काठमाडौं । गृहमन्त्री सुधन गुरुङले कानुन कार्यान्वयनमा दह्रोसँग उभिन सुरक्षाकर्मीहरुलाई निर्देशन दिएका छन् ।
जावलाखेलस्थित जिल्ला प्रहरी परिसर ललितपुरको निरीक्षण गर्दै उनले पारदर्शी ढङ्गबाट कार्यसम्पादन गर्न निर्देशन दिएका हुन् ।
मन्त्री गुरुङले ललितपुरको सातदोबाटोस्थित प्रहरी वृत्तको पनि निरीक्षण गरेको जिल्ला प्रहरी परिसरका प्रवक्ता एवं प्रहरी उपरीक्षक गौतम मिश्रले जानकारी दिए ।
गृहमन्त्री गुरुङले आजै रामशाहपथस्थित काठमाडाैं उपत्यका ट्राफिक प्रहरी कार्यालयको पनि निरीक्षण गरेका थिए ।
काठमाडौँ– नेकपा एमालेले पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकको पक्राउ विरुद्ध देशव्यापी विरोधका कार्यक्रम घोषणा गरेको छ ।
उपाध्यक्ष रामबहादुर थापा बादलको अध्यक्षतामा शनिबार बिहान ललितपुरको च्यासलस्थित पार्टी मुख्यालयमा बसेको सचिवालयको आकस्मिक बैठकले उनीहरुकाे तत्काल रिहाइकाे मागसहित चार बुँदे निर्णय गर्दै कानुनी र राजनीतिक रूपमा सशक्त प्रतिवाद गर्ने निर्णय गरेको हो ।
बैठकपछि एमाले महासचिव शंकर पोखरेलले पूर्वप्रधानमन्त्री ओली र पूर्वगृहमन्त्री लेखकको गिरफ्तारी प्रतिशोधपूर्ण र पूर्वाग्रही भएको बताए ।
उनले पार्टी अध्यक्ष ओली र कांग्रेस नेता लेखकलाई सूर्योदय अगावै गरिएको प्रतिशोधपूर्ण, पूर्वाग्रही र गैरकानुनी गिरफ्तारीको एमालेले निन्दा, भर्तसना र विरोध गर्ने बताए ।
बैठकपछि सार्वजनिक गरिएको निर्णय अनुसार एमालेले आमजनसमुदाय, नागरिक समाज र लोकतन्त्र पक्षधर शक्तिहरूसँग सहकार्य गर्दै विरोधका कार्यक्रम अघि बढाउने बताएको छ।
यस्ता छन् एमालेका चार निर्णय
१. आम जनसमुदाय र नागरिक समाजको साथमा कानुनी तथा राजनीतिक रूपमा सशक्त प्रतिवाद गर्ने।
२. प्रत्येक जिल्लाको सदरमुकाममा शनिबार अपराह्न ३ बजे जनसंगठनको तर्फबाट विरोध प्रदर्शन गर्ने।
३. चैत्र १५ गते १२ बजे जिल्ला पार्टी कमिटीको आयोजनामा व्यापक प्रदर्शन गर्दै प्रमुख जिल्ला अधिकारी (प्रजिअ) कार्यालयमा विरोधपत्र बुझाउने।
४. लोकतन्त्र र कानुनी राज्यका पक्षधर दलहरू, नागरिक समाज तथा आमजनसमुदायसँग संवाद र सहकार्य गर्ने।
एमालेले आफ्ना शीर्ष नेताको गिरफ्तारीलाई राजनीतिक प्रतिशोधको रूपमा व्याख्या गर्दै आन्दोलनलाई देशव्यापी बनाउने घोषणा गरेको छ।
गृहमन्त्री सुधन गुरुङले ललितपुरको सातदोबाटोमा रहेको सशस्त्र प्रहरी बलको निरीक्षण गरेका छन् । शनिबार उनले सशस्त्र प्रहरी बलसँगै ललितपुर प्रहरी कार्यालयको समेत निरीक्षण गरेका हुन् ।
मन्त्री आफैं गाडी चलाएर काठमाडौँ र ललितपुरका विभिन्न स्थानको अनुगमनमा निस्केका छन् ।
मन्त्री गुरुङ शनिबार बिहानै पहिला रामहापथस्थित उपत्यका ट्राफिक प्रहरी कार्यालय बग्गीखाना पुगेका थिए । यसैगरी गृहमन्त्री सुधन गुरुङले उपत्यका ट्राफिक प्रहरी कार्यालयको समेत निरीक्षण गरेका छन् ।
गृहमन्त्री सुधन गुरुङले कानूनभन्दा माथि कोही नहुने बताएका छन् ।
पूर्वप्रधानमन्त्री केपी शर्मा ओली र पूर्वगृहमन्त्री रमेश लेखक पक्राउ परेपछि स्टाटस लेख्दै उनले यो प्रतिसोध नभइ न्यायको सुरुवात भएको बताएका छन् ।
‘PROMISE IS A PROMISE : कानुनभन्दा माथि कोही छैन। पूर्वप्रधानमन्त्री केपी शर्मा ओली र निवर्तमान गृहमन्त्री रमेश लेखकलाई नियन्त्रणमा लिएका छौँ’, उनले लेखेका छन्, ‘यो कसैप्रति प्रतिशोध होइन, केवल न्यायको सुरुवात हो ।’
उनले अब देशले नयाँ दिशा दिने पनि बताएका छन् ।
ओली र लेखकलाई प्रहरीले आज बिहानै पक्राउ गरेको हो ।
पूर्व गृहमन्त्री रमेश लेखक पक्राउ
काठमाडौं । पूर्व गृहमन्त्री रमेश लेखक पक्राउ परेका छन् ।
सशस्त्र प्रहरीको सहयोगमा उपत्यका अपराध अनुसन्धान कार्यालयको टोलीले लेखकलाई भक्तपुरको कटुन्जेस्थित निवासबाट प्रहरीले पक्राउ गरेको हो ।
पूर्वगृहमन्त्री लेखकलाई पक्राउका लागि गृह मन्त्रालय जाहेरीकर्ता बनेर पत्र पाएपछि प्रहरीले जेनजी आन्दोलन दमन आरोपमा ज्यानसम्बन्धी मुद्दामा अनुसन्धान सुरु गरेको छ ।
गृहको किटानी जाहेरीपछि प्रहरीले जरुरी पक्राउ पुर्जी दिएर लेखकलाई पक्राउ गरेको हो ।
पूर्व प्रधानमन्त्री केपी ओली पक्राउ
काठमाडौँ । नेकपा एमालेका अध्यक्ष एवम् पूर्व प्रधानमन्त्री केपी शर्मा ओली पक्राउ छन् ।
प्रहरीले ओलीलाई शनिबार भक्तपुरस्थित गुण्डुबाट पक्राउ गरेको हो । प्रहरीले उनलाई जरुरी पक्राउ पुर्जी थमाएको छ ।
भक्तपुर- नेकपा एमालेका सचिव महेश बस्नेतले गौरीबहादुर कार्की आयोग कार्यान्वयन गर्ने सरकारको कुटिल र षडयन्त्रपूर्ण निर्णयले देशलाई द्वन्द्वतर्फ धकेल्ने बताएका छन् ।
सरकारले कार्की आयोगको प्रतिवेदन कार्यन्यवनका लागि सुरक्षाकर्मीको हकमा अर्को कार्यदल बनाएर अध्ययन गर्ने तर राजनीतिक व्यक्तिलाई कारबाही अघि बढाउने निर्णयले कुटिल षडयन्त्रपूर्ण भएको बस्नेतको भनाइ छ ।
सरकारको निर्णय सार्वजनिक भएपछि सामाजिक सञ्जालमा लेख्दै सचिव बस्नेतले यस्तो निर्णयले देशलाई द्वन्द्वतर्फ धकेल्ने उल्लेख गरे।
‘कार्की आयोगको प्रतिवेदन कार्यान्वयनको नाममा यदि सरकारले धरपकड र राजनीतिक बदला लिन खोज्छ भने उसको पहिलो गाँसमा नै ढुंगा पर्ने मात्र होइन’ बस्नेतले भनेका छन्, ‘देशलाई पुन द्वन्द्वतर्फ धकेल्ने जोखिम पैदा गर्छ ।’
सरकारको यस्तो पक्षपाती निर्णय पनि कुनै हालतमा स्वीकार्न नसकिने उनको धारणा छ । ‘न्याय सबैका लागि समान हुनुपर्छ, अन्यथा यसको सशक्त प्रतिरोध अवश्य हुनेछ’, उनले भनेका छन् ।
बस्नेतले सरकारको निर्णयको प्रतिवाद गर्दै सामाजिक सञ्जालमा लेखेका छन्, ‘बालेन नेतृत्वको सरकारले पहिलो क्याबिनेट बैठकमै जेन–जी घटना जाँचबुझका लागि गठित कार्की आयोगको प्रतिवेदनबारे निर्णय गरेछ। सुरक्षाकर्मीको हकमा अध्ययन समिति गठन गर्ने तर तत्कालीन प्रधानमन्त्री, गृहमन्त्री लगायतको हकमा सोझै कार्यान्वयन गर्ने कुटिल र षडयन्त्रपुर्ण निर्णय गरेको भन्ने सुनियो। यदि सरकारले धरपकड र राजनीतिक बदला लिन खोजे उसको पहिलो गाँसमै ढुङ्गा पर्ने मात्रै होइन, देशलाई पुनः द्वन्द्वतर्फ धकेल्ने जोखिम पैदा गर्छ।’
राष्ट्रिय स्वतन्त्र पार्टी (रास्वपा) की सांसद सीता वादीले महिला, बालबालिका तथा ज्येष्ठ नागरिक मन्त्रीको पदभार ग्रहण गरेकी छिन्।
उनी नेपालको वादी समुदायबाट मन्त्री बन्ने पहिलो महिला हुन्। पदभार ग्रहण गरेसँगै उनी भावुक भइन्। आँखाबाट आँसु पुछ्दै उनले भनिन्, ‘सोचेको थिइनँ, यहाँ आइपुग्छु भनेर।’
उनले समाजको जातीय बहिष्करणसँग संघर्ष गर्दै मन्त्री बन्ने अवसर पाउँदा इतिहासमै परिवर्तन आएको महसुस गरेको बताइन्। उनले भनिन्, ‘अब जिम्मेवार भएर समाज रूपान्तरणमा सक्रिय हुनेछु।’
महिला सशक्तीकरणका क्षेत्रमा सामाजिक संस्थामार्फत सेवा गर्दै आएकी नवनियुक्त मन्त्री वादी कर्णाली प्रदेशको सुर्खेतस्थित वीरेन्द्रनगर नगरपालिका-१४ स्थायी घर भएकी हुन्। हाल उनी काठमाडौँको बुढानीलकण्ठ-८ मा बसोबास गर्दै आएकी छिन्।
गरिबी र सामाजिक विभेदका कारण जीवनका प्रत्येक चरणमा पहिचानका लागि संघर्ष गर्दै आएकी उनी रास्वपामा आबद्ध भएकी थिइन्। समानुपातिक प्रणालीबाट सांसद बनेकी उनले १३ वर्षको उमेरदेखि संस्थागत आर्थिक सहयोगमा आफ्नो अध्ययन पूरा गरिन्।
स्नातक तहसम्मको शिक्षा हासिल गरेपछि उनले समाजमा विभेद अन्त्य गर्न र महिला सशक्तीकरणका लागि सामाजिक संस्था सञ्चालन गर्दै आएकी थिइन्। अब मन्त्रालयको नेतृत्व सम्हाल्दै उनले महिला तथा सीमान्तकृत समुदायका समस्याहरू समाधान गर्न बृहत्तर रूपमा काम गर्ने बताएकी छिन्।
शुक्रबार मध्याह्नदेखि दोलखाको लाप्चा क्षेत्रमा सम्पर्कविहीन मुस्ताङ एयरको हेलिकप्टर सुरक्षितभेटिएको छ ।
मुस्ताङ एयरका प्रबन्ध निर्देशक रोनान लामिछानेले हेलिकप्टर दोलखाको लाप्चामा सुरक्षित फेला परेको जानकारी दिए ।
उक्त हेलिकप्टर क्याप्टेन सुरज थापाले उडाएका थिए । दोलखाको लाप्चा क्षेत्र लाङटाङको दक्षिण-पूर्वमा पर्छ । लाप्चा आइपुगेपछि हेलिकप्टर सम्पर्कविहीन भएको थियो ।
क्याप्टेन थापाले उडाएको मुस्ताङ एयरको दर्ता नम्बर ‘९एन-एएनओ’ हेलिकप्टरमा चार यात्रु थिए ।
सरकारले गौरीबहादुर कार्की नेतृत्वको जेनजी आन्दोलनसम्बन्धी जाँचबुझ आयोगले सिफारिस गरेको प्रतिवेदन कार्यान्वयन गर्ने निर्णय गरेको छ ।
प्रधानमन्त्री बालेन्द्र शाहकाे अधयक्षतामा बसेकाे पहिलाे मन्त्रिपरिषद् बैठकले सो निर्णय गरेको हो।
कार्कीको अध्यक्षतामा जेनजी आन्दोलनमा भएका घटनाको विस्तृत अनुसन्धान गर्न आयोग गठन गरिएको थियो।
सरकारका निर्णयबारे जानकारी दिँदै सरकारका प्रवक्ता एवम् शिक्षा मन्त्री सस्मित पोखरेलले आयोगको प्रतिवेदन कार्यान्वयन गर्ने प्रक्रिया सुरु भएको बताएका छन्। उनका अनुसार सुरक्षा निकायसँग सम्बन्धित विषयहरूका लागि आन्तरिक छानबिन समिति गठन गरिनेछ र त्यस समितिको सिफारिसका आधारमा कार्यान्वयन अघि बढाइनेछ।
मन्त्री पोखरेलले अन्य क्षेत्रसँग सम्बन्धित सिफारिसहरू भने आजैबाट लागू हुने स्पष्ट पारे। सरकारले आयोगको प्रतिवेदनलाई चरणबद्ध रूपमा कार्यान्वयन गर्दै जाने तयारी गरेको पनि उनले बताए।
आयोगले तत्कालीन प्रधानमन्त्री केपी शर्मा ओली, गृहमन्त्री रमेश लेखक र आईजीपी चन्द्र कुवेर खापुङसहित सरकारी उच्च अधिकारीलाई कारबाहीको सिफारिस गरेको थियो ।
