नेपाली फुटबलको आधिकारिक निकाय अखिल नेपाल फुटबल सङ्घ (एन्फा) निलम्बनमा रहेका बेला सात फ्रेन्चाइज क्लब सम्मिलित निजी समूहले प्राविधिक सहयोग र स्वीकृतिबिनै नेपाल फुटबल लिग (एनएफएल) आयोजना गर्ने घोषणा गरेको छ ।
तेस्रो पक्षको हस्तक्षेपलाई कारण देखाउँदै विश्व फुटबल महासङ्घ (फिफा) ले एन्फालाई निलम्बन गरेको अवस्थामा शुक्रबार काठमाडौँमा पत्रकार सम्मेलन गरी आगामी फागुन १ गतेदेखि नयाँ लिग सञ्चालन गर्ने घोषणा गरिएको हो । लिगको प्रमुखमा ललितपुर सिटी एफसीका मालिक कल्याण गुरुङ र कमिसनरमा राजु घिसिङ रहेका छन् ।
यसअघि नेपाल सुपर लिग (एनएसएल) को आयोजक नेपाल स्पोर्ट्स म्यानेजमेन्टले गत जेठ ३ गते सम्पूर्ण तयारी पूरा भएको जनाउँदै भदौ २० गतेदेखि प्रतियोगिता सञ्चालन गर्ने घोषणा गरेको थियो । सोही दिन प्रबन्ध निर्देशक नियुक्त भएका घिसिङकै नेतृत्वमा घोषणा गरिएको एनएसएल भने सञ्चालन हुन सकेन । आयोजकले प्रतियोगिता हुन नसक्नुको स्पष्ट कारणसमेत सार्वजनिक गरेको छैन ।
नयाँ लिगका प्रमुख गुरुङले सात क्लब मिलेर निजी स्तरमा प्रतियोगिता सञ्चालन गर्न लागेको र एनएसएलसँग अनुमति लिएको दाबी गरे । एन्फा निलम्बनमा रहेको र फुटबल गतिविधि ठप्प भएको अवस्थामा लिग सञ्चालन गर्न लागिएको उनको भनाइ छ । उनले क्लबको जिम्मेवारी छाडेर लिग व्यवस्थापनमा केन्द्रित हुनेसमेत बताए ।
‘नयाँ युगको सुरुवात’ नारा दिइएको प्रतियोगितामा ललितपुर सिटी एफसी, काठमाडौँ रेजर्स, एफसी चितवन, पोखरा थन्डर्स, बुटवल लुम्बिनी, धनगढी एफसी र झापा एफसी सहभागी हुनेछन् । आयोजकका अनुसार क्लब सङ्ख्या बढाएर १० सम्म पुर्याउने तयारी छ ।
कमिसनर घिसिङले चार महिनासम्म चल्ने प्रतियोगिता होम एन्ड अवे प्रणालीमा सञ्चालन गरिने बताए । एन्फाको निलम्बन फुकुवा भएपछि आधिकारिकता लिने उनको दाबी छ । एन्फा निलम्बनकै कारण एनएसएल अघि बढ्न नसकेको उल्लेख गर्दै उनले दुवै लिग सञ्चालन हुने विश्वास व्यक्त गरे ।
एफसी चितवनका मालिक सचिन ढकालले सात क्लब मिलेर ठप्प रहेको नेपाली फुटबललाई चलायमान बनाउन खोजेको बताए । प्रतियोगिता सञ्चालनका क्रममा आउने बाधा क्रमशः समाधान गर्दै जाने उनको भनाइ छ ।
