख्तियारलाई यथाशीघ्र छानबिन गर्न निर्देशन दिने निर्णय बैठकले गरेको छ ।

पोखरा विमानस्थलसम्बन्धी प्रतिवेदनबारे निर्णय गर्न बसेको लेखा समितिको बैठक पाँच घण्टासम्म चल्यो । दिउँसो १ बजेका लागि बोलाइएको बैठक करिब ६ बजेसम्म चलेको हो । बैठकमा जम्मा दुईवटा विषयमा निर्णय गर्नु थियो । पहिलो, उक्त प्रतिवेदनका विषयलाई तत्काल अख्तियारमा पठाउने कि फेरि सम्बन्धित निकायसँग छलफल गरेर मात्रै पठाउने । र दोस्रो, प्रतिवेदनमा दोषी भनेर उल्लेख गरिएका व्यक्तिको नाम नै किटान गरेर जाने कि नाम हटाउने ? यति विषयमा छलफल गर्न बसेको बैठकमा पटक–पटक लफडा सिर्जना भयो ।

सत्तारुढ दल नेकपा एमालेका सांसद रहेका लेखा समितिका सदस्यहरू प्रतिवेदन कारबाहीका लागि पठाउन हतार गर्न नहुने पक्षमा देखिन्थे । त्यसमध्ये गोकुल बाँस्कोटा र तारा लामा तामाङको फरक राय रहेको थियो । त्यसमध्ये बाँस्कोटाले समितिको प्रतिवेदन पूर्ण नभएको भन्दै थप अनुसन्धान गर्नुपर्ने विषय उठाउँदै प्रतिवेदनको समर्थन गरेका थिए भने तामाङले भने त्यसको विषयवस्तुमाथि नै प्रश्न उठाएर हस्ताक्षर गरेका थिएनन् ।

उपसमितिमा प्रतिनिधित्व गर्ने ती सदस्यकै शैलीमा अन्य सांसदसमेत प्रस्तुत भएका थिए । खासगरी एमालेकै सांसद योगेश कुमार भट्टराई तथा अच्युत मैनालीको भनाइ पनि उनीहरूको जस्तै थियो । खासगरी उनीहरू उपसमितिले ठहर गरेअनुसार नै नाम किटान गरेर पठाउन नहुने पक्षमा देखिएका थिए । भट्टराईले विमानस्थलमा ८ जना मात्रै दोषी हुन नसक्ने र नामै किटान गरेर पठाउँदा प्राकृतिक न्यायको सिद्धान्तविपरीत हुने बताए । योगेशले भने, ‘एउटा प्रिजेन्टेसन गरौँ, भन्सार छुट किन दिइयो ? कुनै पनि व्यक्तिलाई दोषी किटान गर्नुअघि उसलाई सफाइको मौका दिने प्राकृतिक न्यायाको सिद्धान्त हो । यसविपरीत हामी जान सक्दैनौं । उपसमितिले दोषी भनिएकाहरूसँग सामान्य छलफल पनि गरेको छैन । त्यसैले दोषी करार गरेर जान मिल्दैन ।’

मैनालीले समेत त्यस्तै धारणा राखेका थिए । उनले उपसमितिको प्रतिवेदन बनाउँदा प्राविधिक र सम्बन्धित व्यक्तिसँग सोधपुछ नगरिएको भन्दै त्यसलाई समेत लिएर मात्रै निर्देशन दिनुपर्ने धारणा राखेका थिए । मैनालीले भने, ‘सरोकारवालासँग पनि राय लिऊँ, नामै किटेर जाँदा समस्या हुनसक्छ, त्यसलाई पनि हटाऊँ । हामीले अन्तर्राष्ट्रिय सम्बन्धलाई पनि विचार गर्नुपर्छ ।’

तर संसदको विपक्षी दलहरू नेकपा माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, एकीकृत समाजवादी र स्वतन्त्र सांसदहरू भने उपसमितिले तोकेका नामै किटान गरेर तत्कालै पठाउनुपर्छ भन्नेमा विपक्षी दल रहेका थिए । यो मामिलामा एकीकृत समाजवादीका प्रेम आले सबैभन्दा बढी कट्टर देखिँदा स्वतन्त्र सांसद अमरेशकुमार सिंह, माओवादीका सांसद अमनलाल मोदी, लेखनाथ दाहाल, रास्वपा सांसद मनीष झालगायत त्यस्तो पक्षमा रहेका थिए ।

सुरुदेखि नै क्यान (नेपाल नागरिक उड्डयन प्राधिकरण) को वर्तमान नेतृत्वप्रति खनिँदै आएका आले सबैको नाम पठाउनैपर्ने पक्षमा थिए । उनले पूर्ववनमन्त्री तथा पर्यटनमन्त्रीको हैसियतले गरेको काममा दोषी देखिए आफू कारबाही भोग्न तयार भएकाले प्रतिवेदनमा उल्लिखित सबैको नामसहित समय तोकेर तत्काल अख्तियारलाई छानबिन गर्न निर्देशन लेखेर पठाउनुपर्ने बताएका थिए ।

आलेलाई खुलेर समर्थन गर्ने सांसद थिए अमरेशकुमार सिंह । समितिले करिब १० महिनासम्म दुःख गरेर बनाएको प्रतिवेदनलाई गिजोल्ने प्रयास गरिएको भन्दै यो आपत्तिजनक भएको उनले बताएका थिए । उनले उपसमितिलाई धन्यवाद दिएर प्रतिवेदनलाई जस्ताको तस्तै पठाउनुपर्नेमा जोड दिएका थिए ।

काठमाडौं । प्रमुख प्रतिपक्षी नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले नेपाल समाजवादी पार्टी (नयाँ शक्ति) का अध्यक्ष डा. बाबुराम भट्टराईलाई ‘सबैभन्दा बुद्धि नभएका डाक्टर’ भन्दै टिप्पणी गरेका छन् ।

रूकुम पश्चिममा बुधबार आयोजित पत्रकार सम्मेलनमा पूर्व सहयात्री डा. बाबुराम भट्टराईसँग पार्टी एकताबारे सोधिएको प्रश्नमा अध्यक्ष प्रचण्डले बाबुरामलाई सबैले ‘बुद्धि नभएको डाक्टर’ भनेर चिन्ने बताउँदै एकता सम्भव नभएको बताएका हुन् । ‘सबैभन्दा बुद्धि नभएको डाक्टर भनेर चिन्छन् मान्छेले । त्यस्तासँग के गरी एकता गर्ने ?,’ उनले भने ।

उनले पार्टी एकता गर्ने भनेरै अघिल्लो निर्वाचनमा आफू गोरखाबाट लडेको बताएका छन् । ‘गोरखाबाट लड्दा नारायणकाजी कमरेड, म, बाबुरामलगायतले अब यो चुनाव मात्रै होइन पार्टी पनि एउटै बनाउने भनिएको थियो। तर उहाँ पछि कम्युनिष्टको नाम सुन्न चाहनु भएन। कम्युनिष्ट पार्टीको नाम राख्ने हो भने म एकता गर्दिनँ भनेपछि के गर्ने ? बाबुरामका लागि मर्ने ?,’ प्रचण्डले भने।

उनले बाबुराम खिइँदै खिइँदै गएर प्रतिक्रियावादीसँग मिल्न गएको समेत उनले आरोप लगाए । ‘कम्युनिष्ट पार्टी नभन्ने, माक्र्सवाद नभन्ने रे त्यस्तोसँग के गरी एकता गर्ने ? खिइँदा खिइँदै अब त पूरै प्रतिक्रियावादीसँग गएर मिल्नु भएको छ । प्रतिक्रियावादीले पनि पत्याउँदैनन् आजभोलि । हाँसोको पात्र भएका छन् बाबुराम देशभरि । कस्तो बुद्धि नभएको डाक्टर,’ प्रचण्डले भने । उनले बाबुरामसँग भएकाहरू माओवादी केन्द्रमा फर्किने समेत दाबी गरे ।

ताजा अपडेट

Login

कृपया ध्यान दिनुहोस्:

  • अब तपाइले कमेन्ट गर्नका लागि अनिवार्य रजिस्ट्रेसन गर्नुपर्ने छ ।
  • आफ्नो इमेल वा गुगल, फेसबुक र ट्वीटरमार्फत् पनि सजिलै लगइन गर्न सकिने छ ।
  • यदि वास्तविक नामबाट कमेन्ट गर्न चाहनुहुन्न भने डिस्प्ले नेममा सुविधाअनुसारको निकनेम र प्रोफाइल फोटो परिवर्तन गर्नुहोस् अनि ढुक्कले कमेन्ट गर्नहोस्, तपाइको वास्तविक पहिचान गोप्य राखिने छ ।
  • रजिस्ट्रेसनसँगै बन्ने प्रोफाइमा तपाइले गरेका कमेन्ट, रिप्लाई, लाइक/डिसलाइकको एकमुष्ठ बिबरण हेर्नुहोस् ।