सरकारका प्रवक्ता तथा सञ्चार, सूचना प्रविधिमन्त्री जगदीश खरेलले मुलुकमा निर्वाचनको पूर्ण वातावरण तयार भइसकेको बताएका छन्।
मंगलबार सिंहदरबारमा मन्त्रिपरिषद्का निर्णय सार्वजनिक गर्दै उनले प्रतिनिधिसभा निर्वाचनका लागि सबै राजनीतिक दल तयार भइसकेको र सरकारले आवश्यक तयारी पूरा गरिरहेकाले अब निर्वाचनप्रति आशङ्का नराख्न आग्रह गरे। उनका अनुसार निर्वाचनको विरोध गर्ने दलसमेत दर्ता भइसकेका कारण प्रक्रिया सहज रूपमा अघि बढ्ने वातावरण बनेको छ।
मन्त्री खरेलले मतदाता नामावली सङ्कलनको अवस्थाले जनता पनि निर्वाचनका लागि सक्रिय भइसकेको देखिएको उल्लेख गरे। सुरक्षा रणनीति तयार भएको भन्दै उनले अहिलेको सरकार जेनजी आन्दोलनको जगमा निर्माण भएकाले प्रधानमन्त्रीले जेनजी युवालाई प्राथमिकतामा राखेको बताए। सोमबार व्यस्तताका कारण प्रधानमन्त्रीले जेनजी युवासँग सिंहदरबारमा भेट गर्न नसकेको उनको भनाइ थियो । उनले जेनजीलाई कुनै प्रकारको बेवास्ता नगरिने स्पष्ट पारे।
मन्त्रिपरिषद्को निर्णय सुनाउँदै मन्त्री खरेलले नेपाल पानीजहाज कार्यालयमा कार्यरत सहसचिव प्रेमकुमार सिंहले दिएको राजीनामा स्वीकृत भएको जानकारी गराए । साथै मेलम्ची खानेपानी आयोजनाबाट प्रभावित क्षेत्रका पूर्वाधार विकाससम्बन्धी विषयमा अनुगमन गर्न प्रधानमन्त्री तथा मन्त्रिपरिषद् कार्यालयका सचिवको संयोजकत्वमा ‘मेलम्ची खानेपानी आयोजना प्रभावित क्षेत्र अनुगमन, समन्वय एवं सहजीकरण समिति’ गठन गर्ने निर्णय भएको पनि उनले बताए।
