नेकपा (एमाले) का अध्यक्ष एवं पूर्वप्रधानमन्त्री केपी शर्मा ओलीले देशविरुद्ध प्रतिक्रियावादी शक्तिहरू सल्बलाएको भन्दै त्यसलाई परास्त गर्ने दाबी गरेका छन् । मदन भण्डारी फाउन्डेसनद्वारा आयोजित कार्यक्रमलाई सम्बोधन गर्दै उनले एमालेलाई कमजोर नठान्न चेतावनी दिए ।

‘हामी मरेका छैनौँ, फेरि उठ्छौँ र प्रतिक्रियावादीहरूलाई परास्त गर्छौँ,’ अध्यक्ष ओलीले भने, ‘धुलो टक्टक्याउँदै फेरि उठ्छौँ र अग्रगामी परिवर्तनतर्फ अघि बढ्छौँ ।’ उनले वर्तमान सरकार र त्यसका गतिविधिहरूप्रति कडा आपत्ति जनाए । असंवैधानिक ढंगले संसद् विघटन गरी चुनावमा गएको प्रसंग उठाउँदै उनले त्यस समयमा वामपन्थी शक्तिहरूबीच एकता हुन नसकेको स्मरण गरे ।

‘हामीले चुनाव रोकौँ भन्दा सबैले एमालेका लागि भिर हो, हाम्रा लागि हाइवे हो भन्ने ठाने,’ उनले भने, ‘त्यो चुनाव वामपन्थी र लोकतान्त्रिक शक्तिहरूका लागि थिएन, किनकि परिणाम पहिले नै तय भइसकेको थियो । अहिले पनि प्रतिगमनको सिलसिला जारी छ ।’

ओलीले भदौ २३–२४ मा भएको आन्दोलन प्रतिगामी षड्यन्त्र भएको दाबी गरे । ‘त्यस षड्यन्त्रले वैधानिक सरकारलाई अवैध ढंगले विस्थापन गर्‍यो। त्यो लोकतान्त्रिक आन्दोलन हुनै सक्दैन,’ ओलीले भने, ‘असंवैधानिक ढंगले संसद् भंग गरेर, वैधानिक सरकार भंग गरेर असंवैधानिक सरकार गठन गर्न पाइँदैन। तर नेपालमा त्यो भयो।’