नेपाली कांग्रेसका नेता डा. सुनील शर्माले पार्टीको १५औँ महाधिवेशनमा महामन्त्री पदमा उम्मेदवारी घोषणा गरेका छन्।
शनिबार पार्टी कार्यालय सानेपामा पत्रकार सम्मेलन गर्दै शर्माले कांग्रेसलाई जनतासँग प्रत्यक्ष रूपमा जोड्ने र पार्टी निर्माणमार्फत राष्ट्र निर्माण गर्ने अभियानसहित महामन्त्रीमा उम्मेदवारी घोषणा गरेका हुन्।
शर्माले बदलिँदो राजनीतिक परिस्थितिमा कांग्रेसलाई मुलुकका दूरदराजमा रहेका नागरिकसँग जोड्नुपर्ने आवश्यकता रहेको बताए। दुई छाक खान संघर्ष गरिरहेका तथा सामान्य उपचारसमेत गर्न नसक्ने नागरिकका पक्षमा आफूले गर्दै आएको सामाजिक सेवाको अनुभवलाई राजनीतिक यात्रासँग जोडेर अघि बढ्ने उनको भनाइ थियो।
उनले आफ्नो राजनीतिक यात्रा गिरिजाप्रसाद कोइरालाको नेतृत्वकालदेखि सुरु भएको उल्लेख गर्दै १२ बुँदे समझदारीदेखि लोकतन्त्र पुनःस्थापनाको आन्दोलनसम्म आफूले निर्वाह गरेको भूमिकाको स्मरण गरे। गिरिजाप्रसाद कोइराला नजरबन्दमा रहेका बेला नेपाल, भारत हुँदै अमेरिकासम्म पुगेर लोकतन्त्र पुनःस्थापनाका लागि पहल गरेको उनले बताए।
महामन्त्रीमा उम्मेदवारी दिनुको मुख्य कारण कांग्रेस र दूरदराजका ‘भुइँ मानिस’ बीच प्रत्यक्ष सम्बन्ध स्थापित गर्नु रहेको शर्माले बताए।
‘प्रत्यक्ष रूपमा दूरदराजमा रहेका भुइँ मानिसहरूसँग कांग्रेसको प्रत्यक्ष सम्बन्ध जोड्न, पार्टी बनाउन र देश बनाउने अभियानमा जुट्नका लागि मैले महामन्त्रीमा उम्मेदवारी दिएको हुँ,’ उनले भने।
नेता र जनताबीच बढेको दूरी घटाउनु आफ्नो मुख्य उद्देश्य रहेको उल्लेख गर्दै उनले भने, ‘जनता र नेताबीच रहेको जुन खाडल छ, त्यो खाडल पुर्न आएको हुँ।’
शर्माले आफू कुनै गुट वा समूहको उम्मेदवार नभएको दाबी गरे। सबै महाधिवेशन प्रतिनिधिको साझा उम्मेदवारका रूपमा आफू अघि बढेको उनको भनाइ थियो।
‘मेरा अग्रज, मेरा साथीहरू र मुलुकभित्र तथा बाहिरबाट विभिन्न स्थानबाट आउनुभएका नेपाली कांग्रेसका तमाम महाधिवेशन प्रतिनिधिले यो अभियानमा साथ दिनुहुनेछ भन्ने विश्वास लिएको छु,’ उनले भने, ‘पहिला कांग्रेस बनाउने र कांग्रेस बनिसकेपछि देश बनाउने हाम्रो अभियानमा तपाईंहरूले साथ दिनुहुनेछ भन्ने अपेक्षासहित आज महामन्त्रीको उम्मेदवारी घोषणा गर्दछु।’
शर्माले कांग्रेसभित्रको आन्तरिक मतभेदलाई सामान्य रूपमा लिनुपर्ने बताए। कांग्रेस प्रजातान्त्रिक पार्टी भएकाले सानातिना मतभेद र झैझगडा भइरहने भन्दै त्यसलाई मिलाउनु नेतृत्वको जिम्मेवारी भएको उनले बताए।
‘यसलाई मिलाउने कर्तव्य हाम्रो हो। महामन्त्री भएपछि मेरो पहिलो काम त्यसैमा हुनेछ,’ उनले भने।
उनले पाँचतारे होटलमा बसेर मात्र राजनीति गर्ने नभई हुम्लाको सर्केघाटदेखि ताप्लेजुङको ओलाङचुङगोलासम्म पुगेर हिमाल, पहाड र मधेशलाई जोड्दै कांग्रेसलाई जनतासँग जोड्ने अभियान अघि बढाउने बताए।
‘समाज परिवर्तनका लागि राजनीति मूल बाटो’
बुद्ध दर्शनका विद्यार्थीसमेत रहेको उल्लेख गर्दै शर्माले समाज परिवर्तनका लागि राजनीति आवश्यक माध्यम भएको बताए।
शून्यवादको सिद्धान्तमा कुनै पनि वस्तु वा अस्तित्व एक्लै पर्याप्त नहुने र सबै कुरा परिपूरक तथा सहायक हुने उल्लेख गर्दै उनले समाज परिवर्तनका लागि राजनीतिलाई आफ्नो बाटो बनाएको बताए।
‘समाज बदल्नका लागि ध्यान मात्रै गरेर सम्भव छैन। त्यसले आत्मशान्ति र मानसिक शान्ति सम्भव होला, तर आमूल समाज परिवर्तनका लागि राजनीति नै मूल बाटो हो,’ उनले भने, ‘बुद्धपथलाई अंगाल्दै म राजनीतिमा आएको हुँ र त्यसैका लागि महामन्त्रीमा मेरो उम्मेदवारी हो।’
‘विगतको गौरव फर्काउने र राष्ट्र निर्माण गर्ने महाधिवेशन’
उम्मेदवारी घोषणा क्रममा शर्माले जारी गरेको प्रेस विज्ञप्तिमा कांग्रेसको १५औँ महाधिवेशनलाई नियमित नेतृत्व चयनको प्रक्रियामा मात्र सीमित गर्न नहुने उल्लेख गरिएको छ।
उनले महाधिवेशनलाई कांग्रेसको गौरव, जनविश्वास र जनअपेक्षा पुनःस्थापित गर्दै राष्ट्र निर्माणको नयाँ संकल्प गर्ने अवसरका रूपमा प्रस्तुत गरेका छन्।
विज्ञप्तिमा बीपी कोइरालाले कांग्रेस स्थापना गर्दा नेपाली जनता र देशले पार्टीप्रति राखेको विश्वास, भरोसा र आशालाई पुनःस्थापित गर्नुपर्ने उल्लेख छ।
‘बीपी कोइरालाले नेपाली कांग्रेस स्थापना गर्दा नेपाली जनता र सिंगो देशले नेपाली कांग्रेसप्रति जस्तो विश्वास, भरोसा र आशा राखेका थिए, त्यस्तै आशा, भरोसा, विश्वास र गौरव गर्न लायक पार्टी यो महाधिवेशनबाट हामी बनाउँदै छौँ,’ विज्ञप्तिमा भनिएको छ।
शर्माले विगतका कमजोरीबाट पाठ सिक्दै आगामी पुस्ता र देशको भविष्यलाई केन्द्रमा राखेर पार्टीलाई अघि बढाउने प्रतिबद्धता जनाएका छन्। कांग्रेसका चार पुस्तालाई एउटै यात्रामा जोडेर राष्ट्र निर्माणको अभियानमा अघि बढाउने उनको दाबी छ।
उनले १५औँ महाधिवेशनबाट निर्वाचित हुने नेतृत्वले पार्टी निर्माणलाई राष्ट्र निर्माणसँग जोडेर अघि बढाउनुपर्ने बताएका छन्।
‘महामन्त्री भएर पार्टी बनाउनेछु र पार्टीमार्फत यो राष्ट्र बनाउनेछु। यो देश निर्माणबाहेक मेरो अर्को कुनै ध्येय छैन,’ विज्ञप्तिमा शर्माले भनेका छन्।
शर्मा २०५४ सालदेखि कांग्रेस राजनीतिमा सक्रिय छन्। १३औँ महाधिवेशनदेखि महासमिति सदस्य रहेका उनी स्वास्थ्य, शिक्षा तथा सामाजिक सेवाका क्षेत्रमा पनि सक्रिय छन्।
१५औँ महाधिवेशनका लागि उनी बेलबारी नगरपालिका–४ बाट क्षेत्रीय प्रतिनिधिमा निर्विरोध निर्वाचित भएका थिए। त्यसपछि मोरङ–३ बाट ७९० सदरमतमध्ये ६५० मत प्राप्त गर्दै केन्द्रीय महाधिवेशन प्रतिनिधिमा निर्वाचित भएका थिए। कांग्रेसको १५औँ महाधिवेशन असोज १८ गतेदेखि काठमाडौंमा हुँदैछ।
