जुम्ला । प्रतिनिधिसभा सदस्य निर्वाचनअन्तर्गत जुम्लामा राष्ट्रिय प्रजातन्त्र पार्टी (राप्रपा)का उमेदवार ज्ञानबहादुर (ज्ञानेन्द्र) शाही विजयी भएका छन् । योसँगै राप्रपाले यसपालि जितको खाता खोलेको हो ।
शनिबार (फागुन २३) दिउँसो सार्वजनिक अन्तिम मत परिणामानुसार शाहीले निकटतम प्रतिस्पर्धी नेपाल कम्युनिस्ट पार्टी (नेकपा)का उमेदवार नरेश भण्डारीलाई दुई हजार ९४२ मतान्तरले पराजित गरे । उनले १४ हजार ६५ मत प्राप्त गरे । भण्डारीले ११ हजार १२३ मत ल्याएका निर्वाचन अधिकृतको कार्यालयले जनाएको छ ।
तेस्रो स्थानमा रहेका नेपाली कांग्रेसका उमेदवार दीपबहादुर शाहीले ६ हजार ६६४ मत पाए । नेकपा (एमाले)का उमेदवार शान्तीलाल महत चार हजार २८८ मतसहित चौथो स्थानमा रहे ।
राष्ट्रिय स्वतन्त्र पार्टी (रास्वपा)की उमेदवार विनीता कठायतले ३९८ मत प्राप्त गरिन् । सदरको उनले १० प्रतिशत पनि मत ल्याउन सकिनन् । योसँगै उनको जमानत जफत भएको छ । कठायत यसअघि समानुपातिक सांसद थिइन् ।
गुल्मी । प्रतिनिधिसभा सदस्य निर्वाचन अन्तर्गत गुल्मी क्षेत्र नम्बर १ मा राष्ट्रिय स्वतन्त्र पार्टीका उम्मेदवार सागर ढकाल फराकिलो मतान्तरसहित विजयी भएका छन्।
अन्तिम मत परिणाम अनुसार ढकालले २९ हजार ६४२ मत प्राप्त गरेका छन्। उनका निकटतम प्रतिस्पर्धी नेकपा एमालेका प्रदीप ज्ञवालीले १५ हजार १८१ मत ल्याएका छन् भने नेपाली कांग्रेसका चन्द्र भण्डारीले १३ हजार ५०५ मत प्राप्त गरेका छन्।
ढकालले निकट प्रतिस्पर्धी ज्ञवालीलाई १४ हजार ४६१ मतान्तरले पराजित गर्दै विजय हासिल गरेका हुन्।
यस परिणामसँगै गुल्मी–१ मा राष्ट्रिय स्वतन्त्र पार्टीले उल्लेखनीय सफलता हात पारेको छ। निर्वाचनमा प्रमुख दलका उम्मेदवारहरूबीच प्रतिस्पर्धा भए पनि ढकालले सुरुदेखि नै अग्रता कायम राख्दै अन्ततः फराकिलो मतान्तरसहित जित सुनिश्चित गरेका हुन्।
बाग्लुङ — बाग्लुङ–२ मा रास्वपाका सोम शर्मा विजयी भएका छन् । उनले १२ हजार ६ सय ४७ मत ल्याएर विजयी भएको निर्वाचन अधिकृत भीमप्रसाद सुवेदीले जानकारी दिए ।
शर्माका निकटतम प्रतिद्वन्द्वी कांग्रेसका टेकराज पौडेलले ११ हजार ८ सय ६८ मत ल्याए । नेपाली कम्युनिष्ट पार्टीका ज्ञामनाथ गैरेले १० हजार ७ सय ९ मत पाउँदा एमालेकी मञ्जु शर्माले ७ हजार ८ सय ६४ ल्याइन् ।
पत्रकारिता र सामाजिक अभियान्ताको रुपमा लागेका शर्मा भ्रष्ट्राचार विरोधी अभियानमा सक्रिय थिए । उनी जेन–जी आन्दोलनमा पनि अग्रपंक्ति थिए । साथै, माइतीघरमा हुने अन्य आन्दोलनहरूमा पनि उनी सक्रिय देखिन्थे ।
उनले बाग्लुङ–२ का समस्या समाधानमा काम गर्ने बताएका छन् । यो क्षेत्रमा गत २०७९ को निर्वाचनमा तत्कालिन माओवादीका नेता देवेन्द्र पौडेलले कांग्रेस गठबन्धनबाट जितेका थिए ।
भक्तपुर २ मा ठूलो मतान्तरसहित रास्वपाका राजिव खत्री निर्वाचित भएका छन्। खत्री ४२ हजार ३३३ मतसहित निर्वाचित भएका हुन्।
यहाँ एमाले उम्मेदवार महेश बस्नेतले १० हजार सात सय १७ मत ल्याएका छन्। खत्रीले बस्नेतलाई ३१ हजार ६१६ मतले पराजित गरेका हुन्।
बस्नेतले पराजय स्वीकार गर्दै खत्रीलाई बधाई दिएका छन्।
चितवन- चितवन ३ मा नेपाली कम्युनिस्ट पार्टीकी उम्मेदवार रेनु दाहालले हार स्वीकार्दै आफ्नो निर्वाचन अभियान समाप्त भएको घोषणा गरेकी छन्।
उनले मत परिणामको सम्मान गर्दै विजयी उम्मेदवार राष्ट्रिय स्वतन्त्र पार्टीकी सोबिता गौतमलाई बधाई दिएकी छन्।
दाहालले आफ्नो ३० वर्षे राजनीतिक जीवन र भरतपुरमा ९ वर्ष नगर प्रमुखको रूपमा बिताएको समय जनताको सेवा र क्षेत्रको विकासमा समर्पित भएको बताइन्। उनले मतमा हार भए पनि काम र योगदानद्वारा जनताको मन जित्न सफल भएको अनुभवले उत्साहित राखिरहने उल्लेख गरिन् ।
दाहालले सबै मतदाताहरूप्रति आभार व्यक्त गर्दै आगामी दिनमा चितवनको विकास, समृद्धि र खुशीयालीका लागि निरन्तर काम गर्ने प्रतिबद्धता व्यक्त गरेकी छन्।
यसका साथै, उनले निर्वाचन अभियानमा सक्रिय रहेका पार्टीका नेता, कार्यकर्ता, समर्थक, शुभचिन्तक, मिडिया कर्मी र कलाकारहरूलाई विशेष धन्यवाद दिएकी छन् ।
काठमाडौं । राष्ट्रिय प्रजातन्त्र पार्टी (राप्रपा)का वरिष्ठ उपाध्यक्ष रवीन्द्र मिश्रले दलीय राजनीतिबाट तत्कालका लागि विदा लिने घोषणा गरेका छन् । शनिबार एक प्रेस विज्ञप्ति सार्वजनिक गर्दै मिश्रले पार्टीको सम्पूर्ण जिम्मेवारीबाट राजीनामा दिएको र आगामी दिनमा (गैरदलीय) रूपमा सक्रिय रहने जानकारी दिएका हुन् ।
विगत ९ वर्षदेखि सक्रिय राजनीतिमा रहेका मिश्रले आफ्नो राजीनामा कुनै निराशा वा हतारको निर्णय नभई पर्याप्त सोच-विचारपछि चालिएको कदम भएको बताएका छन् । देशभर राजसंस्थाको पक्षमा बलियो जनमत हुँदाहुँदै पनि राप्रपाले त्यसलाई सङ्गठित र पूँजीकृत गर्न नसकेको उनको निष्कर्ष छ । यस विफलतामा पार्टीको वरिष्ठ उपाध्यक्षको हैसियतले आफू पनि जिम्मेवार रहेको स्वीकार गरेका छन् ।
मिश्रले विज्ञप्तिमा भनेका छन्, ‘विचारभन्दा माथि देश र देशका लागि नरेश भन्ने मूल मन्त्रका साथ संरचनागत पुनरावलोकनबिना बदलिँदो भूराजनीतिमा देश बचाउन कठिन छ । त्यसैले, राजसंस्था पुनर्स्थापना र सुशासनका मुद्दामा मेरा अडानहरू यथावत राख्दै म अब स्वतन्त्र रूपमा आफ्ना विचारहरू मुखरित गरिरहनेछु ।’
आफ्नो राजनीतिक यात्राका क्रममा इमानदारीपूर्वक प्रयास गरे पनि त्यो पर्याप्त नभएको उल्लेख गर्दै मिश्रले व्यक्तिगत स्वार्थभन्दा देशको हितलाई सदैव सर्वोपरि राख्ने प्रतिबद्धता व्यक्त गरे । उनले हालैको निर्वाचनमा सफलता हासिल गरेको राष्ट्रिय स्वतन्त्र पार्टी (रास्वपा) लाई बधाई तथा शुभकामना समेत दिएका छन् । उनी काठमाडौं-१ मा लगातार तेस्रो पटक प्रतिनिधिसभा निर्वाचनमा पराजित भएका थिए ।
म्याग्दीबाट स्वतन्त्र उम्मेदवार डा. महाविर पुन प्रतिनिधिसभा सदस्य निर्वाचनमा निर्वाचित भएका छन् ।
२२ हजार ८५० मतका साथ उनी निर्वाचित भएको मुख्य निर्वाचन अधिकृतको कार्यालयले जनाएको छ । उनका निकटतम प्रतिस्पर्धी नेकपा एमालेका हरिकृष्ण श्रेष्ठले ७ हजार ९१९ मत प्राप्त गरे ।
नेपाली काँग्रेसका कर्णबहादुर भण्डारीले ६ हजार ८८४ र नेपाली कम्युनिष्ट पार्टीका अर्जुन थापाले ३ हजार ५२९ मत प्राप्त गरे । म्याग्दीमा ८६ हजार ३९७ जना मतदाता रहेकोमा ४६ हजार २१५ मत खसेको थियो ।
चितवन । राष्ट्रिय स्वतन्त्र पार्टीका सभापति रवि लामिछाने चितवन क्षेत्र नम्बर २ बाट तेस्रोपटक विजयी भएका छन् । लामिछानेले ५४ हजार ४०२ मत ल्याएर विजयी भएका हुन् ।
उनको निकटतम् प्रतिद्वन्द्वी नेपाली कांग्रेसकी मिना खरेलले १४ हजार ५६४ मत प्राप्त गरिन् । लामिछानेले खरेललाई ३९ हजार ४६८ मतान्तरले पराजित गरेका हुन् ।
काठमाडौं । प्रतिनिधि सभा निर्वाचन २०८२ मा मोरङ ६ मा राष्ट्रिय स्वतन्त्र पार्टीका रूविना आचार्य विजयी भएकी छन् । उनीले ५५ हजार ५१३ मत प्राप्त गरेर विजयी भएकी हुन् ।
निकटतम प्रतिस्पर्धी कांग्रेसका शेखर कोइराला भए । उनले १२ हजार ८५० मत प्राप्त गरेका छन् । शेखरको तुलनामा रविनाले चार गुणा भन्दा बढी मत प्राप्त गरेकी हुन् । रूविनाले शेखरलाई ४२ हजार ६६३ मतान्तरले पराजित गरेकी हुन् ।
काठमाडौं । राष्ट्रिय स्वतन्त्र पार्टी (रास्वपा)ले काठमाडौंका १० निर्वाचन क्षेत्रमै ‘क्लिन स्वीप’ गरेको छ । हरेक क्षेत्रमा रास्वपाले भारी मतान्तरले जित निकालेको छ । कांग्रेस–एमालेसहित उमेदवार फराकिलो मतान्तरसहित पराजित हुँदा प्रतिस्पर्धीहरू धेरैको जमानतसमेत जफत भएको छ । काठमाडौंका २२६ उमेदवारको जमानत जफत भएको छ ।
काठमाडौं–१ मा राष्ट्रिय स्वतन्त्र पार्टी (रास्वपा)की रञ्जु दर्शना निर्वाचित हुँदा कांग्रेस र रास्वपाबाहेक सबै उमेदवारको जमानत जफत भएको छ । कुल २९ हजार ४०० मत सदर भएकोमा दुई हजार ९०० भन्दा कम मत पाउने सबैको जमानत जफत भएको हो । काठमाडौं–१ मा एमाले, नेकपासहित २६ उमेदवारका जमानत जफत भएको छ ।
काठमाडौं–२ मा रास्वपाकै सुनिल केसी फराकिलो मतान्तरसहित निर्वाचित भए । उनले २४ हजार २६९ मत पाउँदा कांग्रेसका कविर शर्माले ६ हजार ९८९ र राप्रपाकी कुन्तिदेवी पोखरेलले चार हजार १३८ मत ल्याएर जमानत जोगाएका छन् । त्यसबाहेकका २५ उमेदवारको जमानत जफत भएको छ ।
काठमाडौं–३ मा रास्वपाकै राजुनाथ पाण्डे १८ हजार ७५७ मतसहित निर्वाचित भए । यहाँ उज्यालो नेपाल पार्टीका कुलमान घिसिङ ११ हजार १७१ मतसहित दोस्रो भए भने कांग्रेसका रमेश अर्याल ६ हजार मत ल्याएर तेस्रो भए । त्यसबाहेक चौथो भएका एमालेका रामेश्वर फुयालसहित १९ जनाको जमानत जफत भएको छ ।
काठमाडौं–४ मा रास्वपाका पुकार बम २३ हजार ४८८ मतसहित निर्वाचित भए । उनीपछि दोस्रो भएका नेपाली कांग्रेसका सचिन घिमिरेले ६ हजार ९५९ मत पाए । तेस्रो भएका एमालेका राजन भट्टराईले पाँच हजार २३७ मत पाएका छन् । त्यसबाहेकका २४ उमेदवारको जमानत जफत भएको छ ।
काठमाडौं–५ मा रास्वपाका सस्मित पोखरेल २७ हजार ४७७ मतसहित निर्वाचित भए । यहाँ दोस्रो भएका कांग्रेसका प्रदीप पौडेलको आठ हजार २११ मत छ । तेस्रो भएका ईश्वर पोखरेल र त्यसपछिका सबै उमेदवारको जमानत जफत भएको छ । यहाँ जमानत जफत हुने उमेदवारको संख्या २४ छ ।
काठमाडौं–६ मा रास्वपाकै शिशिर खनाल निर्वाचित भएका छन् । उनले २७ हजार ७१९ मत ल्याएर निर्वाचित हुँदा कांग्रेसका कृष्ण सवुज बानियाँले ६ हजार ७५१ मत ल्याएर दोस्रो भए । एमालेका अमनकुमार मास्के चार हजार २६८ मतसहित तेस्रो भए । उनीपछि राप्रपाका उद्धवराज भेटवालसहित १७ उमेदवारको जमानत जफत भएको छ ।
काठमाडौं–७ मा रास्वपाका गणेश पराजुली २७ हजार ८०५ मतसहित निर्वाचित भए । दोस्रो भएका कांग्रेसका प्रमोदहरि गुरागाईंले तीन हजार ९८२ मत ल्याएर दोस्रो भए पनि उनको जमानत जोगिएन । उनीसहित २५ उमेदवारको यहाँ जमानत जफत भएको छ ।
काठमाडौं–८ मा रास्वपाकै विराजभक्त श्रेष्ठ २४ हजार ५९२ मतसहित निर्वाचित भए । यहाँ नेकपाका सुमन सायमी तीन हजार २१७ मत ल्याएर दोस्रो भए पनि उनको जमानत जोगिएन । यहाँ कांग्रेसकी सपना राजभण्डारी जोशी र एमालेका राजेश शाक्यसहित २१ उमेदवारको जमानत जफत भएको छ ।
काठमाडौं–९ मा रास्वपाकै डोलप्रसाद अर्याल (डीपी) २७ हजार ४१३ मतसहित निर्वाचित भए । यहाँ कांग्रेसकी नानुमैयाँ बास्तोला चार हजार ४३९ मतसहित दोस्रो भएर जमानत जोगाइन् । त्यसपछिका एमालेका अजयक्रान्ति शाक्यसहित २२ उमेदवारका जमानत जफत भएको छ ।
काठमाडौं–१० मा रास्वपाका प्रदीप विष्ट ३७ हजार ४६९ मतसहित निर्वाचित भए । यहाँ कांग्रेसका हिमाल कार्की आठ हजार एकसय मतसहित दोस्रो भएर जमानत पनि जोगाए । तर, तेस्रो भएका एमालेका विनोद श्रेष्ठले चार हजार ८६४ मत ल्याउँदा उनको जमानत जोगिएन । उनी र नेकपाकी रुपा महर्जन, राप्रपाका बलराम थापासहित २३ उमेदवारको जनमत जफत भएको छ ।
