सेनाको पृतना अब सबै प्रदेशमा

0
296

काठमाडौं, १८ जेठ । राज्यको संघीय संरचनाअनुसार नेपाली सेनाले दुईवटा पृतना थप्ने तयारी गरेको छ। दुई साताअघि बसेको मन्त्रिपरिषद् बैठकको निर्णयअनुसार सेनाले पृतना थपको गृहकार्य अघि  बढाएको हो। सरकारले दुई साताअघि मुलुक संघीय संरचनामा गएकाले सेनामा हालको संख्या नबढ्ने गरी सातै प्रदेश र उपत्यकामा एक गरी आठ पृतना बनाउने निर्णय गरेको थियो। नेपाली सेनामा हाल पाँच विकास क्षेत्रमा एक्एक र उपत्यकामा एक गरी ६ पृतना छन्।

पाँच विकास क्षेत्रका पृतना पाँच प्रदेशमा परेपछि प्रदेश नम्बर २ र ५ पृतनाविहीन छन्। अब प्रदेश २ र ५ मा पृतना थप्न लागिएको हो। हाल नेपाली सेनाको प्रदेश १ को इटहरी, ३ को हेटौंडा, ४ को पोखरा, ६ को सुर्खेत र ७ को दिपायलमा पृतना छन् भने उपत्यकामा छुट्टै एउटा पृतना रहेको छ । रक्षामन्त्री बालकृष्ण खाँडले बुधबार रक्षा मन्त्रालयमा आफ्नो कार्यकालको अन्तिम पत्रकार सम्मेलन गर्दै नेपाली सेनाको संगठन मुलुकको संघीय संरचनाको ढाँचामा परिवर्तन भएको बताए।

रक्षा मन्त्रालयले सेना र रक्षा मन्त्रालयको पुनःसंरचनाबारे अध्ययन गर्न पूर्वकामु सचिव देवेन्द्र सिटौलाको संयोजकत्वमा गठित कार्यदलले बुझाएको सुझावमा आधारमा मन्त्रिपरिषदमा प्रस्ताव पेस गरेको थियो। यसअघिको सरकारमा भीम रावल रक्षामन्त्री हुँदा गठित पूर्वरक्षा सचिव वामनप्रसाद न्यौपाने नेतृत्वको कार्यदलले सेनाको पुनःसंरचनाबारे सुझाव दिएका थिए। तर त्यसलाई अघि बढाइएको थिएन। खाँड रक्षामन्त्री भएपछि उनले सिटौलाको नेतृत्वमा अर्को कमिटी गठन गरे, जसले सेनाकै प्रस्तावअनुसार सुझाव दिएको थियो। सैनिक मुख्यालयले पनि सैनिक संगठन पुनःसंरचनामा आफ्ना तर्फबाट हरेक प्रदेश र उपत्यकामा एक पृतनाको प्रस्ताव पठाएको थियो ।

पृतनाको संख्या बढेसँगै अब उपरथीको संख्या बढ्नेछ। ‘नेपाली सेनाको बढ्दैन, तर केही पदहरू भने बढ्नेछन्,’ पत्रकार सम्मेलनमा रक्षा मन्त्री खाँडले भने, ‘नेपाली सेना लोकतान्त्रिक मूल्यमान्यता र विधिमा चलेको छ, यो अत्यन्तै व्यावसायिक र अनुशासित संठगन हो।’ पृतनाको जिम्मा सेनामा उपरथीले पाउँदै आएका छन्। सेनामा हाल दुई रथी, १९ उपरथी र ७० सहायक रथी छन्।