
काठमाडौं । त्रिभुवन अन्तर्राष्ट्रिय विमानस्थल बन्द गर्ने तयारी गरिएको छ ।
नेपाल नागरिक उड्डयन प्राधिकरणका एक उच्च अधिकारीका अनुसार गोठाटारसहितका क्षेत्रमा निरन्तर आगलागीका घटना भइरहेको र अन्य परिस्थिति पनि हवाई सुरक्षा प्रतिकुल बन्दै गएसँगै विमानस्थल बन्द गर्न लागिएको हो ।
काठमाडौं- नेपाली कांग्रेसका केन्द्रीय सदस्य एवं शिक्षा विभाग प्रमुख नैनसिंह महरले बीपी कोइरालाको ११२औँ जन्मजयन्तीको तरखरमा राजधानीमा लोकतन्त्रको ‘कुरूप र नृशंस अभ्यास’ भएको भन्दै सरकारको चर्को आलोचना गर्नुभएको छ।
उहाँले फेसबुकमार्फत वर्तमान सरकारले तत्काल राजीनामा दिनुपर्ने माग प्रस्तुत गर्नुभएको छ।
महरले बीपी कोइराला र नेपालका लोकतान्त्रिक आन्दोलनका शहीदहरूप्रति श्रद्धासुमन अर्पण गर्दै भदौ २३ गतेको घटनाले लोकतन्त्रको मर्यादामाथि गम्भीर प्रश्न उठाएको बताउनुभएको छ।
उहाँले बीपी कोइरालाले नागरिक अधिकार, अभिव्यक्ति स्वतन्त्रता र राज्य जनताप्रति उत्तरदायी हुनुपर्छ भन्ने मान्यता स्थापित गर्न जीवनभर सङ्घर्ष गरेको स्मरण गराउँदै आजको अवस्था बीपीले परिकल्पना गरेको समाजभन्दा ठीक उल्टो रहेको बताउनुभएको छ। “बीपीले परिकल्पना गरेको समाजमा नागरिक प्रश्न सोध्न डराउँदैन र सरकार जवाफ दिनबाट भाग्दैन। तर आज अवस्था ठीक उल्टो छ,” महरले भन्नुभयो।
जेन-जी आन्दोलन बीपीको चेतनाको प्रतिबिम्ब
महरले जेन-जी पुस्ताले भ्रष्टाचार र कुशासनविरुद्ध उठाएको आवाजलाई बीपीको लोकतान्त्रिक र समाजवादी चेतनाको प्रतिबिम्बका रूपमा व्याख्या गर्नुभएको छ। उहाँका अनुसार भदौ २३ गतेको त्रासदीले बीपी कोइरालाको सान्दर्भिकतालाई आज झनै प्रखर र आवश्यक बनाएको छ। “बीपीको सान्दर्भिकता उनको मेलमिलापको नीतिमा मात्र सीमित छैन। नागरिक सर्वोच्चता र विधिको शासनप्रतिको उनको अटुट निष्ठामा निहित छ,” महरले भन्नुभयो, “जबसम्म राज्य नागरिकसँग संवादको सट्टा बन्दुकको भाषा बोल्छ, तबसम्म बीपीको विचारले सत्तालाई निरन्तर प्रश्न गरिरहनेछ।”
निकासका लागि माग
वर्तमान विषम परिस्थितिको निकासका लागि महरले निम्न कुराहरूमा ध्यान दिनुपर्ने माग गर्नुभएको छ:
१. वर्तमान सरकारले राजीनामा दिने र नयाँ सरकारको निर्माण गर्ने।
२. महामहिम राष्ट्रपतिज्यूले राष्ट्रिय मेलमिलापका लागि पहलकदमी लिने।
३. तत्काल घाइतेको उद्धार र उपचारमा प्राथमिकता दिने।
४. जेन-जी आन्दोलनमा भएको हिंसा, धरपकडको छानबिन गर्ने।
५. २०१७ सालदेखि सार्वजनिक पद धारण गर्नेहरूमाथि छानबिन गर्न उच्चस्तरीय अधिकारसम्पन्न आयोग गठन गर्ने।
६. नेपाली कांग्रेस केन्द्रीय समिति र संसदीय दलको संयुक्त बैठक मार्फत निकास खोज्ने।
७. सबै राजनीतिक दल, अन्तर्राष्ट्रिय समुदाय, आम सञ्चार, नागरिक समाज र सरोकारवालासँग तारन्तार संवाद गर्ने।
८. राष्ट्रिय शोकको समयमा सबैलाई संयम अपनाउन सचेत गर्ने, प्रभावित क्षेत्रमा मानवीय सहायता उपलब्ध गराउने, भावी रणनीति निर्माण गर्ने र मानवअधिकारको वकालत तथा रक्षा गर्ने।
महरले यो गम्भीर परिस्थितिमा सबै सरोकारवालाहरूले जिम्मेवारीपूर्वक काम गर्नुपर्नेमा जोड दिनुभएको छ। उहाँको यो अभिव्यक्तिले सरकारमाथि थप दबाब सिर्जना गरेको छ।
काठमाडौं । देशव्यापी रूपमा चर्किएको युवा आन्दोलन र जनदबाबका सामु सरकार अन्ततः झुकेको छ । सोमबार बसेको मन्त्रिपरिषद् बैठकले सामाजिक सञ्जालमाथि लगाएको प्रतिबन्ध फुकुवा गर्ने निर्णय गरेको हो ।
सूचना तथा सञ्चार प्रविधि मन्त्री पृथ्वी सुब्बा गुरूङले यसको पुष्टि गर्दै सामाजिक सञ्जालहरू सञ्चालनमा आइसकेको जानकारी दिए । सरकारले गत १९ भदौमा मन्त्रीस्तरीय निर्णयमार्फत सामाजिक सञ्जालहरूमाथि प्रतिबन्ध लगाएको थियो, जसमा विशेष गरी एक्स (पहिलेको ट्वीटर) लाई लक्षित गरिएको थियो । प्रधानमन्त्री ओलीले मन्त्रिपरिषद् बैठकमा एक्सले नेपालको राष्ट्रिय स्वाभिमानको कदर नगरेको र नेपालमा दर्ता नहुने अडान लिएको भन्दै ब्रिफिङ गरेका थिए । उनले ‘डेढ वर्षदेखि सूचीकृत गर र नेपालको कानुन मान’ भन्दा पनि अटेरी गरेको आरोप लगाएका थिए ।
यद्यपि, सरकारको यो कदमले युवा वर्गमा ठूलो असन्तुष्टि पैदा गर्यो । जेनजी (Gen Z) हरूले सामाजिक सञ्जाल खुलाउन माग गर्दै देशका विभिन्न भागमा सशक्त प्रदर्शनहरू गरे । सोमबार मात्रै काठमाडौंमा १७ र इटहरीमा २ जना प्रदर्शनकारीले ज्यान गुमाएका थिए । यसले सरकारमाथि थप दबाब सिर्जना गर्यो । चर्को जनविरोध र सत्तारुढ दलभित्रबाटै आएको दबाब थेग्न नसकेपछि सरकार आफ्नो निर्णयबाट पछि हट्न बाध्य भएको हो ।
काठमाडौं । जिल्ला प्रशासन कार्यालय काठमाडौँले राजधानीका विभिन्न संवेदनशील क्षेत्रमा जारी गरेको कर्फ्युको समय थप गरेको छ । यसअघि मंगलबार बिहान ५ बजेसम्मका लागि लगाइएको कर्फ्यु बिहान साढे ८ बजेदेखि अनिश्चित कालका लागि लम्ब्याइएको हो ।
काठमाडौंका प्रमुख जिल्ला अधिकारी छविलाल रिजालका अनुसार काठमाडौं महानगरपालिकाको बालकुमारी पुलदेखि कोटेश्वर चोक, सिनामंल, गौशाला, चाबहिल, नारायणगोपाल चोक, गोंगबु, बालाजु, स्वयम्भु, कलंकी, बल्खु हुँदै बागमती नदी पुलसम्मको चक्रपथभित्रको सम्पूर्ण भूभागमा कर्फ्यु लगाइएको हो । कर्फ्यु अवधिभर अत्यावश्यक सेवाका सवारी साधनहरुबाहेक अन्यलाई आउजाउ गर्न, सभा जुलुस गर्न वा कुनै पनि प्रकारको प्रदर्शन गर्न रोक लगाइएको छ ।
काठमाडौँमा हालको सुरक्षा अवस्थालाई मध्यनजर गर्दै कुनै अप्रिय घटना हुन नदिनका लागि प्रशासनले यो कदम चालेको बुझिएको छ । सर्वसाधारणलाई तोकिएको समय र क्षेत्रमा आवागमन नगर्न र प्रशासनलाई सहयोग गर्न आग्रह गरिएको छ ।

काठमाडौं । नेपाली काँग्रेसका केन्द्रीय सदस्य तथा प्रतिनिधि सभा सांसद डा. सुनिल कुमार शर्माले जेन–जी पुस्ताले उठाएको आवाजलाई सरकारले दमन गरेकोप्रति कडा आपत्ति जनाएका छन् ।
फेसबुकमार्फत उनले अभिव्यक्ति स्वतन्त्रतामाथि लगाउन खोजिएको लगाम, चरम गरिबी, उच्च बेरोजगारी, व्यापक भ्रष्टाचार, कुशासन, राज्य सम्पत्तिको दोहन र नेताका सन्तानको “नेपोबेबी” जीवनशैलीविरुद्ध उठेको युवा आन्दोलनलाई बुट र बन्दुक प्रयोग गरी दमन गर्नु सरकारको क्रुरता भएको टिप्पणी गरेका छन् ।
इतिहासमै पहिलोपटक संसद भवन परिसरभित्रै प्रदर्शनकारी प्रवेश गरेको घटनालाई उनले केवल प्रतीकात्मक नभई नेतृत्व र संरचनाको असफलता उजागर गर्ने चेतावनीजनक सन्देश भएको बताएका छन् ।
आन्दोलनमा ज्यान गुमाउनेप्रति श्रद्धाञ्जली अर्पण गर्दै घाइतेको शीघ्र स्वास्थ्य लाभको कामना गर्दै उनले जेन–जी पुस्ताका आवाजलाई उच्च प्राथमिकताका साथ सम्बोधन गर्न सरकार तथा सम्बन्धित सबै पक्षलाई आग्रह गरेका छन् ।
शर्माले फेसबुकमा लेखेका छन्- अभिव्यक्ति स्वतन्त्रतामा सरकारले लगाउन खोजेको लगाम, चरम गरिबी, उच्च बेरोजगारी, व्यापक भ्रष्टाचार, कुशासन, राज्यको सम्पत्तिमा हुने दोहन, नेताका छोराछोरीका अस्वाभाविक मोजमस्ती, आलिशान जीवनशैली (नेपोबेबी) को विरोधमा जेन—जी पुस्ताले उठाएको आवाजलाई बुट र बन्दुकले दमन गर्ने क्रुरता सरकारले देखाएको छ त्यो अत्यन्त लज्जाजनक छ । उनीहरुको आक्रोश र मागलाई गंभिरतापुर्वक सुन्नु हाम्रो पार्टी र सरकारको कर्तव्य थियो । तर आज राजधानी र देशैभर फैलिएको आन्दोलन, भडकिएको हिंसा, दमन, गोली प्रहार र युवाहरुको मृत्युले देश नै आक्रान्त बनेको छ । हामी वी. पी. कोइराला जस्तो देश र जनता प्रति समर्पित जननेताको आदर्शबाट प्रेरित भएर कांग्रेसमा छौं, त्यो पार्टी आज यस्ता घटनामा अप्रत्यक्ष वा प्रत्यक्ष रूपमा मुछिएको देख्दा, मलाई लज्जाबोध भएको छ। इतिहासमै पहिलोपटक संसद भवनको परिसरभित्र युवा प्रदर्शनकारीको प्रवेश भएको छ। यो केवल प्रतीकात्मक घटना मात्र होइन, यसले जनता आफ्ना प्रतिनिधि र संसदसंग असन्तुष्ट रहेको, लोकतन्त्रप्रति भरोसा घटिरहेको र वर्तमान राजनीतिक संरचना जनताको आवाज सुन्न असफल भएको देखाएको छ। यो घटनाले नेतृत्वको गैर जिम्मेवारीपन र संरचनाको कमजोरी उजागर गरेको छ। यो आन्दोलन केवल विरोध होइन। यो देशभक्तिको भाव, युवा पुस्ताको भविष्यप्रतिको चिन्ता र राष्ट्र विकासप्रतिको तीब्र चाहनाको प्रतीक हो। आजको आन्दोलनका क्रममा आफ्नो अमुल्य जीवनको बलिदानी दिनु भएका सबै प्रति श्रद्धाञ्जली अर्पण गर्दै शोकाकुल परिवारजनमा गहिरो समवेदना प्रकट गर्दछु। साथै, आन्दोलनको क्रममा घाइते हुनुभएका सबैलाई शीघ्र स्वास्थ्य लाभको हार्दिक कामना गर्दछु। जेन—जी का आवाजहरुलाई गंभिरता र उच्च प्राथमिकताका साथ लिई समयमा नै सम्बोधन गर्न म सवैलाई आग्रह पनि गर्दछु ।
काठमाडौं । गृहमन्त्री रमेश लेखकले राजीनामा दिएका छन् ।
सोमबार साँझ प्रधानमन्त्री निवास बालुवाटारमा बसेको मन्त्रिपरिषद् बैठकमा लेखकले प्रधानमन्त्री केपी शर्मा ओलीसमक्ष राजीनामा बुझाएका छन् । मन्त्रिपरिषद्का एक सदस्यले लेखकले बैठकमै राजीनामा घोषणा गरेको पुष्टि गरे ।
सुरक्षा व्यवस्थाको जिम्मेवारी सम्हाल्ने गृहमन्त्री लेखकले प्रदर्शन नियन्त्रणमा लिन नसकेको भन्दै नैतिक जिम्मेवारी स्वीकार्दै राजीनामा दिएको बताइएको छ ।
सोमबार राजधानीलगायत विभिन्न स्थानमा जेनजी समूहले गरेको प्रदर्शन हिंसात्मक बन्दै जाँदा सुरक्षाकर्मी र प्रदर्शनकारीबीच झडप भएको थियो । हालसम्म १९ जनाको मृत्यु भइसकेको पुष्टि सरकारले गरिसकेको छ । दर्जनौं घाइते छन् ।
घटनापछि सार्वजनिक र राजनीतिक वृत्तमा लेखकको राजीनामाको माग बढ्दै गएको थियो । स्रोतका अनुसार लेखकले राजीनामा दिनुअघि कांग्रेस बैठकमा पनि पदबाट राजीनामा दिन चाहेको बताएका थिए ।
काठमाडौं । आज बिहानदेखि जारी जेनजी प्रदर्शनका क्रममा अहिलेसम्म १९ जनाको मृत्यु भएको छ ।
उपत्यकाका विभिन्न अस्पतालहरूमा उपचारका क्रममा १९ जनाको मृत्यु पुष्टि भएको छ ।
स्रोतका अनुसार ट्रमा सेन्टरमा मात्रै ८ जनाको मृत्यु भएको छ । सिभिल अस्पतालमा ३ जनाको मृत्यु भएको छ भने केएमसी अस्पतालमा २ जनाको मृत्यु भएको छ ।
त्रिवि शिक्षण अस्पतालमा १ जनाको र एभरेष्ट अस्पतालमा ३ जनाको मृत्यु भएको अस्पताल स्रोतले जानकारी दियो । यस्तै विपी कोइराला स्वास्थ्य विज्ञान प्रतिष्ठानमा २ जनाको मृत्यु भएको छ ।
प्रहरी र प्रदर्शनकारीबीचको झडपका कारण धेरै घाइते भएका छन्, तर घाइतेहरूको यकिन संख्या र अवस्था अहिलेसम्म सार्वजनिक भएको छैन । घाइते र मृतकको संख्याबारे एकिन जानकारी आउन बाँकी छ ।
यस्तै, सुनसरीको इटहरीमा पनि प्रहरीले चलाएको गोलीबाट दुई प्रदर्शनकारीको मृत्यु भएको छ ।
गोली लागेर गम्भीर घाइते भएका दुवै जनालाई धरानस्थित बीपी कोइराला स्वास्थ्य विज्ञान प्रतिष्ठानमा लगिएको थियो ।
अस्पताल पुर्याउनासाथ चिकित्सकले मृत घोषणा गरेका थिए । घटनामा घाइते भएका अर्का एक प्रदर्शनकारीको सोही अस्पतालमा उपचार भइरहेको छ ।
यस क्रममा सशस्त्र प्रहरी बलका एक सहायक हवल्दारसमेत घाइते भएका छन् । उनको गालामा चोट लागेको र अवस्था खतरामुक्त रहेको बताइएको छ ।
काठमाडौँ । काठमाडौँमा जारी जेनजी आन्दोलनका क्रममा घाइते भएकाहरूको काठमाडौँ मेडिकल कलेजले निःशुल्क उपचार गर्ने भएको छ ।
काठमाडौँ मेडिकल कलेजले एक विज्ञप्ति जारी गर्दै आन्दोलनमा घाइते भएकाहरूको निःशुल्क उपचार गर्ने घोषणा गरेको हो ।
अस्पताल प्रशासन प्रमुख नारायण प्रसाद दाहालले आफ्नो सामाजिक उत्तरदायित्व अन्तर्गत निःशुल्क उपचारको व्यवस्था मिलाइएको बताए ।

काठमाडौं । आज बिहानदेखि जारी जेनजी प्रदर्शनका क्रममा अहिलेसम्म १७ जनाको मृत्यु भएको छ ।
उपत्यकाका विभिन्न अस्पतालहरूमा उपचारका क्रममा १७ जनाको मृत्यु पुष्टि भएको छ ।
ट्रमा सेन्टरमा मात्रै ७ जनाको मृत्यु भएको छ । सिभिल अस्पतालमा ३ जनाको मृत्यु भएको छ भने केएमसी अस्पतालमा २ जनाको मृत्यु भएको छ ।
त्रिवि शिक्षण अस्पतालमा १ जनाको र एभरेष्ट अस्पतालमा ३ जनाको मृत्यु भएको अस्पताल स्रोतले जानकारी दियो । एक जनाको भने संसद भवन अगाडी नै गोली लागेर मृत्यु भएको थियो ।
प्रहरी र प्रदर्शनकारीबीचको झडपका कारण धेरै घाइते भएका छन्, तर घाइतेहरूको यकिन संख्या र अवस्था अहिलेसम्म सार्वजनिक भएको छैन । घाइते र मृतकको संख्याबारे एकिन जानकारी आउन बाँकी छ ।
काठमाडौं। जेनजीको प्रदर्शनमा घाइते भएकालाई सरकारले नि :शुल्क उपचार गर्ने भएको छ । स्वास्थ्य तथा जनसंख्या मन्त्रालयले आज भएको आन्दोलनमा घाइते भएका नागरिकको ज्यान बचाउने जुनसुकै पनि उपचार निःशुल्क गर्न मातहतका सबै संघीय अस्पतालहरूलाई सर्कुलर गरेको हो।
स्वास्थ्य तथा जनसख्या मन्त्री पौडेलको अग्रसरतामा मन्त्रालयले संघीय अस्पतालमा आउने आन्दोलनका घाइतेलाई कुनै शुल्क नलाग्ने गरी सिघ्र उपचारको व्यवस्था गर्न भनिएको छ ।
यसैगरी, मन्त्रालयले एम्बुलेन्स सेवालाई थप प्रभावकारी बनाउन र आवश्यक परेका विभिन्न स्थानहरूमा सहजै उपलब्ध गराउन पनि निर्देशन दिएको छ ।
काठमाडौँ उपत्यकाको एम्बुलेन्स सञ्जाललाई अस्पतालबाट रिफर हुने बिरामीलाई अर्को अस्पातलमा लिएर जान सहजीकरणका लागि समेत आह्वान गरेको छ ।
साथै, सम्पूर्ण चिकित्सक एवम् स्वास्थ्यकर्मीहरूलाई एकजुट भई घाइतेको उपचारमा जुट्न पनि मन्त्रालयले आह्वान गरेको छ ।





