काठमाडौँ । नेकपा एमालेको अध्यक्षमा केपी शर्मा ओली विजयी भएका छन् ।
काठमाडौँमा सम्पन्न ११ औँ राष्ट्रिय महाधिवेशनबाट ओली अध्यक्षमा निर्वाचित भएका हुन् ।
ओलीले १६ सय ६३ मत पाएर अध्यक्ष चुनिँदा अर्का प्रत्याशी ईश्वर पोखरेलले ५६४ मत पाए । ओली लगातार तेस्रो पटक एमाले अध्यक्षमा निर्वाचित भएका हुन् ।
आज बिहान सम्पन्न मतदानमा दुई हजार २२७ जनाले मतदान गरेका थिए । महाधिवेशनमा दुई हजार २६३ प्रतिनिधि मतदाता रहेका थिए ।
एमालेमा नयाँ नेतृत्वका लागि बुधवार बिहानदेखि सुरु भएको मतदान आज बिहान ७ः०० बजे सम्पन्न भएको थियो । मतदानमा ८० वटा विद्युतीय भोटिङ मेसिन प्रयोग गरिएका थिए ।
