मकवानपुरको इन्द्रसरोवर गाउँपालिका–३ निवासी अर्जुन दोङको मृत्यु प्रकरणमा निष्पक्ष छानबिन र न्यायको माग गर्दै उनका परिवार तथा समर्थकहरू सडकमा उत्रिएका छन् ।
सोमबार काठमाडौँको त्रिपुरेश्वरमा आत्मदाहको प्रयास गरेका दोङको उपचारका क्रममा गएराति कीर्तिपुरस्थित बर्न अस्पतालमा मृत्यु भएको परिवारले जनाएको छ ।
मृतक दोङकी श्रीमती र छोरासहित परिवारका सदस्य तथा समर्थकहरू मंगलबार कीर्तिपुरस्थित बर्न अस्पताल परिसरमा प्रदर्शनमा उत्रिएका हुन् । उनीहरूले दोङलाई जबर्जस्ती मर्न बाध्य बनाइएको आरोप लगाउँदै घटनाको सत्यतथ्य छानबिन गर्न माग गरेका छन् ।
प्रदर्शनकारीहरूले घटनामा संलग्न दोषीमाथि कारबाही, पीडित परिवारलाई न्याय तथा उचित क्षतिपूर्ति उपलब्ध गराउन माग गरेका छन् ।
परिवारले घटनाको वास्तविकता सार्वजनिक गर्न सम्बन्धित निकायसँग आग्रह गरेको छ । प्रदर्शनका क्रममा सञ्चारमाध्यम तथा पत्रकारहरूलाई घटनाबारे जानकारी दिँदै समाचार सम्प्रेषणमा सहयोग गर्नसमेत आग्रह गरिएको छ।
सोमबार मुलपानीदेखि थानकोटतर्फ जाँदै गरेको रिद्धिसिद्धी यातायातको बा ५ ख ४२७४ नम्बरको बसमा त्रिपुरेश्वरमा आगलागी भएको थियो ।
आगलागी लगत्तै दमकलको सहायताले आगो नियन्त्रणमा लिइए पनि ९० प्रतिशतभन्दा बढी शरीर जलेका चालकको उपचारकै क्रममा मृत्यु भएको हाे ।
