मेडिकल व्यवसायी दुर्गा प्रसाईं २ लाख रुपैयाँ धरौटीमा रिहा भएका छन्। जिल्ला अदालत काठमाडौंले विद्युतीय कारोबारसम्बन्धी कसुरमा उनलाई २ लाख रुपैयाँ धरौटीमा रिहा गर्न आदेश दिएको हो।
जिल्ला न्यायाधीश उमेशप्रसाद लुइँटेलको इजलासले मंगलबार प्रसाईंलाई धरौटीमा रिहा गर्ने आदेश दिएको थियो। आदेशपछि उनी केहीबेरअघि अदालतबाट छुटेका हुन्।
प्रसाईंलाई असार १२ गते साइबर ब्युरोले पक्राउ गरेको थियो। राष्ट्रिय स्वतन्त्र पार्टीकी सांसद रचना खतिवडाको उजुरीपछि उनीविरुद्ध विद्युतीय कारोबार ऐनअन्तर्गत मुद्दा दर्ता गरिएको थियो।
प्रसाईंमाथि युट्युबमार्फत सांसद खतिवडाका छोराको मृत्यु र उनको सांसद पदलाई जोडेर अपमानजनक तथा आपत्तिजनक अभिव्यक्ति दिएको आरोप लागेको थियो।
