सोमालियामा अझै पनि ६२ लाख नागरिक खाद्य असुरक्षाको समस्यामा : राष्ट्रसङ्घ ।

0
299

मोगादिसु (सोमालिया), १५ भदौ । सोमालियामा अझै पनि ६२ लाख नागरिकले खाद्य असुरक्षाको समस्याबाट गुज्रँदै आएको संयुक्त राष्ट्रसङ्घ खाद्य सुरक्षा तथा पोषण अन्वेषण एकाईले बिहीबार जनाएको छ ।

यद्यपि उक्त रिपोर्ट यसअघिको तथ्याङ्क ६७ लाखबाट झरेको राष्ट्रसङ्घले जनाएको छ । तथ्याङ्कले खाद्य असुरक्षाको अवस्थामा सामान्य सुधार आएको देखाए पनि सोमालियामा अहिले पनि नागरिक सामान्य अवस्थाबाट जीविका चलाउन नसकेको अध्ययन प्रतिवेदनले देखाएको छ ।

गत जुन र जुलाईमा गरिएको आवधिक अध्ययनबाट प्राप्त तथ्याङ्क अनुसार सोमालियामा ३१ लाख नागरिकले डिसेम्बरसम्म तीब्र खाद्य सङ्कट वा सङ्कटकालिन खाद्य असुरक्षाको स्थिति झेलेका पाइएकोे छ ।

त्यस्तै थप ३१ लाख सोमालियाली जनसङ्ख्यामा पनि खाद्य असुरक्षाको तनावको घेरामा रहेको राष्ट्रसङ्घीय एकाईले बताएको छ । यसरी अहिले पनि ठूलो सङ्ख्यामा नागरिकमा खाद्य असुरक्षाको समस्या हुनु असामान्य स्थिति भएको राष्ट्रसङघले ठहर छ ।

सोमालियामा यसबर्षको शुरुमा नै परेको खडेरी पनि सुरक्षित खाद्यान्न व्यवस्थापनका लागि जिम्मेवार भएको अध्ययनको ठम्याई छ । ठूलो सङ्ख्यामा द्वन्द्वबाट विस्थापित भई आन्तरिक तथा बाह्य रूपमा शरणार्थी जीवन विताइरहेका र यसले गर्दा खेतीयोग्य भूमिपनि बाँझो बनेको खाद्यान्नमा परनिर्भर रहनुपर्ने बाध्यता पनि खाद्य असुरक्षाको प्रमुख कारक रहेको अध्ययनको ठहर छ ।