एमाले अध्यक्ष ओली देउवाप्रति कडा

0
374

काठमाडौं, १० जेठ । प्रमुख प्रतिपक्ष नेकपा एमालेका अध्यक्ष केपी शर्मा ओलीले प्रधानमन्त्री पुष्पकमल दाहालले राजीनामा दिने बेला नभएको बताएका छन् । उनले अहिले सरकारले नीति तथा कार्यक्रम र बजेट पेस गर्ने बेला भएको, निर्वाचनको मुखैमा राजीनामा नगर्न पनि सुझाव दिए । बानेश्वरमा पत्रकारहरुसँग कुरा गर्दै उनले यस्तो बताएका हुन् ।

‘प्रधानमन्त्रीले राजीनामा दिने बेला भएको छैन । तीन दिनपछि नीति तथा कार्यक्रम र ६ दिनपछि बजेट आउँदैछ,” उनले भने, ‘यस्तो बेलामा राजीनामा किन दिने ? यस्तो बेलामा राजीनामा दिने हो भने पर्सी आउने नीति तथा कार्यक्रम कसको हो ?”
ओली नेपाली कांग्रेसका सभापति शेरबहादुर देउवाप्रति निकै आक्रामक देखिएका थिए । ‘नेपालमा लोकतान्त्रिक आन्दोलन चलिरहेको थियो । शेरबहादुर देउवा त्यसबेला बेलायतका गल्लीमा बरालिँदै हुनुहुन्थ्यो,” ओलीले भने, ‘असोज १८ र माघ १९ उहाँकै कारणले घटेको हो ।”

ओलीले देउवाकै कारण नेपाली कांग्रेस पनि बेला बेला अप्ठेरोमा परेको बताए । ‘पहिले पनि पार्टीलाई नै दुई टुक्रा बनाउनुभयो । अहिले पार्टीका कार्यकर्तालाई अर्काको चुनाव चिन्हमा भोट हाल्न बाध्य बनाउनुभयो,” ओलीले भने ।

उनले देउवाले नै प्रधानमन्त्रीलाई अप्ठेरोमा पारेको ओलीको भनाई थियो । ‘अहिले प्रचण्डलाई राजीनामा कहिले दिने ? भनेर अप्ठेरो बनाउनुभएको छ,” ओलीले भने, “राजीनामा खल्तीमा हालेर हिँड्न बाध्य बनाउनुभएको छ । निर्वाचनअघि कम्तिमा २२ दिन त पर्खिनुहोस् ।”