सत्तारुढ राष्ट्रिय स्वतन्त्र पार्टी (रास्वपा)ले संसदीय दलको विधान संशोधनका लागि कार्यदल गठन गरेको छ ।
बुधबार सिंहदरबारस्थित संसदीय दलको कार्यालयमा बसेको संसदीय दलको बैठकले मुख्य सचेतकको संयोजकत्वमा कार्यदल गठन गरेको हो ।
बैठकको निर्णयबारे जानकारी दिँदै संसदीय दलका उपनेता गणेश पराजुलीले संसदीय दलको विधानलाई आवश्यकताअनुसार परिमार्जन गर्न सात दिनको समयसीमा दिएर कार्यदल गठन गरिएको बताए ।
कार्यदलले तयार पार्ने कार्यविधिले सांसदहरूको सदनमा उपस्थिति, संसदीय मर्यादा, जिम्मेवारीबोध र कानुन निर्माण प्रक्रियामा उनीहरूको भूमिकालाई थप सशक्त तथा जनपक्षीय बनाउने विश्वास गरिएको पराजुलीले बताए ।
पार्टी सभापतिसहित शीर्ष नेता तथा मन्त्रीहरूको उपस्थितिमा बसेको बैठकमा सरकारका गतिविधि र मन्त्रालयगत कामकारबाहीबारे पनि विस्तृत छलफल भएको थियो ।
बैठकमा सहभागी मन्त्रीहरूले आ–आफ्नो मन्त्रालयबाट भएका प्रगति तथा गतिविधिको विवरण प्रस्तुत गरेका थिए । सांसदहरूले भने आ–आफ्नो निर्वाचन क्षेत्रका समस्या तथा जनस्तरबाट आएका गुनासाबारे जानकारी गराएका थिए ।
सरकारले गरेका कामलाई आम जनतासम्म पुर्याउन देखिएका समस्या तथा सञ्चार समन्वयमा भएका कमजोरीबारे पनि बैठकमा समीक्षा गरिएको थियो ।
उपनेता पराजुलीका अनुसार बजारमा ग्यास आपूर्तिको अवस्था र जनस्तरमा देखिएको अभावबारे समेत बैठकमा छलफल भएको थियो ।
‘गत वैशाखमा २२ लाख सिलिन्डर बजारमा पुगेकोमा साउन महिनामा ४० लाख पुग्दा पनि किन अभाव देखियो भन्ने विषयमा माननीय मन्त्रीज्यूहरूले जानकारी गराइरहनुभएको छ,’ उनले भने ।
सदन र सरकारका कामकारबाहीलाई थप प्रभावकारी बनाउने उद्देश्यले संसदीय दलको बैठक बसेको रास्वपाले जनाएको छ ।
