काठमाडौंको बूढानीलकण्ठमा घर भाडामा लिएर सुनको अवैध कारोबार गरिरहेको आरोपमा पक्राउ परेका तीन चिनियाँ नागरिकले योजनाबद्ध रूपमा आफ्नो गतिविधि अघि बढाएको प्रारम्भिक विवरणबाट खुलेको छ। उनीहरूले अमेरिका बस्ने एक व्यक्तिको घरलाई आफ्नो गतिविधिको केन्द्र बनाएका थिए। उक्त घरबाट प्रहरीले २१ किलोभन्दा बढी सुन र सुन प्रशोधनमा प्रयोग हुने विभिन्न उपकरण बरामद गरेको छ।
प्रहरी स्रोतका अनुसार चिनियाँ समूहले बूढानीलकण्ठमा विष्ट थर भएका व्यक्तिको घर गत साउनदेखि भाडामा लिएको थियो। घरको मासिक भाडा ३ लाख ३० हजार रुपैयाँ तय गरिएको थियो। समूहले घरधनीलाई चार महिनाको भाडा एकैपटक अग्रिम भुक्तानी गरेको खुलेको छ।
घर भाडामा लिएर सुनको अवैध कारोबार भइरहेको सूचना पाएपछि प्रहरीले बिहीबार छापा मारेको थियो। त्यसक्रममा तीन जना चिनियाँ नागरिक पक्राउ परेका हुन्। प्रहरीले उनीहरूको साथबाट करिब २१ किलो ७५०.६८ ग्राम सुन तथा विभिन्न मेसिन र उपकरण बरामद गरेको जनाएको छ।
प्रहरीको प्रारम्भिक जानकारीअनुसार समूहका एक सदस्य पहिले नेपाल आएका थिए। उनले यहाँको बजार र कारोबारको अवस्था बुझेर चीन फर्किएपछि समूहका अन्य दुई सदस्य नेपाल आएको प्रहरी स्रोतको भनाइ छ। यसले उनीहरू नेपालमा आएर कारोबार सुरु गर्नुअघि नै यहाँको अवस्था बुझ्ने प्रयास गरेको देखाउँछ।
नेपाल आएपछि पनि उनीहरू तीनदेखि चार पटकसम्म विमानस्थल हुँदै आवतजावत गरेको स्रोतले जनाएको छ। उनीहरूको पटकपटकको नेपाल आगमन, घर भाडामा लिएर सञ्चालन गरिएको गतिविधि र बरामद सुनको स्रोतबारे प्रहरीले अनुसन्धान अघि बढाएको छ।
