क्विन्सल्याण्ड, अष्ट्रेलिया – गैरआवासीय नेपाली संघ अष्ट्रेलिया (एनआरएन) को अध्यक्ष पदमा स्वतन्त्र प्रताप शाहले आफ्नो उम्मेद्वारी घोषणा गरेका छन् । एनआरएन अष्ट्रेलियाको आगामी कार्यकालको लागि जुलाई आठ तारिखमा हुन गइरहेको निर्वाचनको लागि शाहले उम्मेद्वारी घोषणा गरेका हुन् ।
सन् २००९ देखि २०१५ सम्म एनआरएनएको उपाध्यक्ष रहेका शाहले आफ्नो उम्मेद्वारीको मुख्य उद्देश्य अष्ट्रेलियाको नेपाली समाज र नेपाल सरकारबीचको सम्बन्ध अझै सुमधुर र प्रभावकारी बनाउँदै, अर्थ, सिप, ज्ञान र प्रविधिलाई नेपाल भित्र्याउन विशेष भूमिका निभाउनु रहेको बताए ।
नेपाल र नेपालीसँग सम्बन्धित कृयाकलापहरुमा आफ्नो सक्रिय संलग्नतालाई निरन्तरता दिने बताउंदै उनले भने , “विगत लामो समयदेखि एनआरएन अष्ट्रेलियाका विभिन्न जिम्मेवारीमा रहेर नेपाली समाजसँग सम्बन्धित कृयाकलापहरुमा एकाकार हुँदै आएको छु र म संस्थाको नेतृत्वमा नरहँदा पनि त्यो भावना र जिम्मेवारी महसुस उत्तिकै लिदै आएको छु।”
विगत देखि नै प्रवासमा रहेका नेपालीहरुको हकहितका लागि निरन्तर सक्रिय रहँदै आएका शाहले अघि थपे – ”अष्ट्रेलियास्थित नेपाली समुदाय र नेपाली संघसंस्थाबीच अभुतपुर्व सम्बन्ध र सहकार्य बढाउँदै, यहाँस्थित नेपाली समाजलाई मातृभूमीसँग सामाजिक र साँस्कृतिकरुपमा जोड्न विभिन्न मौलिक कार्यक्रम आयोजना गर्ने कुरामा विगत देखि नै लागि परेको छु र आगामी दिनमा अझै सक्रियताका साथ नयाँ ढंगले लागिपर्ने छु ।”
को हुन् शाह ?
शाह सन् २००९ देखि २०१५ सम्मको कार्यकालमा एनआरएनएको उपाध्यक्ष पदको जिम्मेवारीमा रही काम गरिसकेका व्यक्ति हुन् । देश भित्र र बाहिर युवा माझ लोकप्रिय युवा ब्यबसायी स्वतन्त्र प्रताप शाहलाइ उनले एनआरएन अष्ट्रेलियामा खेलेको सक्रिय भूमिकाको मुल्यांकन गर्दै केहि अघि मात्र नेपाल सरकारले अष्ट्रेलियाका लागि पर्यटन दुत नियुक्त गरेको थियो । नेपालमा २०७२ बैशाख १२ को महाभूकम्पले देश जर्जर बन्दा उनले अष्ट्रेलियाबाट राहत र पुनर्निर्माणको लागि ठुलो सहयोग रकम नेपाल ल्याउन नेतृत्वदायी भूमिका खेलेका थिए ।
शाहको अष्ट्रेलियामा रियल स्टेट, एजुकेसन कन्सलट्यान्सि, ट्राभल, मनि ट्रान्सफर, रेस्टुरेन्ट लगायतका क्षेत्रमा लगानी रहेको छ । उनले थुप्रै नेपालीहरुलाई आफुले लगानी गरेको क्षेत्रमा रोजगारी समेत दिंदै आएका छन् । शुरु शुरुमा जाने थुप्रै नेपालीहरुलाई नि:शुल्क काउन्सिलिङ्ग सेवा समेत दिंदै आएका युवा ब्यबसायी शाहले अफ्ठ्यारोमा परेका नेपालीलाई कुटनीतिक समाधान खोज्न समेत निस्वार्थ पहल गर्दै आइरहेका छन् ।
