काठमाडौं । नेपाली कांग्रेसका सभापति गगनकुमार थापाले विशेष महाधिवेशन कुनै पनि विवादको विषय नभएको स्पष्ट पारेका छन् ।
निर्वाचन आयोगले संविधान, प्रचलित कानून र पार्टी विधानअनुसार निर्णय गरेकोप्रति आभार व्यक्त गर्दै उनले यसलाई कांग्रेसमा सार्थक परिवर्तनको साझा उपलब्धि भएको बताए ।
सभापति थापाले जारी गरेको प्रेस विज्ञप्तिमा नेपाली कांग्रेस अब कुनै एक नेताको चाहनाले होइन, आम सदस्यको चाहनाले चल्ने र बन्ने पार्टीका रूपमा स्थापित भएको उल्लेख छ । ‘नेपाली कांग्रेस आफ्नो मूल जरा, मूल्य–मान्यता र आदर्शमा फर्किएको छ,’ विज्ञप्तिमा भनिएको छ।
विशेष महाधिवेशनमा सहभागी भए–नभएका, सहमत भए–नभएका सबै नेता, कार्यकर्ता तथा शुभेच्छुकलाई संयमित, जिम्मेवार र एकतावद्ध रहन आग्रह गर्दै थापाले यस प्रक्रियालाई जय–पराजयको रूपमा नलिन आग्रह गरेका छन् । उनका अनुसार कांग्रेस अब नवीन ऊर्जा र एकतासहित रूपान्तरणको दिशामा अघि बढिसकेको छ र रिफर्मको यात्रा सुरु भइसकेको छ ।
सभापति थापाले आशन्न निर्वाचनमा उच्च आत्मविश्वास र व्यापक तयारीका साथ एकढिक्का भएर लाग्नुपर्ने आवश्यकता औंल्याएका छन् । साथै, पार्टीका पूर्व सभापति शेरबहादुर देउवा लगायत विभिन्न तह र निकायमा रहेका नेताहरूबाट यो लोकतान्त्रिक प्रक्रियालाई सहज रूपमा स्वीकार गर्दै पूर्ण साथ रहने विश्वास व्यक्त गरेका छन् ।
विज्ञप्तिमा आजबाट नेपाली कांग्रेसमा कुनै गुट नरहने र गुटगत भागबण्डा नहुने स्पष्ट पारिएको छ । ‘जिम्मेवारी फरक हुन सक्छ, तर भुइँ तहका सदस्य र केन्द्रीय सभापतिको हैसियत समान हुनेछ,’ थापाले उल्लेख गरेका छन् ।
नेपाली कांग्रेस आम मानिसको सार्वजनिक पूँजी भएको उल्लेख गर्दै सभापति थापाले देशभित्र र बाहिर रहेका लाखौं शुभेच्छुकलाई परिवर्तनको यात्रामा साथ दिन आग्रह गरेका छन् । विशेष महाधिवेशनमार्फत विगतका कमजोरीमाथि आत्मआलोचना र समीक्षा गरिएको र उपलब्धिहरूलाई समयानुकूल संस्थागत गर्ने संकल्प लिइएको उनको भनाइ छ ।
सभापति थापाले अब कांग्रेस मूल्य र सिद्धान्तविपरीत कुनै सम्झौता नगर्ने र सत्ताका लागि अप्राकृतिक गठबन्धनको अन्त्य हुने स्पष्ट गरेका छन् । संविधानको रक्षा गर्दै समुन्नतिको नेतृत्व कांग्रेसले गर्ने प्रतिबद्धता पनि उनले गरे ।
